काठमाडौं । नेपालमा बिहीबार ९ जना कोरोना भाइरसका संक्रमित थपिएका छन्। स्वास्थ्य तथा जनसंख्या मन्त्रायलका प्रवक्ता डा विकास देवकोटाले थप ९ जनामा कोरोना संक्रमण पुष्टि भएको जानकारी दिएका हुन्।
प्रवक्ता देवकोटाको अनुसार रुपन्देही १ र झापामा ८ जना थपिएका पुरूष उनीहरू सबै क्वारेन्टिनमा बसेका थिए।
संक्रमितहरू सबैको स्वास्थ्य अवस्था सामान्य रहेको र उनीहरू स्वास्थ्यकर्मीको सम्पर्कमा रहेको मन्त्रालयले जनाएको छ।
योसँगै नेपालमा कोरोना संक्रमितको संख्या ४५३ पुगेको छ।
काठमाडौं । नेपालमा कोरोनाभाइरसका कारण तेस्रो व्यक्तिको मृत्यु भएको छ।
स्वास्थ्य मन्त्रालयका प्रवक्ता विकास देवकोटाले दिएका जानकारी अनुसार रुपन्देहीको तिलोत्तमास्थित क्रिमसन अस्पतालमा उपचाररत गुल्मीका पहिलो कोरोना संक्रमित ४१ वर्षीय पुरुषको उपचारका क्रममा बिहिबार बिहान मृत्यु भएको हो ।
गुल्मीको मदाने गाउँपालिका पुर्कोटका उनी गएको जेठ १ गते ज्वरो आउने र रुघाखोकी लाग्ने समस्या देखिएपछि अस्पताल भर्ना भएका थिए।
क्रिमसन अस्पतालमा भर्ना हुनुभन्दा एक हप्ता पहिल्यैदेखि उनमा ज्वरो देखिएको थियो । उनले गाउँकै पुर्कोट दहस्थित मदाने पोलिक्लिनिकमा जाँच गराएका थिए ।
उनको भर्ना भएको दिनदेखि नै भेन्टिलेटरको सहायतामा उपचार भइरहको थियो।
योसँगै नेपालमा कोरोनाका कारण मृत्यु हुनेको सङ्ख्या ३ पुगेको छ।
यसअघि बाँकेको नरैनापुर गाउँपालिकाको एउटा क्वारेन्टाइनमा बसेका २४ वर्षका युवकको र सिन्धुपाल्चोकको एक सुत्केरी महिलाको मृत्यु भएको थियो ।
काठमाडौं । सरकारले अब काठमाडौं उपत्यकामा प्रवेश झन कडाई गर्ने भएको छ । गृह मन्त्रालयले काठमाडौं उपत्यकामा मानिसहरुको प्रवेश बढ्दा बढी जनघनत्व भएको क्षेत्रमा जोखिम भएको घभन्दै अत्यावश्यक कामबाहेक काठमाडौं छिर्न रोक लगाएको छ ।
अब कुनै मानिस काठमाडौं जान हिडेको भए उसलाई स्रोतमै रोक्ने निर्णय गृह मन्त्रालयले गरेको छ । अब काठमाडौं आउनै पर्ने भए हरेक मानिसले आफ्नो आरडीटी परीक्षण आफ्नै खर्चमा गरी त्यसको रिपोर्ट देखाउनु पर्ने भएको छ ।
काठमाडौं उपत्यकाभित्र अब स्थानीय तहले होटेल तथा स्कूलहरुलाई क्वारेन्टाइन बनाउन सक्नेछन् । त्यसको अध्ययन गर्न समेत गृहले निर्देशन दिएको छ । अब काठमाडौं उपत्यकामा लुकिछपी प्रवेश गरेमा लगत राखी कारवाही हुने भएको छ ।
काठमाडौं उत्पकाका स्थानीय तहका प्रमुख, सुरक्षा निकायका प्रमुखसहित सरोकारवालाको बैठकले यस्तो निर्णय गरेको हो । काठमाडौं उत्पकायमा पछिल्लो समय संक्रमितको संख्या बढ्दो क्रममा रहेको छ ।
काठमाडौं । विश्वभर कोरोना भाइरस संक्रमितको संख्या ५० लाख नाघेको छ ।
बिहिबार बिहानसम्मको आङ्कडा अनुसार ५० लाख ७९ हजार ८९५ जना संक्रमित भएका छन् । महामारीबाट विश्वभर ३ लाख २९ हजार १८० जनाको मृत्यु भएको छ ।
२० लाख १९ हजार ९४५ जना संक्रमण मुक्त भएका छन् । बितेको २४ घण्टामा ४ हजार ६२६ जनाले ज्यान गुमाएका छन् भने ९६ हजार ९५८ जनामा संक्रमण पुष्टि भएको छ ।
२७ लाख ३० हजार ७७० जनाको उपचार भइरहेको छ । उपचारारत मध्ये ४५ हजार ७९८ जनाको अवस्था गम्भीर छ । नेपालमा ४४४ जनामा कोरोना देखिएको छ । ४५ जना निको भएका छन । दुई जनाको ज्यान गएको छ ।
