Category: विश्व

एजेन्सी ।

जर्मनीका एक ४२ वर्षिया पूर्व नर्स निल्स हगललाई ८५ जना बिरामीहरुलाई उपचारको क्रममा गलत औषधी प्रयोग गरी हत्या गरेको कसुरमा उच्च अदालतले आजिबन काराबासको सजाय सुनाएको छ ।

उक्त घटना उत्तरी जर्मनीको डेलमेनहर्स्ट र ओल्डनबर्ग शहरमा सन् १९९९ देखि २००५ सम्ममा घटेको हो । न्यायाधीश सेब्यास्टियन ब्युर्मेनले अभियुक्तको कार्यलाई ‘सामान्य बुझाइ भन्दा बाहिर रहेको’ बताएका छन् ।

यस अघिनै दुईजनाको हत्या गरेको अपराधमा सजाय काटिरहेका हगलले उनको संरक्षकत्वमा रहेका मानिसहरूलाई मुटु रोग सम्बन्धी औषधीको घातक मात्रा दिने गरेा थिए । उनलाई जर्मनीको आधुनिक इतिहासमै सबैभन्दा धेरै हत्या गर्ने व्यक्तिको रूपमा लिइएको छ ।

घटनाको अनुसन्धानकर्ताको अनुसार उनले सहकर्मीहरू माझ आफ्नो प्रभाव जमाइ राख्न विरामीहरुलाई औषधीको घातक मात्रा दिन्थे र त्यसपछि उनीहरुलाई बचाउने कोसिस गर्दथे । एक रिसर्चरलाई उदृत गर्दै जर्मन पत्रिका बिल्ड लेख्छन् ‘मुटुको धडकन कमजोर भएका विरामीहरुलाई बचाउने प्रयासमा हगल सधै अग्रसर रहन्थे’ ।

बयानको अन्तमा हगलले आफुले मारेका विरामीहरुका परिवासंग आफ्नो कार्य भयावह भएको स्वीकार गर्दै “मैले विगतमा तपाईहरूप्रति गरेको सबै कामका लागि माफी माग्छु,” उनले भने ।उनले त्यो भन्दा धेरै विरामीहरू मारेको हुनसक्ने प्रहरीको विश्वास छ तर उनीहरूको अन्तिम संस्कार गरिएसंगै सबै सम्भावित प्रमाण नष्ट भएको हुन सक्ने बताईको छ ।

हगलले ५५ वटा हत्या गरेको स्वीकार गरेपनि ओल्डेनबर्गस्थित अदालतले उनलाई ८५ जनाको हत्याको अभियोगमा दोषी ठहर गरेको जर्मन संचार माध्यमहरूले जनाएका छन् । उनले सन् २००५ मा एक जना विरामीलाई चिकित्सकले नलेखेको औषधि दिइरहेको अवस्थामा समातिएपछि मात्र उनको त्यसरी बिरामी मार्ने क्रम रोकिएको थियो ।

उनलाई सन् २००८मा सात वर्षको जेल सजाय सुनाइएको थियो तर उनले हत्या गरेको आशंका गरेका पीडितका परिवारहरूले थप अनुसन्धानको माग गरेपछि थप अनुसन्धान थालेको थियो । सन् २०१५ मा सकिएको दोस्रो सुनुवाईमा दुईजनाको ज्यान लिएको अभियोगमा उनले आजीवन कारावासको सजाय पाएका थिए ।

भारतमा सोमबारदेखि हराइरहेको यात्रुबाहक सैन्य जहाज अझै फेला परेको छैन । भारतीय सेनाका सबै संयन्त्रले जोजि जारी राखेपनि जहाज फेला नपरेको भारतीय संचारमाध्यमहरुमा उल्लेख छ ।

भारतीय नौसेनाको एएन ३२ जहाजमा ९ जना यात्रु सवार थिए । भारतको आसमबाट उडेको केही मिनेटमै जहाज बेपत्ता भएको थियो ।

यो जहाज भारतकै अरुणाञ्चल प्रदेशतर्फ उडेको थियो । यो जहाज ट्रांसपोर्ट मा बढी प्रयोग भइरहेको थियो । अरुणाचलको मेचुकास्थित एडभान्स ल्याडिंग ग्राउन्डमा अवतरण गर्ने गरी जहाज उडेको थियो ।

