Category: फिचर

काठमाडौं । सरकारले कोरोना भाइरसको सम्भावित संक्रमणको जोखिमलाई ध्यानमा राख्दै तयारी तिब्र बनाएको छ ।

उक्त भाइरसका कारण मानिस संक्रमित भएमा तत्काल उपचारको व्यवस्था गर्न सरकारले २३५ आईसीयू बेड तयार पार्ने घोषणा समेत गरेको छ ।

कोरोना लागि हालेमा काठमाडौं उपत्यकामा तीन वटा अस्पतालमा उपचार हुने गरी छुट्याइएको छ ।

आजबाट नेपाल आउने सबै मानिसलाई अनिवार्य क्वारेन्टाइनमा बस्नुपर्ने नीति लागु गरेको सरकारले विदेशबाट नेपाल आउन समेत कडाई गरिसकेको छ ।

तर, सम्भावित जोखिमसँग लड्न तयारीको काम समेत उत्तिकै भइरहेको स्वास्थ्य मन्त्रालयको भनाई छ ।

चीनको बुहानबाट सुरु भएको कोरोना भाइरस अहिले १२० देशमा पुगेको छ । तर, चीनको छिमेकी मुलुक नेपालमा भने एक जनामा मात्र संक्रमण पुष्टी भएको थियो ।

उनी पनि निको भएर फर्किएका छन् । त्यसपछि नेपाल अहिले कोरोनामुक्त छ । स्वास्थ्य मन्त्री भानुभक्त ढकालले कोरोना रोकथाम बारे भएका प्रयासबारे आइतबार राष्ट्रियसभालाई जानकारी दिए ।

उनले कोरोनाको संक्रमण नै नेपाल प्रवेश नहोस भन्नेमा सरकार सचेत रहेको उल्लेख गरे । उनका अनुसार टेकुस्थित शुक्रराज ट्रपिकल तथा सरुवा रोग, पाटन अस्पताल र कीर्तिपुर अस्पतालमा कोरोनाको मात्र उपचार हुने गरी व्यवस्थापन मिलाइएको छ ।

वीर अस्पतालको नयाँ भवनलाई पनि कोरोनाको मात्र उपचार गर्ने अस्पतालका रुपमा विकास गरिने भएको छ । उनले नडराइकन सचेतना अपनाउन सर्वसाधारणमा आग्रह गरे ।

रोगको संक्रमण भइहालेमा सरकारले निशुल्क उपचार गर्ने समेत उनले जानकारी गराए ।

नेपालमा अहिलेसम्म ४ सय ६४ जनामा कोरोना परिक्षण भएको छ । सबैको रिपोर्ट नेगेटिभ आएकोछ ।

कोरोनाको सम्भावित जोखिमका आधारमा सरकारले उपत्यकाभित्र थप १२० र बाहिर ११५ आईसीयू वेड तयार गर्ने उनले बताए । अहिले काठमाडौं उपत्यका भित्र सबै अस्पतालमा गरी १७० वटा आईसीयू बेड रहेका छन् ।

काठमाडौं । आजबाट नेपाल आउने स्वदेशी तथा विदेशी सबैले क्वारेन्टाइनमा बस्नुपर्छ ।

अध्यागमन विभागले यसअघि नै यसको सूचना जारी गरिसकेको छ । १५ मार्चदेखि ३० अप्रिलसम्म नेपाल आउने स्वदेशी, विदेशी तथा गैरआवासीय नेपाली सबैले क्वारेन्टाइनमा बस्नु पर्ने भएको हो ।

कोरोना भाइरसको संक्रमण फैलिने जोखिम बढेपछि नेपाल भित्रने स्वदेशी तथा विदेशी नागरिकले सेल्फ क्वारेन्टाइनमा बस्नुपर्ने नियम लागु गरिएको हो ।

अब त्रिभुवन अन्तराष्ट्रिय बिमानस्थल झर्ना साथ क्वारेन्टाइनमा बस्नका लागि एक फारम भर्नुपर्छ । विभागका अनुसार नेपाली नागरिकलाई घरमा नै क्वारेन्टाइनमा बस्नु पर्ने भएको छ । विदेशी नागरिकले क्वारेन्टाइनमा बस्ने स्थानको व्यवस्था स्वयमले मिलाउनु पर्छ ।

क्वारेन्टानमा बसे वा नबसेको अनुगमन हुनेछ । नेपालमा तेस्रो मुलुकबाट आउने नागरिकको अनअराइभल भिसा बन्द गरिएको छ ।

उनीहरुले दूतावासमा गएर निरोगिताको प्रमाणपत्र देखाएमात्र नेपाल आउन पाँछन् । त्यसरी आएकालाई समेत क्वारेन्टाइनमा राख्न लागिएको हो ।

