काठमाडौं । पाँचथरको फिदिम नगरपालिका–८ घुमाउनेटारमा एक घरमा लागेको आगलागीमा दुई जनाको मृत्यु भएको छ । प्रहरीका अनुसार मेखबहादुर गुरुङको घरमा गएराति साढे १ बजे आगलागी हुँदा मेखबहादुरका २२ वर्षीया छोरी ममता गुरुङ र २३ वर्षीया बुहारी आसाङसिंह थेबेको ज्यान गएको हो ।
जिल्ला प्रहरी कार्यालय पाँचथरका अनुसार आगोमा जलेर ५५ वर्षीय मेखबहादुर गुरुङ र उनका छोरा विजेन्द्र घाइते छन् । उनीहरुको अवस्था सामान्य छ । घरमा ७ जना सुतेकोमा २ जनाको मृत्यु भएको हो । आगो लागेर टिनको छानो भएको तीन तले घर पूर्णरुपमा क्षतिग्रस्त भएको बताइएको छ । आगलागीको कारण खुलेको छैन ।