अरुणाञ्चल चीन सँग जोडिएको राज्य हो । यसको एक सानो शहर मेचुका हो । हराइरहेको जहाज खोज्न थुप्रै अत्याधुनिक जहाज प्रयोग गरिएपनि अत्तोपत्तो नलागेको बताइएको छ ।

यसअघि वर्ष वर्ष पहिलो पनि सोही मोडलको एक जहाज बंगालको खाडी माथि पुगेपछि वेपत्ता भएको थियो । उक्त जहाज पनि अहिलसम्म फेला परेको छैन ।
एजेन्सी

काठमाडौँ
दोस्रो कार्यकालका लागि विहीबार सपथ लिएका भारतीय प्रधानमन्त्री नरेन्द्र मोदीले शुक्रबार आफ्नो मन्त्रीमण्डल सदस्यलाई जिम्मेवारी तोकेका छन् । धेरै प्रभावशाली पदमा पर्ने विदेश मन्त्रीको जिम्मेवारी पार्टी नेतालाई नभइ एक पूर्व कर्मचारीलाई दिएर मोदीले धेरैलाई चकित समेत पारेका छन् ।

पूर्व विदेश सचिव सब्रमण्यम (एस) जयशंकरले सिधै मन्त्रीको रुपमा त्यो पनि कैयन् पार्टी नेताभन्दा बरियतामा अघि रहेर विहीबार सपथ ग्रहण गर्दा नै धेरैले आश्चर्य मानेका थिए । शुक्रबार जिम्मेवारी तोकिँदा उनले विदेश मन्त्रालयको कमान सम्हाल्न पाएका हुन् । जयशंकर प्रति मोदी भरोसा साँच्चिकै उच्च देखिएको छ । सन् २०१४ अघि नै भाजपाको सदस्य बनेर दुई पटक लोकसभा चुनाव जितेका सेवा निवृत्त चार तारे जर्नेल भिके सिंहलाई यस पटक पनि राज्यमन्त्रीको जिम्मेवारीमै सिमित राखिएको छ । अर्को तिर सिंहकै शैलीमा गैर राजनीति पृष्ठभूमीबाट आएका र अहिलेसम्म पार्टीको सदस्यता पनि नलिएका जयशंकरको छलाङप्रति भारतीय बुद्धिजिवीहरुले नै जिब्रो टोकेका छन् ।

अघिल्लो कार्यकालमा भाजपाकी बरिष्ठ नेता शुष्मा स्वराजले सम्हालेको विदेश मन्त्रालयको जिम्मेवारी अहिले जयशंकरले पाएका हुन् । स्वराजको सचिव भएर जयशंकरले काम गरेका थिए । अर्कोतिर भिके सिंह स्वराजकै राज्यमन्त्री थिए । अहिले सिंह सडक परिवहन राज्यमन्त्री नियुक्त भएका छन् भने उनी मातहत काम गरेका जयशंकरले सिधै फुलमन्त्रीमा जम्प गर्न पाएका हुन् ।

जयशंकर प्रति मोदीको भरोसा भने उनी सचिव हुँदा देखिनै देखिएको थियो । नेपालमा संविधानसभाबाट पारित संविधान जारी हुनबाट रोक्न मोदीले जयशंकरलाई नै विशेष दुतका रुपमा काठमाडौँ पठाएका थिए ।

नेपाली नेताबाट प्रतिकुल जवाफ पाएपछि रिसाएर फर्किएका जयशंकर नेपालमा नाकाबन्दी लगाउन लागि मोदी र स्वराजलाई सहमत गराउन सफल भए । उनलाई अहिले पनि नेपाली बौद्धिक बर्गले उनलाई नाकाबन्दीकै खलनायकको पहिचान दिने गरेको छ । जयशंकर सिधै विदेश मन्त्रीमा नियुक्त भएपछि अब नेपाललाई हेर्ने भारतीय नजर कस्तो होला भन्नेमा सबैको चासो बढेको छ ।

यस्तै मोदीले आफ्ना विश्वास पात्र अमित शाहलाई गृहमन्त्री बनाएका छन् । सन् २०१४ को चुनावमा उत्तर प्रदेशको जिम्मेवारी पाएका शाह भाजपालाई त्यहाँका ८० मध्ये ७३ लोकसभा सिटमा जिताउन सफल भए पछि पार्टी अध्यक्षमा बढुवा भएका थिए । उनको अध्यक्षतामा यस पटक २०१४ भन्दा ठूलो जित निकाल्न भाजपा सफल भएसँगै मोदीले आफ्नो प्रमुख सारथीको रुपमा उनलाई मन्त्रीमण्डलमा समावेश गरेका हुन् ।

