काठमाडौं । नेपालमा पछिल्लो २४ घण्टामा थप ९ सय ८० जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा गरिएको १० हजार ३ सय ४२ जनाको पीसीआर परीक्षणमा थप ९ सय ८० जनामा कोरोना संक्रमण पुष्टि भएको हो ।
यो सहित नेपालमा कोरोना संक्रमित हुने को संख्या ४६ हजार २५७ जना पुगेको छ। पछिल्लो २४ घन्टामा थप १८१४ जना कोरोना संक्रमणमुक्त भएका छन्। योसहित नेपालमा हालसम्म २८ हजार ९४१ उपचारपछि निको भएका छन्।
काठमाडौं । भारत कोरोना भाइरसको महामारीको चक्रब्यूहमा फसेको छ । तथ्यांक अनुसार पछिल्लो २४ घण्टामा यहाँ करीव १ लाख मानिसमा कोरोना भाइरसको नयाँ संक्रमण पुष्टी भएको छ । शनिबार २४ घन्टामा ९० हजार ६ सय संक्रमित थप भएको तथ्यांक आएको छ । अब भारतमा कुल संक्रमितको संख्या ४१ लाख ११ हजार पुगेको छ।
भारत अहिले अमेरिका र ब्राजिलपछि बढी संक्रमित रहेको मुलुकमा तेस्रो स्थानमा रहेको छ । पछिल्लो २४ घण्टामा यस मुलुकमा कोरोनाका कारण १ हजार भन्दा मानिसले ज्यान गुमाए । यहाँ कुल मृतकको संख्या ७० हजार ६ सय नाघेको छ। यो अवधिमा अमेरिकामा भने ४० हजार ७ सय मानिसमा नयाँ संक्रमण देखियो ।
अमेरिकामा कुल संक्रमितको संख्या ६४ लाख २९ हजार ८ सय पुगेको छ। यहाँ एक दिनमा सात सय मानिसले ज्यान गुमाए । अमेरिका सबैभन्दा बढी मानवीय क्षति हुने देश हो । कोरोनाका कारण अमेरिकामा १ लाख ९२ हजार ८ सय मानिसको ज्यान गएको छ ।
अमेरिकामा ३७ लाख ६ हजार ७ सय मानिसले कोरोनालाई जितेका छन् । विश्वभर कोरोना भाइरस लाग्ने मानिसको संख्या २ करोड ७० लाख ४३ हजार रहेको छ । ८ लाख ८२ हजार ९ सयले ज्यान गुमाएका छन् । नेपालमा मात्र २ सय ८० जनाको निधन भएको छ ।
काठमाडौं । रुसले निर्माण गरिरहेको कोरोना भाइरसविरुद्धको खोपको दोस्रो चरणको परीक्षणको नतिजा उत्साहजनक आएको अन्तर्राष्ट्रिय संचारमाध्यमले जनाएका छन् । यसले रुसमा कोरोनाविरुद्धको लडाईमा विज्ञान एक कदम अगाडी बढेको वैज्ञानिकहरुको प्रतिक्रिया छ । उता, रुस र इरान खोप उत्पादनमा सहकार्य गर्न समेत सहमत भएका छन् ।
तेहरानमा कोभिड १९ विरूद्धको खोप उत्पादन गर्न सहकार्य गर्ने विषयमा सहमति जुटेको छ । मस्कोका लागि इरानका राजदूत काजेम जलालीलाई उद्धृत गरी इरानी संचारमाध्यमले यो विषयको खुलासा गरेका छन् ।
‘फार्स न्यूज एजेन्सी’ का अनुसार सो सहमति शुक्रबार रूसी प्रत्यक्ष लगानी कोष (आरडीआईएफ) का कार्यकारी प्रमुख किरील दिमित्रिभ र राजदूत जलालीबीच भिडियो बैठकबाट यस्तो सहमति जुटेको हो । इरानी राजदूतले ‘कोभिड १९ को खोप उत्पादनमा मिलेको सफलताका लागि रुसलाई बधाई ज्ञापन गरेका थिए ।
जलालीले दुवै देशबीच थप स्वास्थ्य र चिकित्सा सहयोगको लागि रुससँग आग्रह गरिएको समेत जानकारी गराएका छन् । दिमित्रीभले दुई देशबीच कोभिड १९ विरूद्धको खोपको ठूलो मात्र उत्पादन गर्न तयार रहेकोमा रूस उत्साहित रहेको बताएका थिए ।
