काठमाडौं । प्रमुख विपक्षी नेपाली कांग्रेसले तत्काल संसदको हिँउदे अधिवेशन बोलाउन माग गरेको छ । सरकारले संवैधानिक परिषदसम्बन्धी अध्यादेश ल्याएपछि आफ्नो धारणा सार्वजनिक गर्न कांग्रेसको पदाधिकारी बैठक आज बसेको थियो । उक्त बैठकले तत्काल संसद बोलाउनु पर्ने निचोड निकालेको हो ।
सरकारले ल्याएको अध्यादेश संविधानको मर्म विपरीत भएको ठहर गर्दै संसदको अधिवेशन छलेर अध्यादेश जारी गर्नु अलोकतान्त्रिक र सर्वसत्तावादी कदम भएको समेत निष्कर्ष कांग्रेसले निकालेको छ ।
आजको बैठकले पुस ३ गतेका लागि संसदीय दलका कार्यसमितिको बैठक समेत बोलाउने निर्णय गरेको छ । पार्टीले २९ मंसिरमा गरेको प्रदर्शनको समिक्षा समेत आजको बैठकमा भएको छ । यता, सरकारले भने अध्यादेश फिर्ता गर्न पार्टीमा सहमति गरेको छ ।