मोदी गुजरातको मुख्यमन्त्री हुँदा देखिनै शाह उनको सहयोगी थिए । राज्यमा पनि एक पटक मन्त्रीमा नियुक्त भएका शाहले पछि हत्याको अभियोगमा अदालतमा मुद्दा दायर भएपछि राजिनामा दिएका थिए । उनलाई विपक्षिहरुले भने ‘गुण्डा’को पहिचान दिने गरेका छन् ।

अघिल्लो कार्यकालमा गृहमन्त्री रहेका राजनाथ सिंहलाई भने मोदीले रक्षा मन्त्रालयमा स्थानान्तरण गरेका छन् । यस्तै रक्षामन्त्री रहेकी निर्मला सीतारमन भने अर्थमन्त्रीमा बढुवा भएकी छिन् । उनी भारतको पहिलो महिला अर्थमन्त्री हुन् । पूर्व अर्थमन्त्री अरुण जेट्लीले स्वास्थ्यको कारण देखाउँदै सरकारमा सामेल नहुने निर्णय लिए पछि सीतारमणलाई चुनौतीपुर्ण जिम्मेवारी आइलागेको हो ।

काठमाडौं
भारतीय प्रधानमन्त्री नरेन्द्र मोदीले दोस्रो कार्यकालका लागि सपथ लिएका छन् । स्थानीय समय अनुसार बिहीबार साँझ सात बजे नयाँ दिल्ली स्थित राष्ट्रपति भवनमा मोदीले आफ्नो मन्त्री मण्डलका सहयोगीहरुका साथ सपथ ग्रहण गरेका हुन् ।

मोदीको सपथ ग्रहणमा भाग लिन प्रधानमन्त्री केपी ओली बिहीबार दिउँसो दिल्ली प्रस्थान गरेका थिए । ओली सहित मोदीले आफ्नो सपथ ग्रहणका लागि बिमस्टेक सदस्य देशका सरकार प्रमुखलाई निम्तो दिएका थिए । पहिलो कार्यकालको सपथमा सार्क सरकार प्रमुखलाई बोलाएका मोदीले यसपटक पाकिस्तानसँग बिबाद बढेपछि बिमस्टेकलाई महत्व दिएका हुन् ।

मोदी क्याबिनेटका प्रमुख सदस्यहरुमा पनि यसपटक फेरबदल देखिएको छ । भारतीय जनता पार्टीलाई चुनावमा महत्वपुर्ण जित दिलाउन प्रमुख भूमिका खेलेका अध्यक्ष अमित शाह मोदी सरकारमा अर्थमन्त्रीको रुपमा सामेल भएका छन् । उनलाई मन्त्री मण्डलमा तेस्रो स्थानमा राखिएको छ ।

त्यस्तै अघिल्लो कार्यकालमा मोदीलाई सफल बनाउन प्रमुख भुमिका निभाएका अर्थमन्त्री अरुण जेट्ली र विदेश मन्त्री शुष्मा स्वराजले यो कार्यकालमा मन्त्री बन्न अश्विकार गरेका छन् । दुबै जनाले स्वास्थ्यका कारण मन्त्रीको जिम्मेवारी नलिने निर्णय गरेका हुन् । अघिल्लो कार्यकालमा मोदीको प्रमुख सहयोगीको भूमिका निभाएका भाजपाका पूर्व अध्यक्षहरु राजनाथ सिंह र नितिन गड्करी भने मन्त्री पदमा दोहोरिएका छन् । सिंह मोदी पछिको दोस्रो स्थानमा छन् भने गड्करी शाह पछिको चौथो स्थानमा रहेका छन् ।

नेपालमा संविधान जारी भएपछि भारतले लगाएको नाकाबन्दीमा प्रमुख भूमिका निभाएका तात्कालिन विदेश सचिव सुब्रमण्यम (एस) जयशंकरलाई पनि मोदीले मन्त्री मण्डलमा सामेल गरेका छन् । उनको जिम्मेवारी प्रष्ट भइ नसके पनि विदेश मन्त्रालयकै कार्यभार पाउने आशंका भारतीय मिडियाहरुले गरेका छन् ।