रुसका अनुसार छिट्टै यो खोप बजारमा आउने गरी तिब्र गतिमा काम भइरहेको छ । रुस कोरोनाबाट बढी प्रभावित मुलुकमध्ये एक हो ।
काठमाडौं । युद्धमा मारिएका आफ्नै सेनालाई हरुवा र बुद्धुको संज्ञा दिएका अमेरिकी राष्ट्रपति डोनाल्ड ट्रम्प फेरी एक पटक आलोचित बन्न पुगेका छन् । अमेरिकामा राष्ट्रपति पदको चुनाव नजिकिएको छ । यो समय आएको उनको अभिव्यक्तिले राष्ट्रपति नराम्रोसँग फस्न पुगेका हुन् ।
ट्रम्पले सन् २००१८ मा दिएको अभिव्यक्ति ‘द एटलान्टिस’, एसोसिएटेड प्रेस (एपी) र फक्स न्युजमा समाचार बनेको छ । त्यो अभिव्यक्तिको यतिबेला समाचार बनेपछि अभिव्यक्ति विश्वव्यापी विवादको विषय बन्न पुगेको छ ।
राष्ट्रपति र उनका सहयोगी यो दावि मान्न तयार छैनन् । उनीहरु यो समाचारलाई फेक मान्छन् । द एटलान्टिस पत्रिकाले उल्लेख गरेअनुसार सन् २०१८ मा पेरिसस्थित अमेरिकी सैनिकको स्मारक स्थलमा जाने ट्रम्पको कार्यक्रम रद्द भएको थियो । त्यसबेला राष्ट्रपतिले स्मारक स्थललाई ‘हारेका मान्छेले भरिएको ठाउँ’ भएको अभिव्यक्ति दिएको पत्रिकाको दावि छ ।
पत्रिकाले बलियो स्रोतका साथ भनेको छ, ‘ट्रम्पले त्यहाँ जाने कार्यक्रम किन रद्द गरे भने त्यतिबेला ठूलो वर्षात भइरहेको थियो, ट्रम्पलाई बर्षाले कपाल बिग्रिने चिन्ता पनि थियो । यसका साथै युद्धमा मारिएका अमेरिकीलाई सम्मान गर्ने कुरा उनका लागि महत्वपूर्ण थिएन।’
ट्रम्पले बेलेयुवुडमा मारिएका १८ सय अमेरिकी सैनिकलाई बुद्धु समेत भनेको पत्रिकाको दावि छ । यो पहिलो विश्वयुद्धकालिन समयको युद्ध हो । समाचार सार्वजनिक भएपछि अमेरिकी सेनाका पूर्व अधिकारीहरुले समेत ट्रम्पको चर्को आलोचना गरिरहेका छन् ।
बीबीसीका अनुसार प्रगतिशील समूह वोटवेट्सले एक भिडियो पोस्टमा युद्धमा आफन्त गुमाएका परिवारहरुको प्रतिक्रिया छापिएको छ । जहाँ बलिदान बारे राष्ट्रपतिलाई केही थाहा नभएको उल्लेख गरिएको छ ।
अमेरिकी राष्ट्रपति ट्रम्पले शुक्रबार नियमित प्रेस ब्रिफिंगका दौरान पत्रिकाहरुले ‘फेक न्युज’ छापेको प्रतिक्रिया दिएका छन् । आफुले राष्ट्रको हिरोहरुका सम्बन्धमा त्यस्तो अभिव्यक्ति दिन नसक्ने भन्दै उनले आफ्नो बजेटलाई केलाएर हेर्न समेत आग्रह गरेका छन् । उनले आफुले सैन्य बजेट र तलव बढाएको भन्दै उनले पत्रिकाबाट घृणित काम भएको बताए ।
बागलुङ । गत बुधबार राती बाढी र पहिरोमा परी हराइरहेका बागलुङको ढोरपाटन नगरपालिका ९ बोबाङका २३ जना अझै फेला पर्न सकेका छैनन्। हराइरहेका मध्ये शनिबार एक जनाको शव फेला परेको छ ।
