झापा । झापामा एक दम्पत्ति मृत फेला परेका छन् । झापाको चारआली जंगलमा उनीहरु मृत फेला परेको प्रहरीले बताएको छ । सोमबार दिउँसो पौने ३ बजे मेचीनगर नगरपालिका १३ चारआली जंगलमा दुई जनाको शव फेला परेको थियो। उनीहरू श्रीमान–श्रीमती भएको खुलेको जिल्ला प्रहरी कार्यालयका डिएसपी बसन्त पाठकलाई उदृत गर्दै सञ्चारमाध्यमले जनाएका छन् ।
मृतक अर्जुनधारा नगरपालिका(११ बस्ने ५२ वर्षीय नेत्रकुमार इङनिम लिम्बू र उनकी ४२ वर्षीया श्रीमती सञ्जु लिम्बू छन्। उनीहरू मंसिर २१ गतेपछि परिवारको सम्पर्कमा नभएको बताइएको छ । डिएसपी पाठकका अनुसार शव केही गलिसकेको पनि छ। एउटाको डोरी चुँडिएर भुइँमा खसेको अवस्थामा शव फेला परेको थियो। स्थानीयले दिउँसो दुई जनाको शव देखेपछि प्रहरीलाई खबर गरेका थिए। प्रहरीको प्रारम्भिक अनुसन्धानबाट उनीहरूले आत्महत्या गरेको देखिएको छ ।