काठमाण्डौ
बेलाबेलामा चर्चामा आउने नायिका आँचल शर्मा दवाडी विवाहको अन्तिम तयारीमा छन् । मंसिरको अन्तिम हप्ता उनले विवाह गर्ने तयारी गरेकी छन् । डा. उदीप श्रेष्ठसँग उनले घरजम गर्न लागेकी हुन् । यी दुई एक वर्षदेखि प्रेममा रहेको उनी निकटहरुले बताएका छन् । दुवैतर्फको परिवारसमेत सहमत भएकाले यही मंसिरमा उनले घरजम गर्ने लगभग निश्चित भएको हो ।
नायक पल शाहसँग नाम जोडिएर पटक–पटक चर्चामा आएकी नायिका आँचलले अन्ततः एक चिकित्सकसँग विवाह गर्ने निश्चित भएको छ । चलचित्र नाई नभन्नु ल–४ बाट आफ्नो करियर शुरु गरेकी नायिका आँचलले जोनी जेन्टलम्यान र शत्रु गतेमा राम्रो अभिनय गरिन् । काठमाडौंमा सन् १९९५ मार्च १८ मा जन्मेकी आँचल दवाडी शर्माले काठमाडौं इन्टरनेशनल कलेजमा अध्ययन गरेकी थिइन् ।
चलचित्र क्षेत्रमा प्रवेश गर्नुपूर्व उनले मोडलिङ क्षेत्रमा काम गरेकी थिइन् । त्यति मात्र नभएर उनी भिजे समेत हुन । सन् २०१६ देखि उनले चलचित्र क्षेत्रमा चर्चा बटुलेकी छन् । आफ्नो शारीरिक बनावटबाट उनी निकै सन्तुष्ट छन् । आफूलाई ऐनामा हेर्दा खुसी र सुन्दर लाग्ने उनको अनुभव छ । तर, कान ठूलो भएकाले उनलाई कहिले काँही चित्त दुख्छ । रुने कुरामा भने उनलाई कसैले जित्न गाह्रो हुन्छ । ससाना कुरामा पनि रुन मन पर्छ ।