काठमाडौं । संयुक्त राष्ट्रसंघको पहलमा शुरु भएको कोभ्याक्स कार्यक्रममार्फत अहिले विश्वका गरिब तथा कम आयस्रोत भएका मुलुकमा कोरोना भाइरस विरुद्धको खोप पठाउन थालिएको छ । यसै क्रममा विश्वका २० देशमा कोभ्याक्सको कार्यक्रम अनुसारका २ करोड डोज खोप पठाइएको विश्व स्वास्थ्य संगठनले जनाएको छ ।
यो कार्यक्रमबाट अनुदानमा मुलुकहरुलाई खोप दिइने भएको छ । खोप पहिलो चरणमा अफ्रिकी मुलुकमा पठाइएको छ । अनुदानको खोप वितरण गर्ने कार्यक्रम घानाबाट प्रारम्भ गरिएको थियो । संगठनका अनुसार आगामी सातासमेत खोप वितरण जारी रहनेछ । स्वास्थ्य तथा जनसंख्या मन्त्रालयका अनुसार नेपालमा समेत कोभ्यास कार्यक्रमको अनुदानको १० लाख डोज खोप आइतबार आउँदैछ ।