यससँगै यस विपत्तिमा परी ज्यान गुमाउनेको संख्या कुल १५ पुगेको छ । तर, अझै २३ जना वेपत्ता छन् । बिहीबार र शुक्रबारको खोजीमा १४ जनाको शव फेला परेको थियो । प्रहरीका अनुसार शनिबार पनि बिहानैबाट खोजी थालिएको थियो ।
रातिको बाढी र पहिरोले बाग्लुङको ढोरपाटन नगरपालिका ९ बोबाङमा ठूलो मानवीय क्षति भएको थियो । हराइरहेका मानिसमा १५ दिने शिशुदेखि वृद्धसमेत रहेको प्रहरीले जनाएको छ । मृत्यु भएका १४ मध्ये १३ जनाको भने शव समेत सनाखत भइसकेको छ । यो प्राकृतिक विपतले ठूलो मानवीय तथा भौतिक क्षति गरेको छ ।
काठमाडौं । शनिबार नेपालमा कोरोना भाइरसका नयाँ संक्रमित हुने भन्दा डिस्चार्ज हुनेको संख्या बढी भएको छ । देशभर कोरोनाका १ हजार ४१ संक्रमित थपिए । तर, यस अवधिमा भने १५ सय ६६ जनाले कोरोनालाई जित्न सफल भएका छन् । यसले कोरोना जित्ने मानिसको संख्यामा समेत उल्लेख्य वृद्धि भएको छ ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार देशभर ४५ हजार ५ सय ७७ जनामा संक्रमण भएको छ । नेपालमा कोरोनालाई जित्नेको संख्या भने २७ हजार १ सय २७ पुगेको छ।
यो अवधिमा कुल २ सय ८० मानिसको ज्यान गएको छ । २४ घण्टामा १२ हजार ४ सय ७३ जनाको पिसिआर परीक्षण भएको छ। हालसम्म ७ लाख ५७ हजार बढीको पिसिआर परीक्षण भएको मन्त्रालयको तथ्यांक छ ।
काठमाडौं । नेपालमा कोरोना भाइरसको संक्रमणबाट थप ९ जनाको मृत्यु भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार काठमाडौंका संक्रमणबाट काठमाडौंमा तीन सहित थप ९ जनाको मृत्यु हो ।
उनका अनुसार मोरङकी ४३, मकवानपुरकी ५२ र नवलपरासीकी ३७ वर्षीया महिला तथा पर्साका ७५, महोत्तरीको ७८, काठमाडौंका ४१, ५९, ४५ र रुपन्देहीको ४० वर्षीया पुरुषको उपचारका क्रममा मृत्यु भएको हो।
योसँगै कोरोना संक्रमणबाट नेपालमा मृत्यु हुनेको संख्या २८० पुगेको छ।
काठमाडौं । नेपालमा पछिल्लो २४ घण्टामा थप १ हजार ४१ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा गरिएको १२ हजार ४ सय ७३ जनाको पीसीआर परीक्षणमा थप १ हजार ४१ जनामा कोरोना संक्रमण पुष्टि भएको हो ।
यो सहित नेपालमा कोरोना संक्रमित हुनेको संख्या ४५ हजार २७७ जना पुगेको छ।
पछिल्लो २४ घण्टामा थप १५६६ कोरोना संक्रमणमुक्त भएका छन्। योसहित नेपालमा हालसम्म २७ हजार १ सय २७ उपचारपछि निको भएका छन्।
ललितपुर । ललितपुरस्थित अल्का अस्पतालमा कार्यरत एक महिला कर्मचारीको हत्या भएको छ । अस्पतालमा कार्यरत ३९ वर्षीय गीता केसीको हत्या भएको हो । प्रहरीका अनुसार उनको शव गोदावारी नगरपालिका–१०, मुलडोलमा पर्ने लेलेको जंगलमा फेला परेको छ ।
प्रहरीले हत्यामा संलग्न रहेको आशंकामा एक जनालाई पक्राउ समेत गरेको छ । पक्राउ पर्नेमा केसीका भतिजा निर्मल केसी रहेका छन् । घटनाबारे थप अनुसन्धान भइरहेको प्रहरीले जनाएको छ । प्रारम्भिक अनुसन्धानबाट गीताको घाँटी थिचेर हत्या भएको अनुमान प्रहरीले गरेको छ ।