त्यसो त तेस्रो मुलुकका नागरिकले अब नेपाल आउन त्रिभुवन अन्तर्राष्ट्रिय विमानस्थलमात्र प्रयोग गर्न पाउँछन् ।

आफैंले आफैंलाई अन्य मानिसहरूको सम्पर्कबाट पर राखी संक्रमणबाट जोगिने प्रक्रिया सेल्फ क्वारेन्टाइन हो ।

यसलाई चिकित्सकीय उपचारमा जानु भन्दा पनि सचेतनाको एक प्रक्रिया मानिन्छ । रोग लागेको भेटिएमा मात्र अस्पतालमा जानुपर्छ । क्वारेन्टाइनमा बसको अवधीमा समेत स्वास्थ्य जाँच भने गराउनु पर्छ ।

काठमाडौं । कोरोनाभाइरसको आशंकामा अस्पताल भर्ना भएका चार नेपालीमा नेगेटिभ नतिजा आएको छ । शुक्रबार आएको नतिजामा कसैमा पनि कोरोनाको संक्रमण पुष्टी नभएको टेकु अस्पतालले जनाएको छ ।

कसैमा पनि कोरोना नदेखिएपछि सबैलाई शुक्रबार नै डिस्चार्ज गरिएको छ । उनीहरु कतार, मलेसिया र अमेरिकाबाट नेपाल आएका थिए।

उनीहरूमा ज्वरो, रुघाखोकीको लक्षण देखिएपछि दुई दिनदेखि टेकुस्थित शुक्रराज ट्रपिकल तथा सरूवा रोग अस्पतालको आइसोलेसन वार्डमा भर्ना गरिएको थियो। चारजनामध्ये दुई पुरुष र दुई महिला हुन् ।

यससँगै नेपाल अहिले पनि कोरोनामुक्त क्षेत्रकै रुपमा स्थापित हुन सफल भएको छ । नेपालमा अहिलेसम्म एकजनामा मात्र कोरोना संक्रमण भेटिएको थियो ।

तर, उनी उपचार पछि घर फर्किसकेका छन् । त्यसयता चार सयभन्दा बढी व्यक्तिको कोरोना परीक्षण गरिएकोमा कसैमा पनि कोरोनाको संक्रमण पुष्टी भएको छैन ।

छिमेकी मुलुक चीनमा उत्पत्ती भएर संसारभर फैलिएपनि यो संक्रमणबाट नेपाल भने चोखो रहेको छ ।

नेपालबाहिर भने नेपालीलाई कोरोनाको संक्रमण देखिएको छ । उनीहरु सम्बन्धित मुलुकमै उपचारार्थ रहेका कोरोनाबाट नेपाल अहिलेसम्म सुरक्षित रहन सफल भएको छ ।

काठमाडौं । मिर्गौला प्रत्यारोपणका लागि अस्पताल भर्ना भएको १० दिनपछि प्रधानमन्त्री केपी शर्मा ओली वालुवाटार फिर्ता भएका छन् । उनलाई त्रिवि शिक्षण अस्पतालले शुक्रबार डिस्चार्ज गरेको हो ।

अब उनले बालुवाटारमै आराम गर्दा हुने भएको छ । शुक्रबार उनी डिस्चार्ज हुँदा सहयोगीले साथ दिएर उभिएका थिए भने संचारमाध्यमलाई हात हल्लाएर अभिवादन गरेका थिए ।

अस्पतालबाट बाहिरिने क्रममा उनलाई चिकित्सकहरुले समाएर गाडीसम्म ल्याएका थिए । उनी मुस्कुराएका थिए । चिकित्सकहरुका अनुसार बालुवाटार फर्किए पनि प्रधानमन्त्री चिकित्सकको प्रत्यक्ष निगरानीमा रहनु पर्ने भएको छ ।

एक महिनासम्म उनको परीक्षण जारी रहने छ । नियमित भेटघाट र बाहिर हिँडडुल गर्न भने अझै केही समय पाउने छैनन् ।

संक्रमणको डरले चिकित्सकले यस्तो सुझाव दिएका हुन् । चिकित्सकहरुका अनुसार मिर्गौला प्रत्यारोपण गरेको व्यक्तिलाई तीन महिनासम्म संक्रमणको जोखिम रहन्छ । प्रधानमन्त्री १९ फागुनमा अस्पताल भर्ना भएका हुन् ।

काठमाडौं । सरकारले बिहीबार कोरोनाविरुद्ध भइरहेको तयारी सार्वजनिक गरेको छ । यसअनुसार मुलुक भित्र जुन स्थानमा कोरोना देखिन्छ, त्यो क्षेत्रलाई तत्काल बन्द गर्ने योजना रहेको छ ।

