२८ भदौ, काठमाडौं । रास्वपा सभापति रवि लामिछाने नख्खु कारागार फर्किएका छन् । जिल्ला प्रहरी परिसर, ललितपुरका अनुसार रवि लामिछने कारागार पुगेका छन् । उनले आज एक भिडियो राख्दै आज कारागार फर्कन लागेको बताए थिए । आज उनको जन्मदिन समेत हो । जेन–जीको अगुवाईमा भएको आन्दोलनपछिको प्रदर्शन भड्किएपछि फैलिएको हिंसाले उग्र रूप लिएपछि उनी कारागारबाट भदौ २४ मा निस्किएका हुन् ।
कारागार प्रशासनले कैदीबन्दीलाई कारागार फिर्ता हुन अपिल गरेको थियो । त्यसपछि लामिछाने शनिबार साँझ कारागार पुगेका छन् । यसअघि लामिछानेका कारण अन्य कैदी हौसिएको भन्दै उनको व्यापक आलोचना भएको थियो । देशभरीबाट १३ हजार भन्दा बढी कैदी भागेका थिए । अहिले कैदीहरु स्वतः फर्कने र पक्राउ गर्ने क्रम जारी छ ।