केसीको परिवारले उनी हराएको निवेदन तीन दिन अगाडी महानगरीय प्रहरी परिसर, ललितपुरमा दिएका थिए । त्यसपछि प्रहरी खोजी थालेको थियो । उनको शव शुक्रबार साँझ मुख्य सडकबाट दुई सय मिटरभित्र लेलेको जंगलमा फेला परेको हो । आज बिहान उनको शव पुष्टी भएको हो ।
बुटवल । रूपन्देहीको बुटवलमा कोरोना भाइरसको संक्रमणबाट दुई जनाको निधन भएको छ । बुटलवको कोरोना विशेष अस्पतालमा उपचार गराइरहेका दुई जनाको ज्यान गएको हो । नवलपरासी घर भएकी एक महिला र रुपन्देही घर भएका पुरुषको ज्यान गएको हो ।
नवलपरासीको प्रतापपुर गाउँपालिका–२ की ३७ वर्षीया महिलाको शनिबार बिहान ६ बजे र रुपन्देहीको बुटवल उपमहानगरपालिका–११ का ४० वर्षीय पुरुषको शुक्रबार राति ११ बजे मृत्यु भएको अस्पतालले जनाएको छ ।
पुरुष भदौ १५ र महिला भदौ १७ मा अस्पताल भर्ना भएका थिए। दुबै जनामा दीर्घरोग रहेको सम्बन्धमा कुनै जानकारी नभएको अस्पतालले जनाएको छ । रुपन्देहीमा मात्र संक्रमणबाट १६ जनाको ज्यान गइसकेको छ ।
काठमाडौं । कोरोना भाइरसको महामारीपछि पहिलो पटक हिमाल आरोहण अनुमति जारी भएको छ । यसलाई पर्यटनसँग सम्बन्धित सरोकारवालाले सुखद शुरुवातका रुपमा समेत लिएका छन् । गत चैतयता पर्यटनका सबै अवयवहरु शुन्य व्यापारमा छन् । सोहीकारण नेपालको यूनिक प्रडक्ट पर्वतारोहण र पदयात्राले छिटो पर्यटनलाई रिभाइभ गर्न सक्ने विश्वास लिइएको छ ।
सरकारले शरद ऋतुका लागि पर्यटकीय गतिविधि खुला गरेको छ । पर्यटन विभागले ६ जनाको नेपाली टोलीलाई बरून्चे हिमाल (७१२९ मिटर) आरोहणको अनुमति जारी गरेको छ । टोलीलाई पर्यटन विभागका महानिर्देशक रुद्रसिंह तामाङले शुक्रबार आरोहण अनुमति हस्तान्तरण गरेका छन् ।
सरकारले बहराइनका राजकुमारसहितको टोलीलाई हिमाल आरोहण गर्न नेपाल आउने अनुमति दिएको छ । यो टोलीले आरोहण अनुमति भने लिइसकेको छैन । शुक्रबार अनुमति लिएको ६ जनाको टोलीको नेतृत्व दावा स्टेभन शेर्पाले गर्नेछ ।
पर्यटन विभागका अनुसार अब हिमाल आरोहण गर्न जान चाहने नेपाली वा विदेशी नागरिकले स्वास्थ्य मन्त्रालयको मापदण्ड पालना गरी आरोहणमा जान सक्छन् । त्यसका लागि विभाग स्वयमले सहजीकरण समेत गर्नेछ ।
काठमाडौं । विश्व बैंकले नेपाललाई १ अर्ब २७ करोड रुपैयाँ अनुदान सहायता उपलब्ध गराएको छ । शुक्रबार अर्थ मन्त्रालयमा आयोजित कार्यक्रममा अनुदान रकम प्राप्ति सम्बन्धमा सम्झौता भएको छ ।
विश्व बैंकका अनुसार विद्यालय क्षेत्र विकास कार्यक्रमका लागि करिब एक अर्ब सत्ताइस करोड रुपैयाँ (एक करोड पचासी लाख अमेरिकी डलर) अनुदान सहायता सम्बन्धी सम्झौता सम्पन्न भएको छ ।