काठमाडौं । बिहिवार काठमाडौं उपत्यका र दार्चुला केन्द्रबिन्दु भएर छुट्टाछुट्टै समयमा भुकम्पको झट्का महसुस गरिएको छ । भक्तपुर केन्द्रविन्दु भएर ३.४ रेक्टर स्केलको भूकम्प गएको राष्ट्रिय भूकम्प मापन केन्द्रले जनाएको छ । बिहीबार बिहान ८ बजेर १४ मिनेटमा भूकम्प गएको हो ।भूकम्पको केन्द्रविन्दु अनन्तलिंगेश्वर आसपास रहेको छ ।
बिहिवार नै बिहान २ बजेर ४१ मिनेट जाँदा दार्चुलाको उकु आसपास केन्द्रमा पनि भूकम्पको झट्का महसुस भएको राष्ट्रिय भूकम्प मापन केन्द्रले उल्लेख गरेको छ ।
काठमाडौं । नेपालमा बिहिवार १७ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयले बिहीबार बिहान जारी गरेको सूचना अनुसार बीपी कोइराला स्वास्थ्य विज्ञान प्रतिठान धरान र प्रादेशिक प्रयोगशाला विराटनगरमा गरिएको परीक्षणअनुसार नयाँ पुष्टि भएको हो ।
नयाँ संक्रमितहरु झापा कचनकवल गाउँपालिका वडा नम्बर ३, ६ र ८ निवासी १८, १८, १९, १९, २२, २३, २३, २५, २६, २६, २८, ३०, ३२, ३७, ४६ वर्षका पुरुषहरु छन्। त्यस्तै, धनकुटा निवासी ३४ वर्षीय पुरुष, सुनसरी, धरान उपमहानगरपालिका निवासी ५१ वर्षीया महिलामा पनि संक्रमण पुष्टि भएको छ।
यससँगै कुल संक्रमितको संख्या ४ सय ४४ पुगेको छ। त्यसमध्ये दुई जनाको ज्यान गएको छ । ४१ जना भने निको भइसकेका छन् ।
न्युयोर्क
कोरोना भाइरसको मारले विश्वका ६ करोड भन्दा धेरै मानिस अति गरिबीको चपेटामा पर्ने प्रक्षेपण विश्व बैंकले गरेको छ । अति गरिब मुलुकहरुलाई ऋण तथा अनुदान उपलब्ध गराउदै आएको विश्व बैंकले भनेको छ; ‘महामारीको कारण विश्वमा ठुलो असमानता हुनेछ भने सन् १९९८ पछि कै विश्वब्यापी गरिवी उत्पन्न हुने छ’ ।
विश्व बैंकले २० मे बुधबार प्रकाशित ब्लग पोस्टमा थप भनेको छ; ‘कोरोना महामारीका कारण विश्वका ४ देखि ६ करोड मानिसले गरिबिको सामना गर्ने छन् । जस मध्ये ४ करोड नब्बे लाख मानिसको अवस्था अति गरीबी हुने छ । उनीहरु १ डलर ९० सेन्ट भन्दा कम आम्दानीको भरमा जिबिकोपार्जन गर्न वाध्य हुने छन्’ ।
आप्रबासी कामदारका रुपमा विश्वभर कामका लागि गएका कामदारहरुले महामारीका कारण काम गुमाउने क्रम सुरु भएको र ती कामदारहरुले घर पठाउने रेमिट्यान्समा झन्डै २० प्रतिशत अर्थात एक सय अर्ब डलर कम हुने समेत विश्व बैंकको प्रक्षेपण छ । विश्व बैंकले अफ्रिकाका ३९ देशहरुका दुई करोड ३० लाख, दक्षिण एसियाका भारत, चीन लगायतका करिव १ करोड ६० लाख मानिस अति गरीब हुने प्रक्षेपण गरेको छ । विश्व बैंकले हालै सय वटा बिकासोन्मुख देशहरुलाई कोरोना बिरुद्धको लडाईंका लागि १६० अर्ब अमेरिकी डलर अनुदान सहयोग दिएको छ ।
(विश्व बैकको ब्लग पोस्ट अनुसार तयार पारिएको रिपोर्ट)
काठमाडौं
नेपालमा भूमिव्यवस्था, सहकारी विकास र गरिवी निवारण मन्त्री पदमा अर्यालले हालै मन्त्री परिषदद्वारा पास गरिएको नेपालको नयाँ नक्सा सार्वजनिक गरेकै दिन भारतले नेपालको त्यो राजनीतिक नक्सा नस्विकार्ने बताएको छ । नेपालले सीमा सम्बन्धि विवाद कुटनीतिक वार्ताबाट समाधान गर्ने द्विपक्षीय सहमतिविरुद्ध कार्य गरेको भन्दै त्यस्तो प्रतिक्रिया जनाएको हो ।
भारतस्थित विदेश मन्त्रालयका प्रवक्ता अनुराग श्रीवास्तवले ती क्षेत्रहरू भारतीय भूभाग भएको समेत दाबी गरेका छन् । नेपाल सरकारले जारी गरेको नयाँ नक्साका बारेमा श्रीवास्तवले भनेका छन्; “यो एकतर्फी कार्य ऐतिहासिक तथ्य र प्रमाणमा आधारित छैन । नेपाल सरकारले आज नेपालको परिमार्जित नक्सा सार्वजनिक गरेको छ, जसमा भारतीय भूभागहरू पनि परेका छन्” नेपालले आफ्नो भूमिलाई कृत्रिम रूपमा विस्तार गरेको भन्दै श्रीवास्तवले भारतले त्यसलाई अस्वीकार गर्ने बताएका छन् ।
