काठमाडौं । डा. बाबुराम भट्टराई वर्तमान पार्टीहरुमध्ये आफ्नो माउ पार्टी माओवादी केन्द्रको चर्को आलोचक बनिसकेका थिए । नयाँ युगका लागि पुरानो पार्टीको काम छैन भन्ने निष्कर्षसहित ७ वर्षअघि तत्कालीन नेकपा एकीकृत माओवादी परित्याग गरेका उनी आगामी निर्वाचनमा भने माओवादीको चुनाव चिन्हबाट निर्वाचनमा जान तयार भएका छन् ।
नयाँ संविधान बनेलगत्तै उनले पार्टी परित्याग गरेका थिए । ६ वर्ष अगाडी नयाँ शक्ति पार्टी गठन नै गरेका थिए । त्यसपछि उनी सोही पार्टीका माध्यमबाट संघ र प्रदेशसभाको पहिलो चुनावमा गए । तर, सफलता भएनन् ।
आइतबार बिहान नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँगको भेटपछि भट्टराई माओवादीको चुनाव चिह्न गोलाकारभित्रको हसियाँ हतौडामै चुनाव लड्न तयार भएसँगै उनको नयाँ यात्रा पुरानै धारमा फर्किएको हो । यसलाई कतिपयले राजनीतिक थकान भनेका छन् भने कतिपयले चुनावी रणनीति भएको बताएका छन् । यी पार्टीबीचको मौखिक सहमतिलाई सोमबार औपचारिकता दिने तयारी छ ।