अर्थ मन्त्रालयका सहसचिव श्रीकृष्ण नेपाल र नेपाल-माल्दिभ्स-श्रीलंकाका लागि विश्व बैंकका निर्देशक फारिस हदाद जर्भोसले सम्झौतामा हस्ताक्षर गरे । यो सहायता नोवेल कोरोना भाइरस ९कोभिड-१९० संकटकाबीच आधारभूत शिक्षामा पहुँच कायम राख्न र बालबालिकाको सिकाइमा निरन्तरता दिन खर्च गरिने भएको छ ।
सहसचिव नेपालले अनुदान रकम महामारीले गर्दा प्रभावित बालबालिकाको सिकाइलाई निरन्तरता दिन र विद्यार्थी तथा शिक्षकमा परेको मनोवैज्ञानिक प्रभाव कम गर्न उपयोगी हुने बताए ।
नेपाल सरकारले ‘विद्यालय क्षेत्र विकास कार्यक्रम’ अन्तर्गत इन्टरनेसनल डेभलपमेन्ट एसोसियसन (आईडिए) को १८ करोड ५० लाख अमेरिकी डलर कर्जा सहायता सहिता एसियाली विकास बैंक, युरोपियन युनियन, फिनल्याण्ड, ग्लोबल पार्टनरसिप फर एडुकेसन, जापान अन्तराष्ट्रिय सहयोय एजेन्सी, नर्वे, युएसएआईडी, युनिसेफ र विश्व बैंकद्वारा प्रशासित आरईएसिएच मल्टि डोनर ट्रस्ट लगायतसँग वित्तीय सहयोग लिँदै आएको छ ।
न्यूयोर्क
विश्वका अधिकांश विकसित मुलुकले कोरोना भाइरसलाई नियन्त्रण उन्मुख बनाए पनि अमेरिकामा संक्रमण निरन्तर उकालो लागेको छ । राष्ट्रपति डोनाल्ड ट्रम्प प्रशासनले सुरु देखिनै ‘सामान्य’को संज्ञा दिएको भाइरसले अहिलेसम्म एक लाख ८७ हजार बढिको ज्यान लिइ सकेको छ ।
विश्व जनसंख्याको पाँच प्रतिशत हाराहारी हिस्सा ओगट्ने अमेरिकामा कोरोना भाइरसका कारण मृत्यु हुनेको संख्या भने २० प्रतिशत हाराहारी छ । सन् २०२० को अन्त्यसम्ममा अमेरिकामा मृत्यु हुनेको संख्या चार लाख एक हजार पुग्ने नयाँ प्रक्षेपण ह्वाइट हाउसका अधिकारीहरुले गरेका छन् । त्यति हुँदा पनि राष्ट्रपति ट्रम्प आफुले उत्कृष्ठ काम गरेको दावी गर्न छोडेका छैनन् । शुक्रबार ह्वाइट हाउसमा आयोजित पत्रकार सम्मेलनमा उनले दशौँ लाखको सम्भावित मृत्युलाई आफुले घटाएको दावी गरे ।
साथै उनले त्यही मञ्चबाट भाइरस संक्रमणबाट जोगिन पुर्ण रुपमा व्यवसाय खोल्न अस्वीकार गरेका मिसिगन, नर्थ क्यारोलिना लगायत राज्यका गभर्रनहरुप्रति रोष प्रकट समेत गरे । ट्रम्पले सुरुमा चीनबाट आएका केही व्यक्तिमा भाइरस देखिएको र यो छिटै हराएर जाने दावी गरेका थिए । मृतक र संक्रमितको संख्या निरन्तर बढेपछि उनले ६० हजारभन्दा धेरैले ज्यान नगुमाउने दावी गरे । मृतकको संख्या दुई लाख पुग्न लाग्दा भने चार लाख हाराहारीसम्मको मृत्यु हुनुलाई आफ्नो ‘गजब कामको परिणाम’ बताउन थालेका हुन् ।
अनुमान गरेजस्तै डिसेम्बर अन्त्यसम्ममा चार लाख बढिको मृत्यु हुन आगामी चार महिना भित्र थप दुई लाख २३ हजारले ज्यान गुमाउने पर्ने हुन्छ । त्यस अनुरुप दैनिक तीन हजार अमेरिकीसम्मको ज्यान जान सक्ने अनुमान गरिएको छ । जनस्वास्थ्य विज्ञहरुले सबैले अनिवार्य मास्क लगाएमा भने मृत्युदर आधामा घट्ने उल्लेख गरेका छन् । साथै मास्क लगाउन अटेर गरि निरन्तर संक्रमण विस्तार भयो भने चार महिनामा छ लाख बढिको ज्यान जान सक्ने उनीहरुको प्रक्षेपण छ ।