भारतले गत वर्ष आफ्नो नक्सामा कालापानी क्षेत्र देखाएपपछि नेपालमा त्यसको विरोध भएको थियो ।
यो विषयमा भारतको अडानबारे नेपाललाई राम्ररी थाहा भएको भन्दै उनले नेपाल सरकारलाई “नक्सा सम्बन्धि अनुचित दाबी नगर्न” र “भारतको स्वायत्तता र भौगोलिक अखण्डतालाई सम्मान” गर्न आह्वान गरेका छन् । मन्त्रिपरिषद्ले अनुमोदन गरेको दुई दिनपछि नेपाल सरकारले लिपुलेक, कालापानी र लिम्पियाधुरा समेटिएको नक्सा औपचारिक रूपमा सार्वजनिक गरेको हो ।
काठमाडौंमा नक्सा सार्वजनिक गर्दै भूमिव्यवस्था, सहकारी विकास र गरिवी निवारण मन्त्री पदमा अर्यालले “ऐतिहासिक तथ्यले देखाएको सत्यको आडमा” पहिले छुटेको नेपाली भूमि समेटिएको बताएकी थिइन्।
काठमाडौं । अभिनेत्री मनिषा कोइरालाले नेपालले जारी गरेको नयाँ नक्सालाई समर्थन गरिन् । यसको विरुद्ध भारतीय मिडिया तल्लो स्तरमा झरेर उनको आलोचनामा लागेको छ । भारतका ठुला र चर्चित भनिएका एबिपी न्युजसहितका मिडियाले भारतको नुन खाएर चीनको समर्थन गरेको भन्दै उनी विरुद्ध लागेका हुन् ।
मनिषाले नेपालका परराष्ट्र मन्त्री प्रदीप ज्ञवालीको नक्सासम्बन्धित टुइटमा कोट गर्दै यो कदमलाइ स्वागतयोग्य भनेकी थिइन् । साथै, उनले यो मामलाले नेपाल, भारत र चीनको सम्बन्धमा कुनै असर गर्न नहुने उल्लेख गरेकी छिन् ।
भारतीय मिडियाले तीन क्षेत्र कालापानी, लिपुलेक र लिम्पियाधुरालाई भारतकै भुमी दावी समेत गरेका छन् । यता नेपालले भने ती क्षेत्र भारतले अतिक्रमण गरेको भन्दै यसलाइ नेपालको नक्सामा राखिसकेको छ । लिम्पियाधुरासहित ३३५ वर्ग किलोमिटर भूमि समेटिएको नक्सा सरकारले आज जारी गरेको छ ।
नेपालले चीनको उक्साहटमा नयाँ नक्सा जारी गरेको भारतिय मिडियाको दावी छ । मनिषा कोइराला नेपाली चेली हुन् । उनी बलिउडमा लामो समय राज गर्न सफल अभिनेत्री हुन ।
काठमाडौं । सरकारले नेपालमा हवाई उडान माथिको प्रतिवन्ध जेठ मसान्तसम्म लम्ब्याएको छ । बुधबार बसेको कोभिड १९ सङ्ग सम्बन्धित उच्चस्तरीय समितिले यस्तो निर्णय गरेको हो । यसअघि १८ जेठसम्म उडानमाथि प्रतिवन्ध थियो ।
नेपालमा जेठ २० सम्म लकडाउन जारी छ । पछिल्लो दिनमा लकडाउन कडा गरिएको छ । हरेक दिन औसत ५० भन्दा बढी कोरोनाका बिरामी देखिएको सन्दर्भमा नेपालले अन्तर्राष्ट्रिय र आन्तरिक हवाइ उडान निरन्तर रोकिरहेको छ ।
काठमाडौं । नेपालमा थप २५ जनामा कोरोनाको संक्रमण देखिएको छ।
स्वास्थ्य मन्त्रालयका अनुसार बाँकेमा ६ जना पुरुष, धनकुटामा ५ जना , नवलपरासी १ पुरुष मा संक्रमण देखिएको हो। यस्तै कपिलवस्तुमा १३ जनामा संक्रमण पुष्टि भएको छ।
संक्रमितमध्ये ७ महिला र १८ पुरुष रहेका छन्। ३ वर्षीया बालकमा पनि संक्रमण पुष्टि भएको छ।
यो सहित नेपालमा संक्रमितको संख्या ४२७ पुगेको छ। देवकोटाका अनुसार संक्रमण देखिएकाहरु स्वास्थ्यकर्मीको सम्पर्कमा रहेका छन्। कुल संक्रमित मध्ये ३५८ पुरुष र ६९ जना महिला छन्।
नेपालमा हालसम्म कोरोनाका कारण २ जनाको मृत्यु भएको छ। ४५ जना उपचारपछि निको भएका छन्।
काठमाडौं । सरकारले नेपालको नयाँ राजनीतिक नक्सा सार्वजनिक गरेको छ । बुधबार भूमिसुधार मन्त्री पद्मा अर्यालले नयाँ नक्सा सार्वजनिक गरेकी हुन् ।
