काठमाडौं । फ्रान्सका फरवार्ड करिम बेन्जेमाले अन्तर्राष्ट्रिय फुटबलबाट सन्यासको घोषणा गरेका छन् । आइतबार कतारमा सम्पन्न फिफा विश्वकप फुटबलको फाइनलमा उनको मुलुक अर्जेन्टिनासँग पराजित भएको छ । मंगलबार आफ्नो ३५ औं जन्मदिन मनाइरहेका बेन्जेमाले अन्तर्राष्ट्रिय फुटबलबाट सन्यासको घोषणा गरेको सामाजिक सञ्जालमा लेखेका छन् । तिघ्रामा चोट बोकेका बेन्जेमाले फ्रान्सको टोलीमा रहे पनि विश्वकप गुमाए ।
ब्ल्याकमेलिङ काण्डमा फसेपछि उनले २०१६ देखि २०२१ सम्म अर्थात झन्डै ५ वर्ष प्रतिबन्ध भोगे । बेन्जेमा फ्रान्सका लागि ९७ क्याप जित्दा ३७ अन्तर्राष्ट्रिय गोलसहित फ्रान्सको सर्वकालीन गोलकर्ताको सूचीमा पाँचौं स्थानमा रहेका छन् ।‘म आज जुन स्थानमा छु, यसका लागि मैले गरेका प्रयासहरुमा मलाई गर्व छ। यसक्रममा गल्तीहरू पनि भएका छन्’, उनले सामाजिक सञ्जालमा भनेका छन्, ‘ यस क्रममा मैले मेरो कथा लेखेको छु र हाम्रो अन्त्य हुँदैछ।’ उनले सन् २००७ मा डेब्यु गरेका थिए । फ्रान्सका लागि ९७ खेल खेलेका उनले ३७ गोल गरेका छन्।