न्यूयोर्क
अमेरिकी राष्ट्रपति डोनाल्ड ट्रम्पले दोस्रो कार्यकालका लागि राष्ट्रपतिय चुनावमा सघाउन चीनियाँ समकक्षि सि जिनफिङलाई गुहार मागेको उनकै पूर्व निकट सल्लाहकारले दावी गरेका छन् । ट्रम्पको राष्ट्रिय सुरक्षा सल्लाहकार रहि सकेका जोन बोल्टनले आफ्नो नयाँ किताबमा गत बर्ष जी २० को बैठकमा ट्रम्पले जिनफिङसँग उक्त अनुरोध गरेको उल्लेख गरेका हुन् ।
जी २० को बैठक गत बर्ष जापानको ओसाकामा सम्पन्न भएको थियो । त्यसबेला रात्रीभोजमा ट्रम्पले चीनले अमेरिकाबाट कृषिजन्य उत्पादनको आयात बृद्धि गरिदिए आफुलाई निर्वाचित हुन सहयोग पुग्ने भन्दै याचना गरेको बोल्टनको किताबमा जनाइएको छ । दुई राष्ट्रपतिबीचको एक्लाएक्लै भेटमा जिनफिङले कुराकानीको सुरुवात गर्दै ट्रम्प समक्ष अमेरिकामा चीन बिरोधी धारणाबारे गुनासो राखेका थिए । जवाफमा ट्रम्प डेमोक्र्याटहरुले चीन विरोधी धारणा बढाएको भन्दै आफ्ना प्रतिद्वन्दिप्रति क्रुद्ध भएको किताबमा उल्लेख छ ।
त्यस लगत्तै ट्रम्पले चुनावी कुरा झिकेको बोल्टनको दावी छ । आफुलाई चुनाव जिताउने चीनसँग आर्थिक सामर्थ्य रहेको भन्दै ट्रम्पले भटमास र गहुँको आयात बढाइदिन अनुरोध गरेका थिए । ट्रम्पले जिनफिङसँग बोलेको शब्दनै आफुलाई ज्ञाँत भएपनि सरकारको (किताव) प्रकाशन पुर्वको समिक्षाका कारण त्यसो गर्न नसकेको बोल्टनले उल्लेख गरेका छन् ।
त्यही भेटको दौरान जिनफिङले चीनले १० लाख हाराहारी उइघुर मुस्लिमहरुलाई कँज्याउन शिनजियानमा निर्माण गरेको बन्दीगृहको बचाउ गरेका थिए । जवाफमा ट्रम्पले जिनफिङको उक्त कदमप्रति आफ्नो समर्थन जनाएको पनि किताबमा उल्लेख छ ।
बोल्टनले किताब ‘द रुम ह्वेर इट ह्यापेन्ड’ आउँदो साता प्रकाशनको तयारी छ । प्रकाशन अगावै अमेरिकी मिडियाहरुले उनको किताब हात पारेर महत्वपुर्ण सूचना प्रकाशन गर्न थालेका हुन् । साथै, उनको किताब प्रकाशन रोक्न ह्वाइट हाउसले अदालतमा मुद्दा दायर गरेको छ । राष्ट्रपतिसँगका गोप्य सूचना बिना अनुमति बोल्टनले प्रकाशन गरेको सरकारी दावी छ । अप्रिल २०१८ मा ट्रम्पको राष्ट्रिय सुरक्षा सल्लाहकार नियुक्त भएका बोल्टनले गत सेप्टेम्बरमा ट्रम्पसँगको सैद्धान्तिक विमती पछि ह्वाइट हाउस छोडेका थिए । तर, उनले आफुलाई थाहा भएका गोप्य सूचना संसदमा ट्रम्प विरुद्धको महाभियोग प्रस्तावमा दिन अटेर गरेका थिए । राष्ट्रपतिले पद दुरुपयोग गरेका गम्भिर सूचना संसदसँग लुकाएर किताब प्रकाशन गर्न र पैसा कमाउन खोजेको भन्दै उनको आलोचना पनि भइ रहेको छ ।