उनले नीति तथा कार्यक्रममा उल्लेख भएको एक साता नबित्दै सरकारले नक्सा सार्वजनिक गरेको उल्लेख गरिन् ।
सबैको साझा प्रयासबाटै यसमा सफलता मिलेको उनको भनाई छ । उनका अनुसार अब नेपालको औपचारिक प्रयोगमा यही नक्सा प्रयोगमा आउने भएको छ । सरकारले विवादित भूमिलाई नेपालमा समेटेर नयाँ नक्सा ल्याएको हो ।
नयाँ नक्सामा अन्तर्राष्ट्रिय सिमानामा खासगरी पश्चिम उत्तरी क्षेत्रमा रहेको लिम्पियाधुरा, लिपुलेक र कालापानी क्षेत्र समेटिएको छ भने यो नक्सामा सङ्घीयताअनुरुप प्रदेश र स्थानीय तह पनि समेटिएको छ ।
नेपालले नयाँ राजनितिक नक्सा पारित गरेसँगै नेपालको क्षेत्रफल पनि बढ्ने भएको छ। अहिलेसम्म नेपालको क्षेत्रफल १ लाख ४७ हजार १ सय ८१ वर्ग किलोमिटर छ। अबको नक्सामा ३ सय ३५ वर्ग किलोमिटर बढ्ने बताइएको छ।
काठमाडौं । विराटनगरस्थित कोशी कोरोना विशेष अस्पतालमा उपचार गराइरहेका थप आठ जना संक्रमित आज डिस्चार्ज भएका छन ।
लगातार दुई पटकको स्वाब परिक्षण रिपोर्ट नेगेटिभ आएपछि उनीहरुलाई डिस्चार्ज गरिएको हो ।
डिस्चार्ज हुनेमा पाँच जना भारतीय जमाति र तीन जना उदयपुरका बासिन्दा छन । उनीहरु सबैलाई भुल्केमा संक्रमण पुष्टि भएको थियो । यो सँगै कोशी अस्पतालवाट निको भएर फर्कनेको संख्या २६ पुगेको छ । ५४ जना संक्रमितहरुमध्ये ५४ जनाको अहिले अस्पतालमा उपचार भइरहेको छ ।
काठमाडौं । सरकारले दुई दिन अगाडी मन्त्रिपरिषद्बाट पास गरेको नेपालको नक्सा आज सार्वजनिक गरिने भएको छ ।
भूमिसुधार मन्त्रालयले आज औपचारिक कार्यक्रममार्फत नयाँ नक्सा सार्वजनिक गर्न लागेको हो । यसअघि सरकारले निर्णय गरेपनि नक्सा सार्वजनिक नगरेको भन्दै संसदमा प्रश्न उठेको थियो ।
मन्त्रालयले मन्त्रिपरिषद्को निर्णय मूख्यसचिवबाट प्रमाणिकरण गरेसँगै आज सार्वजनिक गर्न लागिएको हो । सरकारले भारतीय अतिक्रमणमा परेको लिम्पुवाधुरा, कालापानीसहितका क्षेत्र समेटेर नयाँ नक्सा सार्वजनिक गर्न लागेको हो ।
काठमाडौं । कोरोना भाइरसको सङ्क्रमणको जोखिम रहेको भन्दै नेपालमा सबैभन्दा धेरै पेट्रोलियम पदार्थ आउने अमलेखगञ्ज डिपो बन्द गर्न स्थानीयले माग गरेका छन् ।
प्रदेश नम्बर २ स्थित नेपाल आयल निगमको अमलेखगञ्ज डिपो बन्द गर्न स्थानीयवासिन्दाले माग गरेका हुन् । यहाँ स्थानीयबाट अवरोध भएको भन्दै निगमले भने सरकारसँग सुरक्षा माग गरेको छ ।
निगमको प्रादेशिक कार्यालयल अमलेखगञ्जले बुधबार केही स्थानीबासीहरुले अवरोध सिर्जना गर्ने, धम्की दिने र बाहिरबाट आएका चालक तथा सह चालकहरुलाई समेत अवरोध गर्ने जस्ता कार्य गरेकोमा गम्भिर ध्यानाकर्षण भएको उल्लेख गरेको छ । निगमले आवश्यक सुरक्षा प्रबन्ध गरिदिन सरकारसँग माग गरेको हो ।
अमलेखगञ्ज देशभरीकै पेट्रोलियम पदार्थ माग धान्न सक्ने गरी बनाइएको पाइपलाईनको डिपो हो । यस्तो विषम् परिस्थितिमा पेट्रोलियम पदार्थको सहज आपूर्तिका लागि सहयोग गरिदिन समेत निगमले जनाएको छ ।
अमलेखगन्जबाट विराटनगर, भैरहवा, पोखरा र केन्दीय राजधानी काठमाडौंमा पेट्रोलियम पदार्थ वितरण हुन्छ ।
काठमाडौं । विदेशमा सङ्कटमा रहेका नेपालीलाई अब सरकारले क्रमश घर ल्याउने भएको छ । सरकारको तयारीअनुसार अहिलेकै अवस्थाबाट उद्धार प्रारम्भ गर्दा समेत सङ्कटमा रहेका नेपालीलाइ घर फर्काउन कम्तीमा तीन महिना लाग्ने देखिएको छ ।