राष्ट्रपति ट्रम्पले नै मास्क विरोधी जमातलाई निरन्तर प्रवर्धन गरि रहेका छन् । पछिल्लो समय निरन्तर चुनावी सभा गर्न थालेका ट्रम्पले मास्क लगाएबापत आफ्ना प्रतिश्पर्धी जो बाइडेनलाई उडाउँदै आएका छन् । उनको सभामा आउनेहरु बिना मास्क खचाखच खाँदिएर बसेका हुन्छन् ।
काठमाडौं । एकै दिन हुने कोरोना भाइरसको संक्रमणमा आज रेकर्ड ब्रेक भएको छ । अर्कोतर्फ मृत्यु संख्यामा समेत आज सबैभन्दा धेरै मानवीय क्षति भएको दिन बनेको छ । कोराना भाइरसको संक्रमण निको भएर घर फर्कनेमा समेत आज सबैभन्दा बढी संख्या बन्न सफल भएको छ ।
स्वास्थ्य तथा जनसंख्या मन्त्रालयका अनुसार आज कोरोनाका धेरैजसो सूचकमा रेकर्ड कायम भएको छ । देशभर संक्रमण दर, भेन्टिलेटर रहनेको संख्या, काठमाडौंमा कोरोना, देशभरबाट डिस्चार्ज भएर घर फर्कनेको संख्यामा आज रेकर्ड बनेको हो ।
आज देशभर १ हजार ३ सय १९ संक्रमित थपिए । यो सबैभन्दा उच्च संख्या हो। पछिल्लो २४ घण्टामा १ हजार ३ सय ५४ जनाले कोरोनालाई जित्न सफल भएका छन् । यो पनि सबैभन्दा उच्च संख्या हो । आज काठमाडौं उपत्यकामा समेत संक्रमितको सबैभन्दा उच्च संख्या पुगेको छ । आज काठमाडौं उपत्यकामा ४ सय ५४ संक्रमित थपिए ।
आज देशभर कोरोना संक्रमण भएर निधन हुनेको संख्या १४ पुगेको छ । यो पनि सबैभन्दा उच्च संख्या हो । देशभर १ सय ७७ जना कोरोना संक्रमित विभिन्न अस्पतालको आइसियु र भेन्टिलेटरमा उपचाररत रहेको तथ्यांक मन्त्रालयले सार्वजनिक गरेको छ ।
काठमाडौं । अर्थमन्त्री डा. युवराज खतिवडाको राजिनामासागै रिक्त रहेको अर्थ र सञ्चार तथा सूचना प्रविधि मन्त्रालयको जिम्मा प्रधानमन्त्री केपी शर्मा ओलीले पाएका छन् । राष्ट्रपति विद्यादेवि भण्डारीबाट प्रधानमन्त्रीले सम्हाल्ने गरी यी दुई मन्त्रालयको कार्यभार तोकिएको हो ।
शुक्रबार अर्थ र सञ्चार तथा सूचना प्रविधिमन्त्री डा. युवराज खतिवडाले राजीनामा दिएपछि उनले सम्हाल्दै आएको मन्त्रालयको जिम्मा प्रधानमन्त्रीले नै सम्हाल्ने गरी तोकिएको राष्ट्रपति कार्यालयले उल्लेख गरेको छ ।
गत फागुनमा सांसद पद समाप्त भएका अर्थमन्त्री खतिवडा बीना सांसद पनि ६ महिना मन्त्री बन्न सक्ने संवैधानिक प्रावधानमा टेकेर पुनःअर्थमन्त्री बनेका थिए । राष्ट्रियसभा सदस्यको २ वर्षे कार्यकाल २०७६ फागुन २० गते सकिएको हो ।
त्यसै दिन राजीनामा दिएका खतिवडा २१ फागुनमा पुनः मन्त्री नियुक्त भएका हुन् । उनको आजै अर्थ र संचार मन्त्रालयमा बिदाई भयो । कठिन समयमा साथ दिएको भन्दै उनलाई आजै प्रधानमन्त्रीले समेत धन्यवाद दिएका थिए । खतिवडा ८ फागुन २०७६ यता संचारमन्त्रीको समेत जिम्मेवारीमा थिए ।
