काठमाडौं । श्रम, रोजगार तथा सामाजिक सुरक्षा सचिव केवलप्रसाद भण्डारीले खाडी लगायत विभिन्न मुलुकहरूमा फ्रि भिसा फ्रि टिकटमा नेपाली श्रमिकहरू पठाउन नसकिने बताएका छन्। आइतबार काठमाडौंमा मन्त्रालयले आयोजना गरेको कार्यक्रममा सचिव भण्डारीले सरकारले कार्यान्वयनका लागि काम गरेको तर सम्भव नभएको बताए।
‘स्वास्थ्य परीक्षण प्रक्रियाकै लागि लगभग १२ हजार खर्च हुने रहेछ। अनि कसरी १० हजारमा पठाउन सकिन्छ,’ उनले भने, ‘श्रमिकहरूको एक महिनाको पारिश्रमिक बराबर सेवाशुल्क म्यानपावरले लिन पाउने गरी हामी छलफल गर्दैछौं।’ सीपयुक्त श्रमिकबाट फरक सेवाशुल्क लिनसक्ने गरी पनि छलफल भइरहेको उनले बताए। सरकारले २०७२ सालमै खाडीका सबै मुलुक तथा मलेसियामा फ्रि भिसा फ्रि टिकटमा नेपाली श्रमिकहरू जान पाउने घोषणा गरेको छ। तर कार्यान्वयनमा आउन सकेको छैन।