क्राइसिस म्यानेजमेन्ट सेन्टर (सीसीएमसी) बाट कोभिड–१९ संक्रमण रोकथाम तथा नियन्त्रण उच्चस्तरीय समन्वय समितिमा प्रस्तुत विवरणअनुसार सङ्कटमा रहेका वा स्वच्छाले समेत हवाई मार्गबाट मात्र १० लाख नेपाली घर फर्कने अनुमान गरिएको छ । नेपालले दैनिक १० हजार मानिसलाइ हवाइ मार्गबाट उद्दार गर्न सक्ने अनुमान समेत गरिएको छ ।
समितिको बैठक मंगलबार बसेको थियो । बैठकमा विदेशमा अलपत्र परेका नेपालीहरुलाई स्वदेश ल्याउने सम्बन्धमा वृहत छलफल भएको थियो । नेपाल ल्याइसकेपछी पनि अनुशासनसहित क्वारेन्टाइनमा राख्ने तयारीमा समेत छलफल भएको थियो ।
सरकारले प्राथमिकताका आधारमा विदेशबाट नेपालीलाई घर फर्काउने निर्णय गरिसकेको छ । परराष्ट्र मन्त्रालयले गरेको तयारी अनुसार सबैभन्दा जोखिमपूर्ण अवस्थामा रहेका नेपालीलाई घर ल्याइदैछ । प्रधानमन्त्री केपि शर्मा ओलिले समेत मङ्गलबार क्रमश नेपालीलाई घर फर्काउने जानकारी गराएका थिए ।
भारत र तेस्रो मुलुक, सबै स्थानबाट घर फर्कने नेपालीलाई घर ल्याउने योजना छ ।
काठमाडौं । काठमाडौंमा ड्युटीमा खटिएका दुई प्रहरीमाथी कोरोना संक्रमण पुष्टि भएको छ।
महानगरीय प्रहरी वृत्त कालीमाटीमा कार्यरत दुई जना प्रहरीमा कोरोना भएको देखिएको पुष्टि भएको छ ।राजधानीमा प्रहरी नायव निरीक्षक( सई) र प्रहरी जवानमा कोरोना संक्रमण देखिएको वृत्तले पुष्टि गरेको छ ।
उनीहरु दुवैजना लकडाउनको समयमा फिल्डमा खटिएको बताइएको छ ।
यसअघि काठमाडौं र भक्तपुरमा समेत सशस्त्र प्रहरीका दुई जनामा कोरोना संक्रमण देखिएको छ । सङ्क्रमित सबैको अहिले अस्पतालमा उपचार जारी छ ।
महोत्तरीको बर्दिवास नगरपालिकाको किसान नगरमा अवस्थित मध्यपूर्वी पृतनाका पृतनापति ५२ वर्षीय उपरथी र सेनाका एमबीबीएस डाक्टरमा समेत शनिवार संक्रमण पुष्टि भएको छ ।
न्युयोर्क
बेलायतस्थित एक १०० वर्षीय दोश्रो विश्व युद्ध अनुभवी (भेटेरान) सेनाले आफ्नै घरको करेसामा घुमेर राष्ट्रिय स्वास्थ्य सेवा (नेशनल हेल्थ सर्भिस) का लागि ४० लाख अमेरिकी डलर (पचास करोड) नेपाली रुपैंया चन्दा संकलन गरेका छन् । गत अप्रिल ३० तारिखका दिन ९९ सय बर्ष पुरा गरी १०० बर्षमा प्रबेश गरेका दोश्रो विश्व युद्धका अनुभबी क्याप्टेन टम मोरले दक्षिण पूर्वी बेलायतको बेड्फोर्डशरस्थित आफ्नै निवासको करेसामा वाकरको सहायताले घुमेर कोरोना महामारीको समयमा राष्ट्रिय स्वास्थ सेवाको लागि त्यति ठुलो रकम सहयोग संकलन गरेका हुन् । क्यापटेन मोरलाई बेलायती प्रधानमन्त्री बोरिस जोनसनले सम्मान समेत गरेका छन् । आफ्नो सैनिक जिन्दगीमा क्याप्टेन पदसम्म पदोन्नति भएका मोरलाई भर्खरै मात्र उनको सैनिक सेवाको लागि सम्मानित गर्दै उनलाई अनररी कर्णेल घोषणा गर्ने तयारी समेत गरिएको छ । उक्त सम्मानको लागि बेलायती प्रधानमन्त्रीले ब्यक्तिगत तवरमा मोरलाई असाधारण क्षमताका लागि बिशेष सम्मान गर्नु पर्ने सिफारिस महारानी एलिजाबेथलाई गरेको बेलायतस्थित संचार माध्यमहरुले जनाएका छन् ।
क्याप्टेन मोरले संकलन गरेको त्यति ठुलो रकमको बिषयमा प्रधानमन्त्री बोरिस जोनसनको कार्यालयले प्रेस बिज्ञप्ती जारी गर्दै भनेको छ; “मोरले यति ठुलो सहयोग संकलन गरेर अचम्मै पारेका छन् । उनको यो उदाहरणीय कार्यले सिंगो देशलाई हौसला बढेको छ । कोरोनाको कुहिरोमा आशाको किरण प्रबेश गरेको हामीले अनुभब गरेका छौं, उनी सच्चा राष्ट्रिय सम्पत्ति हुन्”।