काठमाडौं । अर्थ तथा सञ्चार तथा सूचनामन्त्री डा। युवराज खतिवडाले पदबाट राजिनामा गरेका छन् । उनले प्रधानमन्त्री केपी शर्मा ओलीलाई राजिनामा बुझाएका हुन् ।
त्यसअगाडि उनी अर्थ मन्त्रालयमा आयोजित बिदाई कार्यक्रममा सहभागी भएका थिए । उनको अर्थमन्त्रीको रुपमा रहेको ६ महिने कार्यकाल भोलि सकिँदैछ ।
उनले बिहिबारको मन्त्रिपरिषद् बैठकमा राजीनामा दिने घोषणा गरेका थिए । बैठकमा प्रधानमन्त्री ओलीले मन्त्री खतिवडालाई अहिलेसम्मको जिम्मेवारीका लागि धन्यवाद दिएका थिए।
सत्तारुढ नेपाल कम्युनिस्ट पार्टी सचिवालय बैठकले बिहीबार मात्र राष्ट्रियसभामा गौतमलाई सिफारिस गर्ने निर्णय गरेको थियो । नेकपाको यो निर्णयसँगै खतिवडाको संसद बन्ने बाटो बन्द भएको थियो ।
काठमाडौं। नेपालमा कोरोना भाइरसको संक्रमणबाट थप १४ जनाको मृत्यु भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार पछिल्लो २४ घण्टामा कोरोना संक्रमणबाट थप १४ जनाको मृत्यु भएको हो ।
उनका अनुसार काठमाडौंका ८२, ६७, २२ र चितवनकी ३५ वर्षीया महिला तथा सप्तरी ५५–५५ वर्षीय, धनुषाका ६५, कास्कीका ३१, नवलपरासीका ३७, प्यूठानका ५८, रुपन्देहीका ७८, पाल्पाका ६३ र सुर्खेतका ४२ वर्षीय पुरुषको उपचारका क्रममा मृत्यु भएको हो। योसँगै कोरोना संक्रमणबाट नेपालमा मृत्यु हुनेको संख्या २७१ पुगेको छ।
काठमाडौं । नेपालमा पछिल्लो २४ घण्टामा थप १३ सय ५९ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा। जागेश्वर गौतमको अनुसार २४ घण्टामा गरिएको १३ हजार ६ सय ३८ जनाको पीसीआर परीक्षणमा थप १३ सय ५९ जनामा कोरोना संक्रमण पुष्टि भएको हो ।
यो सहित नेपालमा कोरोना संक्रमित हुनेको संख्या ४४ हजार ३३६ जना पुगेको छ।
पछिल्लो २४ घण्टामा थप १३५४ कोरोना संक्रमणमुक्त भएका छन्। योसहित नेपालमा हालसम्म २५ हजार ५ सय ६१उपचारपछि निको भएका छन्।
वासिङ्टन । कोरोना भाइरस महामारीका कारण संघीय सरकारको खर्च व्यापक वृद्धि भएका कारण संयुक्तराज्य अमेरिकाको कुल बजेट घाटा ३३ खर्ब डलर पुग्न लागेको अनुमान गरिएको छ ।
अमेरिकी बजेट तयार पार्ने कङ्ग्रेस बजेट कार्यालयका अनुसार अर्थतन्त्रलाई जीवन्त राख्न सरकारले गरेका खर्चका कारण संघीय बजेटमा २० खर्ब डलरभन्दा बढी भार थप भएको छ ।
बजेट घाटाको अंक बढ्नुको अर्थ हो, अर्को वर्ष संघीय ऋण वार्षिक कूल गार्हस्थ्य उत्पादनभन्दा बढी हुनेछ । यो स्थितिमा अमेरिका यसअघि दोस्रो विश्वयुद्धपछि मात्र पुगेको थियो । त्यसबखत कुल राष्ट्र ऋण समग्र अमेरिकी अर्थतन्त्रको आकारभन्दा बढी थियो ।
बुधबार सार्वजनिक गरिएको ३३ खर्ब डलरको अंक सन् २०१९ को कुल घाटाभन्दा तीन गुणा बढी हो । कोरोना भाइरस महामारीबाट सिर्जित समस्यापछि घोषणा गरिएका चार पटकका राहत प्याकेजका कारण सरकारको कुल खर्च ६६ खर्ब डलर पुगेको छ, र यो रकम सन् २०१९ को भन्दा २० खर्ब डलरभन्दा बढी हो ।
