काठमाडौं । बिजनेस भिसा लिन अब अध्यागमन विभाग जान नपर्ने भएको छ । अध्यागमन विभागका महानिर्देशक रूद्रसिंह तामाङका अनुसार विभागले उद्योग विभाग अन्तर्गत रहेको एकल विन्दु सेवा केन्द्रबाट सेवाग्राहीले बिजनेस भिसा प्राप्त गर्ने व्यवस्था मिलाएको छ । बिजनेस भिसामा जानेहरूले उद्योग विभागमा इन्ट्री गरेपछि त्यहीँबाट अनलाइनमार्फत अध्यागमन कार्यालयले विवरण प्राप्त गर्ने र डकुमेन्टका आधारमा अनलाइनबाटै भिसा जारी हुने व्यवस्था गरिएको महानिर्देशक तामाङले बताए ।
यो सेवा माघ २ गतेदेखि नै सुरू भएको र यसले विभागमा इन्ट्री गरेपछि अध्यागमन गएर स्वीकृत गरी फेरि विभागमै जानुपर्ने अवस्थाको अन्त्य भएको उनले बताए । अब डकुमेन्ट भेरिफाइ गर्नुपरेको खण्डमा मात्र अध्यागमन कार्यालय जानुपर्ने महानिर्देशक तामाङले जानकारी दिए।
विभागले चाँडै अनलाइन भुक्तानीको सुविधा पनि ल्याउन लागेको छ। त्यसका लागि मोबाइल एप्स बनाउने काम पनि अन्तिम चरणमा रहेको महानिर्देशक तामाङले बताए। अनलाइन भुक्तानीको प्रयोग सफल रहेमा नेपालमा पनि इ(भिसा सुरू गरिने उनले बताए। यसले नेपाल घुम्न आउने विदेशीहरूलाई धेरै सहज हुनेछ। यसबाट नेपाल आउने पर्यटकको संख्या वृद्धि गर्न पनि सघाउन पुग्ने महानिर्देशक तामाङको भनाई छ ।