काठमाडौं । जेल मुक्त भएसँगै बिकिनी किलरका नामबाट संसारभर कुख्यात चार्ल्स शोभराज नेपालबाट निकाशनमा परेका छन् । उनलाई नेपाल सरकारले डिपोर्ट गरी फ्रान्स पठाएको हो । नेपालमा उनले ५० हजार जरिवाना तिरेका छन् । साथै उनी अब १० वर्ष नेपाल आउन पाउने छैनन् । उनी कतार एयरवेजको जहाज चढेर फ्रान्स लागेका हुन् ।
विमानस्थलसम्म उनलाई कढा सुरक्षाका बीच पुर्याइएको थियो । उनले आफ्नो अनुहार सञ्चारमाध्यमले खिच्न नपाउन भन्ने चाहना राखेका थिए । यो चाहना उनले पुरा गरेका छन् । कतार एयरवेजमार्फत डिपोर्ट भएका उनी साढे ४ घन्टा दोहामा ट्रान्जिट बसेर पेरिस उड्ने छन् । उनी फ्रान्सको समय अनुसार शनिबार बिहान ६ः३५ बजे पेरिसमा उत्रने छन् । उनले नेपालमा १९ वर्ष जेल जिवन बिताएका छन् । जन्मकैदको सजाय पाएर थुनामा रहेका चार्ल्स शोभराधलाई सर्वोच्च अदालतले बुधबार थुनामुक्त गर्ने आदेश दियो ।
अदालतबाट थुनामुक्त गर्ने आदेश आए लगत्तै उनले केही दिन नेपालमै बस्न चाहेको बताएर त्यसको वातावरण बनाउन कारागार प्रशासनलाई आग्रह गरेका थिए । अदालतले पनि उनलाई १५ दिन भित्र स्वदेश फर्काउन आदेश दिएको थियो । तर उनको त्यो आग्रह नमानी अध्यागन विभागले शुक्रबार नै उनलाई फ्रान्स डिपोर्ट गरेको छ ।