काठमाडौं । प्रवर्तन निर्देशनालय (ईडी)को टोलीले दिल्लीका मुख्यमन्त्री अरविन्द केजरीवाललाई पक्राउ गरेसँगै भारतमा हंगामा सुरु भएको छ । विपक्षी दलले निर्वाचनको अगाडी भएको यो गिरफतारीलाई राजनीतिक दाउपेचका रुपमा सरकारको आलोचना गरेका छन् । केन्द्रीय वित्त मन्त्रालय, राजश्व विभाग मातहतको ईडीको टोली बिहीबार मुख्यमन्त्रीको घरमा पुगेको थियो ।
दुई घन्टा लामो सोधपुछपछि उनलाई पक्राउ गरिएको भारतीय सञ्चारमाध्यमहरुले जनाएका छन् । दिल्ली सरकारकी मन्त्री एवं आम आदमी पार्टीकी नेता आतिशीले केजरीवालको गिरफ्तारी बीजेपी र प्रधानमन्त्री नरेन्द्र मोदीको राजनीतिक षड्यन्त्र भएको बताइन् ।
उनले भनिन्, प्रधाानमन्त्री मोदीलाई कुनै एक नेताको डर छ भने उनी अरविन्द केजरीवाल हुन् ।’ दिल्लीको मदिरा नीतिलाई लिएर ईडीले केजरीवालमाथि छानबिन गर्दै आएको छ । भारतीय कंग्रेसका पूर्वअध्यक्ष राहुल गान्धीले मोदीले भारतलाई मुद्रा लोकतन्त्रमा रुपान्तण गर्न खोजेको आरोप लगाएका छन् । मोदी डराइरहेको समेत उनको भनाई छ ।