काठमाडौं । संसद विघटन र यससँग जोडिएका विभिन्न मुद्दामा परेका रिटमाथि आजबाट सुनुवाई शुरु हुँदैछ । नेपाली कांग्रेसका सभापति शेरबहादुर देउवालाई बहुमत सांसदको समर्थन हुँदाहुँदै राष्ट्रपतिले प्रधानमन्त्री नियुक्त नगरि संसद विघटन गरेपछि सर्वोच्चमा रिट परेका छन् । सर्वोच्च अदालतमा आजदेखि १९ रिटमा सुनुवाइ हुँदैछ ।
शुक्रबार बाँकी ११ रिटको सुनुवाइ हुने कार्यक्रम छ । यी संवैधानिक बेञ्चमा सुनुवाइको माग गरिएका रिटको संख्या हो । १४६ जना सांसदसहित कांग्रेस सभापति देउवा समेत रिट लिएर सर्वोच्च पुगेका थिए। देउवालाई १४९ सांसदले गत शुक्रबार प्रधानमन्त्रीमा समर्थन गरेका थिए ।
तर दाबी नपुगेको भन्दै सरकारको सिफारिसमा सोही दिन राष्ट्रपतिबाट प्रतिनिधि सभा विघटन भएको छ । यो घटनापछि विपक्षी दलले सर्वोच्चको ढोका ढकढकाएको हो । सर्वोच्चमा प्रधानमन्त्रीमा केपी शर्मा ओलीलाई नै निरन्तरता दिनुपर्ने माग समेत गरेर रिट परेको छ ।