क्याप्टेन मोरलाई कर्णेलको बिशेष सम्मानको सिफारिस महारानी एलिजाबेथले स्वीकृत गरी सकेकी छिन् । क्यापटेन मोरले सुरुमा आफ्नो १०० बर्षीय जन्मदिनको उपलक्षमा जम्मा १ हजार पाउन्ड (१२५७ अमेरिकी डलर ) चन्दा संकलन गर्ने योजनामा थिए तर उनलाई अप्रिलमा १ लाख २५ हजार वटा बर्थ डे कार्डको साथमा त्यति ठुलो रकम सहयोग प्राप्त भएको छ ।
एजेन्सीको सहयोगमा
काठमाडौं । कोरोनाको आशंकामा पछिल्लो २४ घण्टामा २ हजार २ सय ८० जनाको पिसिआरबाट नमूना परीक्षण भएको छ।
नेपालमा हालसम्म ३२ हजार ६ सय ४ जनाको पिसिआर परीक्षण भएको मन्त्रालयका प्रवक्ता डा. विकास देवकोटाले बताए। आरडीटी विधिबाट ७४ हजार ६ सय ४९ जनाको परीक्षण भएको छ।
प्रवक्ता देवकोटाका अनुसार २१ हजार ६ सय २३ जना क्वारेन्टाइनमा छन्। उपत्यकामा १७ र बाहिर ४४० गरेर आइसोलेसनमा ४ सय ५७ जनालाई राखिएको छ।
मंगलबार विराटनगरस्थित कोसी अस्पतालमा उपचार गराइरहेका झापाका ६२ वर्षीय पुरुष डिस्चार्ज भएका छन्। योसँगै डिस्चार्ज हुनेको संख्या ३७ पुगेको छ।
काठमाडौं । नेपालमा मङ्गलबार थप २७ जनामा कोरोना सङ्क्रमण पुष्टि भएको छ । स्वास्थ तथा जनसंख्या मन्त्रालयका अनुसार काठमाडौं उपत्यका भित्र तीन सहित देशभर २७ सङ्क्रमित थप भएका हुन् । पछिल्लो समय सरकारले कोरोना परिक्षण बढाएको छ । मङ्गलबार थपिएकामा भक्तपुर र ललितपुरमा एक एक जना छन् ।
स्वास्थ मन्त्रालयले मङ्गलबार बिहान पुष्टि भएका समेत व्यक्तिलाइ जोडेर एकमुस्ट आङ्कडा निकालेको हो । मन्त्रालयका अनुसार मङ्गलबार झापा, मोरङ, सुनसरी, मकवानपुर, रामेछाप, सिन्धुली, लमजुङ, नवलपरासी र कपिलवस्तुमा नया बिरामी भेटिएका हुन ।
काठमाडौं । प्रधानमन्त्री केपी शर्मा ओलीले अमेरिकी सहयोग मिलेनियम च्यालेन्ज कर्पोरेसन सम्झौता (एमसीसी) पास गर्ने कि नगर्ने संसदको विषय भएको बताएका छन् ।
मंगलबार प्रतिनिधिसभामा सरकारको नीति तथा कार्यक्रममा सांसदहरुले उठाएको प्रश्नको जवाफ दिने क्रममा प्रधानमन्त्री ओलीले उक्त कुरा बताएका हुन् ।
जवाफ दिने क्रममा प्रधानमन्त्री ओलीले भने एमसीसी सभामुखको टेबलमा आइसकेको छ, एमसीसी पास गर्ने कि नगर्ने संसदको निर्णय गर्छ ।
एमसीसी पास नभएपनि लप्सीफेदी/रातमाटे/हेटौंडा र दमौली/बुटवल ४०० केभी प्रशारण लाइन बनाइछाड्ने उनले बताए । एमसीसी सभामुखको टेबलमा आइसकेको छ, अब संसदले निर्णय गर्न सक्छ ।’
सरकारले जनतासँग कुनै छलछामको व्यवहार नदेखाई यथार्थ चित्रण देखाउने गरी सरकारको नीति तथा कार्यक्रम ल्याएको दावी गर्दै गर्दै एमसीसी पास नभएपनि ट्रान्समिसन लाईन भने बन्ने दाबी गरे ।
काठमाडौं । प्रधानमन्त्री केपी शर्मा ओलीले नेपालको भूमी मिचेको भन्दै भारतलाई उसको राष्ट्रिय नारामाथि प्रश्न उठाएका छन् ।
प्रतिनिधिसभामा सरकारको नीति तथा कार्यक्रममा सांसदहरुले उठाएको प्रश्नको जवाफ दिने क्रममा प्रधानमन्त्री ओलीले लिम्पियाधुरा, कालापानी र लिपुलेकको विषय प्रधानमन्त्री ओलीले भारतलाई उसको नारा सिंहमेव जयते कि सत्यमेव जयते हो ? भन्दै प्रश्न गरे ।
प्रधानमन्त्री ओलीले भने, “भारतको प्रतीक चिह्नमा रहेको चार मुखे सिंहको मुनि सत्यमेव जयते लेखिएको छ । भारत के सत्यमेव जयते मान्न तयार छ कि सिंहमेव जयते ?