स्वास्थ्य तथा जनसंख्या मन्त्रालयमा प्रवक्ता डा. विकास देवकोटाले सार्वजनिक गरेको योजना अनुसार देशको कुनै क्षेत्रमा कोरोना भाइरस को संक्रमण देखिएमा निश्चित क्षेत्र तोकेर ‘लक डाउन’ गरिने भएको छ ।

सो क्षेत्रमा अत्यावश्यकबाहेक सबै गतिविधि बन्द गरिने भएको छ । अत्यावश्यकबाहेक अरु बन्द गर्ने तथा पकेट एरिया लक डाउन गर्ने योजना बनाइएको उनले जानकारी दिए ।

कोरोना देखिएमा उपकरण र जनशक्ति एकत्रित गरेर परिचालन गरिने भएको छ ।

आवश्यकता अनुसार फिल्ड र मोबाइल अस्पताल परिचालनको समेत तयारी गरिएको छ । विश्व स्वास्थ्य संगठनको मापदण्ड अनुसार नेपालले समेत कोरोनाविरुद्ध तयारी गरिरहेको मन्त्रालयको भनाई छ ।

चीनको वुहानबाट सुरु भएको कोरोना भाइरस अहिले संसारका १ सय २० भन्दा धेरै देशमा फैलिसकेको छ ।

नेपालमा एक जनामा पोजेटिभ पाइएन पनि उनी निको भएर घर फर्किसकेका छन् । त्यसबाहेक अहिलेसम्म पोजिटिभ रिजल्ट देखिएको छैन ।

तर,  संक्रमण जुनसुकै बेला देखिन सक्ने भन्दै सचेतना भने बढाइएको छ ।

नेपालले पनि पर्यटकको भिसा बन्द गर्नेदेखि संक्रमित देशबाट आएका नागरिकले क्वारेन्टाइनमा बस्नु पर्ने सम्मका निर्णय गरेको छ । नेपालले भारत र चीनका ४३ वटा सीमा नाकामा सम्बन्धित स्थानीय तहले स्वास्थ्यकर्मी परिचालन गरेका छन् ।

नेपालमा अहिलेसम्म साढे ४ सयको परीक्षण भएके छ ।

अहिले टेकुस्थित शुक्रराज ट्रपिकल तथा सरुवा रोथग अस्पतालमा ४ र पाटन अस्पतालमा २ जना गरी ६ जना आइसोलेसनमा रहेका छन् । एक जनालाई बुटवलमा आइसोलेसनमा राखिएको छ ।

काठमाडौं । बुधबार विश्व स्वास्थ्य संगठनले कोरोना भाइरसलाई महामारी घोषणा गर्यो । यस दौरान संगठनले केवल आतंकित हुनुमात्र नपर्ने भन्दै यो रोग नियन्त्रण समेत गर्न सम्भव रहेको उल्लेख गरेको छ ।

तर, यसका लागि हरेक मुलुकले उत्तिकै सचेतना र जागरुकता अपनाउनु पर्ने संगठनको भनाई छ । यो भाइरस चीनमा करीव नियन्त्रण उन्मुख छ । तर, अमेरिका र यूरोपमा  यो भाइरसको संक्रमण डरलाग्दो गरी फैलिएको छ ।

संगठनका अनुसार कोरोना भाइरसको संक्रमण १ सय २३ मुलुकमा फैलिएको छ । यसले बुुधबारसम्म ४ हजार ६ सय २७ जनाको ज्यान समेत लिइसकेको छ ।

विश्वभर संक्रमितको संख्या १ लाख २६ हजार रहेकोमा ६८ हजार भन्दा बढि निको भएर घर फर्किएका कारण यो भाइरसको नियन्त्रण सम्भव रहेको संगठनको भनाई छ ।

यसका लागि हरेक सरकारको प्रतिवद्धताको आवश्यकता संगठनले उल्लेख गरेको छ । ५३ हजार २ सय २७ जनाको उपचार भइरहेको छ ।

संगठनका अनुसार ५ हजार ९ सय ४४ जनाको अवस्था गम्भीर रहेको पाइएको छ । चीनमा ३१ सय ६९ जनाको मृत्यु भइसकेको छ । इटालीमा ८ सय २७ जनाको ज्यान गएको छ ।

इरानमा ३ सय ५४, दक्षिण कोरियामा ६०, स्पेनमा ५५, फ्रान्समा ४८, अमेरिकामा ३८, जापानमा १५, बेलायतमा ८, नेदरल्याण्डमा ५, स्विटजरल्याण्डमा ४, जर्मनी र बेल्जियममा ३\३ जनाको मृत्यु भएको तथ्यांक छ ।