बुटवल । बुटवलमा सवारी दुर्घटनामा परि दुई जनाको मृत्यु भएको छ। प्रहरीका अनुसार गत राती एम्बुलेन्स र मोटरसाइकल एक आपसमा ठोक्किएर भएको दुर्घटनामा दुई जनाको ज्यान गएको हो । लुम्बिनी प्रदेश ट्राफिक प्रहरी कार्यालयका अनुसार पश्चिमबाट बुटवलतर्फ आइरहेको लु १ झ २८७ नम्बरको एम्बुलेन्स र बुटवलबाट पश्चिमतर्फ गइरहेको लु २४ प ३९८७ नम्बरको मोटरसाइकल बुटवल उपमहानगरपालिका वडा नम्बर १२ तामनगरमा ठोक्किएका हुन् ।
दुर्घटनामा मोटरसाइकल चालक गुल्मी घर भई तिलोत्तमा नगरपालिका ३ बस्ने २४ वर्षीय अनमोल थापा र मोटरसाइकलको पछाडी बसेका सैनामैना ४ का ३५ वर्षीय निशान क्षेत्रीको मृत्यु भएको छ । दुर्घटनामा गम्भिर घाइते भएका थापा र क्षेत्रीको उपचारको क्रममा गए राति सवा १ बजेतिर अस्पतालमा मृत्यु भएको प्रहरीको भनाई छ । एम्बुलेन्स चालक गैंडहवा गाउँपालिका ६ का ३६ वर्षीय सुरेन्द्र मुराउ समेत घाइते छन् । उनको बुटवलमा उपचार भइरहेको छ ।