उनले मन्त्रिपरिषदबाट सोमबार पारित भएको नयाँ नक्साले पाठ्यपुस्तकदेखि लिएर धेरै कुरामा परिवर्तन ल्याउने जिकिर गरे । मानचित्रमा एक खालको परिवर्तन ल्याएको र अरु धेरै कुरामा विस्तारै परिवर्तन आउँदै जाने उनको भनाइ छ ।
काठमाडौं । नेपाली सेनाले चीनबाट स्वास्थ्य सामग्री आज काठमाडौं ल्याएको छ । नेपाल एयरलाइन्सको जहाजले १८.८४ टन सामान मंगलबार बिहान काठमाडौं ल्याएको हो । पिपिई, एन ९५ मास्क तथा टेस्ट किटहरु यस पटक ल्याइएको छ । नेपाल एयरलाइन्सको वाइडबडी जहाजले सामान ग्वाङ्जाओबाट नेपाल ल्याइएको हो । सेनाले यसअघि स्थलमार्गबाट शनिबार १० कन्टेनर सामान ल्याइसकेको थियो ।
ग्वाङजाओको विमानस्थल व्यस्त भएपछि ती सामान स्थलमार्गबाट भित्र्याइएको बताइएको थियो । कन्टेरनबाट ८ टन सामान ल्याइएको छ । सेनाले कोरोना भाइरस महामारीसँग जुध्न आवश्यक सामान खरिद गर्न चीनसँग १ करोड ८४ लाख ४१ हजार ७ सय ६ अमेरिकी डलरको सम्झौता गरेको छ ।
काठमाडौं । नेपालमा मंगलबार १५ संक्रमित थप भएका छन् । प्रदेश १ मा मंगलबार ११ जना र प्रदेश ५ मा ४ जना नयाँ संक्रमित थपिएका हुन् । मंगलबार झापाका ९, कपिलवस्तुमा ४ र सुनसरीमा २ जनामा कोरोना संक्रमण पुष्टि भएको छ । कोशी अस्पतालले पूर्वमा भएको संक्रमणको पुष्टी गरेको हो । सोही अस्पतालमा भएको परीक्षणमा कोरोना पुष्टी भएको हो । झापाका संक्रमित केचनकवल गाउँपालिकाको रहेको बताइएको छ । उता, विपी कोइराला स्वास्थ्य विज्ञान प्रतिष्ठान धरानमा गरिएको परीक्षणमा सुनसरीका दुईजनामा कोरोना पुष्टी भएको छ ।
मंगलबार नै कपिलवस्तुमा थप ४ जनामा कोरोना संक्रमण देखिएको छ । मायादेवी गाउँपालिका– ४ का ३ जना र वडा नं ३ का एक जना पुरुषमा कोरोना संक्रमण पुष्टि भएको छ । उनीहरु १४ दिनअघि भारतको मुम्बईबाट आएको बताइएको छ । उनीहरु क्वारेन्टाइनमा थिए । क्वारेन्टाइनमा बसेको शुरुमा आरडीटी विधिबाट परीक्षण गरिएको थियो । आरडीटी विधिबाट पोजेटिभ देखिएपछि भैरहवाको प्रदेश जनस्वास्थ्य प्रयोगशालामा पीसीआर विधिबाट परीक्षण गरिएको थियो । जहाँ ४ जनामा कोरोना पोजेटिभ देखियो ।
काठमाडौं । कोरोना भाइरसको महामारीका बीच सरकारले विदेशमा अलपत्र नेपालीलाई फर्काउने भएको छ । सोमबार बसेको मन्त्रिपरिषद् बैठकले नेपालीलाई घर फर्काउने, तर यसका लागि चरणवद्द रुपमा काम गर्ने निर्णय गरेको हो ।
परराष्ट्र मन्त्रालयका अनुसार सात वटै प्रदेशमा वडा तहसम्म सुरक्षित क्वारेन्टाइन बनाएर बिदेशमा रहेका नेपालीलाई स्वदेश फर्काउने निर्णय भएको छ ।
मन्त्रालयका अनुसारको सिलसिलामा विदेश पुगेका, गर्भवती, नेपालमा आफन्तको निधन भएका नेपालीलाई पहिलो प्राथमिकताका साथ स्वदेश फर्काइने भएको छ । दोस्रो प्राथमिकतामा भने टिकट लिएर काम छोडेर बसेका तर हवाई टिकट लिएर पनि उडान रद्द भएर आउन नपाएका नेपालीलाई स्वदेश ल्याउने निर्णय सरकारले गरेको हो ।
काम गुमाए पनि कम्पनीमा बस्ने सुबिधा पाइरहेकालाइ तेस्रो चरण र कुनै समस्या नभए पनि नेपाल आउन चाहने नेपालीलाई घर फर्काउने गरि प्राथमिकता तोकिने भएको छ।
पहिलो चरणमा खाडी राष्ट्र र मलेसियाबाहेक बंगलादेशका विद्यार्थी, साइप्रसमा समस्या परेका विद्यार्थी तथा बिनाभिसा रहेकालाई प्राथमिकता दिने तयारी गरेको बताइएको छ । कुवेत र यूएईले तत्काल फर्काउने भनेर राखेका नेपालीलाई पनि घर ल्याइने भएको छ ।
महामारीसङ्गै करिब २० लाख नेपाली भारत र तेस्रो मुलुकबाट घर फर्कने अनुमान छ । यसको व्यवस्थापन सरकारका लागि सबैभन्दा चुनौतीपूर्ण अवस्था हो ।
काठमाडौं । बंगालको खाडीमा विकसित शक्तिशाली चक्रवात ‘अम्पुन’ले दक्षिण एसियाली मुलुकमा प्रभाव पार्ने भएको छ । यसले नेपालमा समेत अप्रत्यक्ष प्रभाव पार्ने मौसमविदले जानकारी दिएका छन् ।
स्थानीय वायु र अम्पुनको अप्रत्यक्ष प्रभावका कारण काठमाडौं उपत्यकासहित देशका अधिकांश स्थानमा बदली भइसकेको छ । काठमाडौंका केही स्थानमा मंगलबार बिहान हल्का वर्षा पनि भएको छ । यो जारी रहने भएको छ ।
