काठमाडौं । नेपाली कांग्रेसले क्रियाशील सदस्यतासम्बन्धी विवाद पाँच दिनभित्र टुङ्ग्याउन शीर्ष नेतालाई जिम्मेवारी तोकेको छ । बिहीवार पार्टी सभापति शेरबहादुर देउवाको निजी निवास बूढानीलकण्ठमा पदाधिकारी तथा पूर्वपदाधिकारीको बैठक बस्दै यस्तो निर्णय लिएको हो । क्रियाशील सदस्यता छानबिन समितिले क्रियाशील सदस्यताको सम्बन्धमा टुङ्ग्याउन नसकेको विषयलाई अब पार्टीका शीर्ष नेताले टुंगो लगाउने छन् । यस्तो काम पाँच दिनभित्र गरिसक्ने गरि मिति समेत तोकिएको छ ।
विवादित विषयलाई पाँच दिनभित्र शीर्ष नेताले टुङ्ग्याएपछि महाधिवेशनका बाँकी प्रक्रिया प्रारम्भ हुने बैठकपछि कांग्रेस नेता रमेश लेखकले जानकारी गराए । क्रियासिल सदस्यताको विषय सकिएपछि भने निर्वाचन समितिका काम अघि बढ्ने भएका छन् । कांग्रेसमा अन्य पार्टीबाट नेपाली कांग्रेसमा समायोजन भएका, धनुषा क्षेत्र नं. ४, सर्लाही क्षेत्र नं. २, बारा र सप्तरीमा नयाँ क्रियाशील सदस्य बारे विवाद छ ।