काठमाडौं । नेपाली कांग्रेसको १४ औं महाधिवेशनको मिति सर्ने निश्चित भएको छ । शनिबार पार्टी सभापति शेरबहादुर देउवाको निवासमा सम्पन्न पदाधिकारी बैठकले महाधिवेशनको मिति दुई साता पर धकेल्ने प्रस्ताव गरेको छ । कोरोना महाकारीका कारण पूर्वनिर्धारित सबै प्रक्रियाहरु पर र्ने भएकाले महाधिवेशनको मिति समेत सार्नु परेको बैठकको निष्कर्ष रहेको छ ।
बैठकले भदौ १६ देखि १९ गतेसम्म १४ औं महाधिवेशन गर्ने प्रस्ताव गरेको हो । यो प्रस्तावको अनुमोदन भने केन्द्रिय समितिले गर्नुपर्छ । आजको बैठकमा सभापति शेर बहादुर देउवाले आफु कुनै पनि हालतमा महाधिवेशन गराउने पक्षमा रहेको बताएका थिए । यसअघि भदौ ७ देखि १० सम्म महाधिवेशन गर्ने निर्णय काङ्ग्रेसले गरेको थियो । पार्टीको महाधिवेशन भदौ भित्र जुनसुकै हालतमा गर्नुपर्ने संवैधानिक बाध्यता समेत रहेको छ ।