जाजरकोट । जाजरकोटमा बस दुर्घटनामा परि कम्तिमा ५ जनाको मृत्यु भएको छ । प्रहरीका अनुसार २५ जना घाइते छन् । नेपालगञ्जबाट जाजरकोटको कालीमाटीतर्फ जाँदै गरेको ना ६ख २७५७ नम्बरको बस आज बिहान साढे २ बजेतिर जाजरकोटको भेरी नगरपालिका १३ बराहचौर भन्ने स्थानमा दुर्घटना भएको प्रहरी जनाएको छ ।
दुर्घटनामा दुई जना पुरुष, दुई जना महिला र एक बालिकाको मृत्यु भएको छ । उनीहरुको पहिचान भइसकेको छैन । दुर्घटनामा घाइतेहरुमध्ये तीन जनाको अवस्था गम्भीर रहेको बताइएको छ । उनीहरुको जिल्ला अस्पताल जाजरकोटमा उपचार जारी छ । बस सडकबाट करीब दुई सय मिटर तल खसेको छ । चालकलाई प्रहरीले नियन्त्रणमा लिएको छ ।