‘अम्पुन’ चक्रवातको वेग बढ्दै गएको मौसम पुर्वानुमान महाशाखाले जनाएको छ । भारतको ओडिसा हुँदै उत्तरतर्फ सर्दै गएको चक्रपातले अझै केही दिन नेपालमा समेत पानी पार्ने छ ।
बिभागका अनुसार मंगलबारबाट नेपालको पूर्वी भूभाग प्रभावित हुने छ । पूर्वी नेपालका जिल्लामा हुरी, बतास र चट्याङससहित वर्षा हुनेछ । नेपालमा अम्पुनको अप्रत्यक्ष प्रभाव देखिन थालेको छ ।
अम्पुनले भारत र बंगलादेशमा बढी क्षति पुर्याउने आङ्कलन छ ।
काठमाडौं । कोरोना महामारीबाट उम्किसकेको चीनले विश्व स्वास्थ्य संगठन (डब्लुएचओ)लाई दुई अर्ब अमेरिकी डलर सहयोग प्रदान गर्ने घोषणा गरेको छ । अमेरिकाले डब्लुएचको सहयोग कटौती गर्ने घोषणाका बिच चीनको उक्त सहयोग आएको हो ।
अमेरिकी राष्ट्रपति डोनाल्ड ट्रम्पले डब्लुएचओले चीनको समर्थन गरेको भन्दै सहयोग रोक्न निर्देशन दिएका छन् । अहिले सङ्गठनको वार्सिक बैठक जारी छ । चिनियां राष्ट्रपति सि चिनफिङले सो रकम दुई वर्षभरीमा कोरोनाभाइरस विरुद्ध लड्नका लागि प्रदान गर्ने निर्णय भएको जानकारी दिएका छन् ।
विश्व स्वास्थ्य सम्मेलनका क्रममा राष्ट्रपति सिले कोरोनाभाइरस सम्वन्धी सम्पुर्ण विवरण चीनले डब्लुएचओे र अन्य देशहरुलाई उपलब्ध गराउने स्पष्ट समेत पारेका छन् । विश्वभर फैलिरहेको महामारीविरुद्धको लडाईमा चीनले संसारका सबै मुलुक सङ्ग सहकार्य गर्ने उनको भनाइ छ ।
विश्वभरी कोरोनाभाइरसको महामारी फैलिएकाले त्यसको नियन्त्रण तथा न्युनिकरणका लागि यो सहयोग खर्च हुनेछ ।
काठमाडौं । नेपालमा थप १८ जनामा कोरोना भाइरसको संक्रमण देखिएको छ।
स्वास्थ्य तथा जनसंख्या मन्त्रालयले सोमबार राती सार्वजनिक गरेको विवरण अनुसार धनुषा, खोटाङ, बाँके, दैलेख, सुनसरी र झापामा गरी १८ जनामा संक्रमण देखिएको हो।
आजै सोमबार विहान ९ र दिउसो ५३ गरी ६२ जनामा कोरोना संक्रमण देखिएको थियो। राती थपिएका १८ सहित सोमबार मात्र ८० जना संक्रमित थपिएका हुन्। यो अहिलेसम्म कै सबैभन्दा उच्च सङ्ख्या हो
नेपालमा हालसम्म २ जनाको कोरोनाका कारण मृत्यु भइसकेको छ भने ३६ जना उपचारपछि निको भएका छन्।
काठमाडौं । भारतले अतिक्रमण गरेको नक्सा समेत समेटेर नेपाल सरकारले सोमबार नयाँ नक्सा पारित गरेको छ । अब नेपालले नयाँ नक्सा प्रयोगमा ल्याउने भएको छ । जहाँ अब लिम्पियाधुरा, लिपुलेक र कालापानी समेटिएको हुनेछ ।
‘उत्तरी पूर्व र पश्चिमी नक्साहरुसहित राजनीतिक र प्रशासनिक प्रवन्ध पनि समेटेको सरकारका प्रवक्ता एवं सञ्चार र अर्थमन्त्री डा. युवराज खतिवडाले बताए ।
मन्त्रिपरिषद् बैठकले नेपालका अतिक्रमित सबै क्षेत्र समेटेर नक्सा स्वीकृत गरेको छ, अब यही नक्सा बमोजिम हाम्रा निशान छाप र पाठ्यपुस्तक पनि अद्यावधिक गरिनेछ,’ उनले भने ।
नयाँ नक्सामा नेपालको संघीयता झल्किने गरी प्रदेशहरू पनि छुट्याइएको उनले जानकारी दिए । भारतले २ नोभेम्बर, सन् २०१९ मा सार्वजनिक गरेको नक्सामा नेपालको भू-भाग समेटिएपछि तत्कालै संसदीय समितिहरूले नेपाल सरकारलाई पनि नयाँ नक्सा सार्वजनिक गर्न दबाब दिएका थिए ।
भारतले अझ नेपालको कालापानी हुँदै सडक निर्माण गरेर यही मे ८ मा उद्घाटन नै गरेपछि त्यसयता नेपालमा चर्को विरोध हुँदै आएको थियो । भारतले नेपालको भूमि अतिक्रमण गरेसँगै सरकारले केही दिन पहिले मात्रै दार्चुला जिल्लाको ब्यास गाउँपालिकामा सीमा निगरानी चौकी स्थापना गरेको थियो ।
यसअघि शुक्रबार राष्ट्रपति विद्यादेवी भण्डारीद्वारा पेश भएको सरकारको नीति तथा कार्यक्रममा पनि सो विषय उल्लेख थियो ।
काठमाडौं । सरकारले भारतको अतिक्रमणमा परेको दार्चुलाको लिम्पियाधुरासहित समेटेर नयाँ नक्सा मन्त्रिपरिषद्ले पारित गरेको छ ।
भूमिसुधार मन्त्री पद्मा अर्यालले गरेको प्रस्तावलाई सोमबार साँझ बसेको मन्त्रिपरिषद् बैठकले पारित गरेको हो । यसले अब सीमा विवादलाई सरकारले गम्भिर रुपमा लिएको देखिएको छ । यसअघि आइतबार बसेको मन्त्रिपरिषद् बैठकबाटै यो पारित गर्ने सम्भावना थियो । तर, अन्तिममा रोकिएको थियो ।