काठमाडौं । गैरआवासी नेपालीले एक हजार डलरमा नेपाली बैंकमा विदेशी मुद्रामा खाता खोल्न सक्ने प्रावधान कार्यान्वयनमा आएको छ छ । यस अघि डलर खाता खोल्न न्यूनतम ५ हजार डलर वा सो बराबरको रकम चाहिन्थ्यो । बुधबार राष्ट्र बैंकले बैंकहरुका लागि परिपत्र जारी गर्दै यस्तो व्यवस्था भएको जनाएको हो । विदेशी मुद्रा सञ्चितिको अवस्था नाजुक बनेका बेला गरिएको यो व्यवस्थाले देशको अर्थतन्त्र र गैरआवासीय नेपालीहरु दुवैलाई फाइदा हुने राष्ट्र बैंकको विश्वास छ ।
यो दीर्घकालिन महत्वको निर्णय भएको समेत राष्ट्र बैंकको भनाई छ । चालु आर्थिक वर्षको दोस्रो त्रैमासको मौद्रिक नीतिको समीक्षा गर्दै राष्ट्र बैंकले विदेशी मुद्रामा खोलिने खातालाई केही सहजता प्रदान गर्ने नीति ल्याएको थियो । गैरआवासीय नेपालीको नाममा खाता खोल्दा तथा सञ्चालन गर्दा नेपाल सरकारको सम्बन्धित निकायबाट जारी भएको गैरआवासीय नेपालीको अद्यावधिक परिचय पत्रको प्रतिलिपि पेश गरे पुग्ने छ ।