काठमाडौं । फिफाले द बेस्ट फिफा पुरूष वर्ष खेलाडी अवार्डका लागि मनोनित अन्तिम तीन जनाको नाम सार्वजनिक गरेको छ । पुरूषतर्फको फिफा वर्ष खेलाडीको मनोनयनमा अर्जेन्टिना तथा पीएसजीका फरवार्ड लियोनेल मेसी, पोल्याण्ड तथा बार्यन म्युनिखका रोबर्ट लेवान्डोस्की र इजिप्ट तथा लिभरपुलका मोहम्मद सलाह परेका छन् । अन्तिम तीनमा क्रिस्टियानो रोनाल्डो, केलियन एम्बाप्पेजस्ता स्टार भने अटाएनन् ।
मेसी २०२१ को बालोन डे’ओरको उपाधि विजेता समेत हुन् । लेवान्डोस्की दोस्रो र सलाह सातौं स्थानमा थिए। फिफाको महिलातर्फको उत्कृष्ट खेलाडीमा स्पेन तथा बार्सिलोनाका जेनिभर हर्मोसो र एलेक्सिया पुटेलास र अष्ट्रेलिया तथा चेल्सीकी साम केर मनोनयनमा परेका छन्। फिफासँग आबद्ध विश्वका प्रत्येक राष्ट्रिय टोलीको कप्तान र प्रशिक्षकले वर्षको उत्कृष्ट खेलाडीको लागि अंक दिन पाउँछन्। जनवरी १७ मा फिफा वर्ष खेलाडीको घोषणा हुनेछ।