टोकियो ओलम्पिक : जुडोकी सोनिया पराजित

टोकियो । जापानमा जारी ओलम्पिकमा आज प्रतिस्पर्धामा उत्रिएका दुबै नेपाली खेलाडी पराजित भएका छन् । नेपालकी जुडो खेलाडी सोनिया भट्ट पहिलो चरणमै पराजित भइन् । शनिबार सम्पन्न खेलमा राउण्ड अफ ३२ अन्तर्गत महिलाको ४८ केजी तौल समूहमा उनी रुसी खेलाडी इरिना डोल्गोभासँग हारेकी हुन् । इरिना विश्व वरीयताको नवौं स्थानमा छिन् । सोनिया १ मिनेट १६ सेकेण्डमै पराजित भएकी हुन् । १९ वर्षीय सोनिया वाइल्डकार्ड मार्फत ओलम्पिकमा छनोट भएकी हुन् । इरिना फाइनल पुगेको अवस्थामा सोनियाले पुनः एक पटक प्रतिस्पर्धा गर्न पाउने सम्भावना भने जिवित छ । सोनियाले २०७६ को १३औं दक्षिण एसियाली खेलकुद सागमा महिला ४८ केजीमुनि कास्य जितेकी हुन् ।