आर्थिक मन्दीका कारण राजश्वमा कमी आएको छ । व्यक्तिगत आयकरको संकलन गत वर्षको भन्दा ११ प्रतिशतले न्यून छ । कर्पोरेट राजश्व पनि ३४ प्रतिशतले घटेको छ ।
कोरोना भाइरसका कारण गरिएको लकडाउनले समग्र अर्थतन्त्रमा व्यापक असर पारेको भन्दै संसद र राष्ट्रपति डोनाल्ड ट्रम्पले व्यवसायीलाई अनुदान, बेरोजगारी भत्ता, १,२०० डलर प्रत्येक व्यक्तिका खातामा सोझै भुक्तानी र अरु राहत योजनाले छोटो अवधिका लागि भए पनि अर्थतन्त्रलाई जोगाउन मद्दत गरेको थियो ।
अधिकांश अर्थशास्त्रीहरु अर्थतन्त्र ठूलो संकटमा परेका बखत ठूलो मात्रामा राष्ट्रऋण उठाउनु स्वाभाविक रहेको बताएका छन् ।तर अहिले सांसदहरु र ह्वाइट हाउसबीच पाँचौं राहत प्याकेजका बारेमा गम्भीर विचारविमर्श जारी छ । डेमोक्राट पार्टीको नियन्त्रण रहेको कंग्रेसले गत मे महिनामा ३५ खर्ब डलरको राहत योजना पारित गरेको थियो ।
यस वर्षको अन्त्यसम्ममा राष्ट्रिय ऋण अमेरिकाको कुल गार्हस्थ्य उत्पादनको ९८ प्रतिशत पुग्नेछ, र यो वस्तु तथा सेवाको कुल अंक बराबर हो ।बजेट कार्यालयले सन् २०२१ मा राष्ट्रऋण कुल जिडिपीको १०० प्रतिशत पुग्ने जनाएको छ । आगामी दशकमा राष्ट्रऋण करिब १३० खर्ब डलर पुग्नेछ ।
एजेन्सी
काठमाडौं । अब निजी प्रयोगशालामा कोरोना पीसीआर परीक्षण गर्दा रिपोर्ट पोजेटिभ आए पनि कोरोना बीमा दाबी भुक्तानी नपाउने भएका छन् ।
बीमा समितिले कारोना बीमा कार्यविधिलाई देखाउँदै निजी ल्याबबाट परीक्षण गर्नेलाई दाबी भुक्तानी नदिनबीमा कम्पनीहरुलाई निर्देशन दिएको हो ।
पछिल्लो समय निजी प्रयोगशालाबाट नक्कली रिपोर्ट ल्याएर दाबी भुक्तानी गर्ने क्रम बढेको आशंका गर्दै समितिले यस्तो निर्देशन दिएको हो ।
यो निर्देशनसँगै उत्साहपूर्वक कोरोनाबिमा गराउनेहरुले आफूहरु ठगिएको महसुस गरेका छन् ।
सरकारी ल्याबबाट गरिएको परीक्षणमा नेगेटिभ आउने र सोही व्यक्तिले निजी ल्याबमा परिक्षण गर्दा रिपोर्ट पोजेटिभ आएको देखिएको भन्दै समितिले निजी प्रयोगशालाको परीक्षणलाई मान्यता नदिन भनेको हो ।
बीमा दाबी भुक्तानी लिन सरकारी निकायले पीसीआर पोजेटिभ भएको पुष्टि गरेको हुनुपर्छ । यसैगरी निजी ल्याबबाट परीक्षण गरे पनि सरकारी निकायले रोग पुष्टि गरेको खण्डमा बीमा कम्पनीबाट दाबी भुक्तानी पाउने समितिले जनाएको छ ।
कोरोना बीमा मापदण्डको परिच्छेद ३ मा प्रष्ट रुपमा नेपाल सरकार स्वास्थ्य मन्त्रालय अन्तर्गतका निकायबाट पीसीआर परीक्षण गर्दा कोरोना भाइरसको संक्रमण देखिएको प्रमाण पेश भएमा ७ दिन दिनभित्र दाबीभुक्तानी गर्नुपर्ने भनिएको छ ।
कोरोना बीमाको बीमाङक रकम र बीमा शुल्क एक लाख रुपैयाँ र ५० हजार रुपैयाँ गरी दुई प्रकारको बीमाङक कायम गरिएको छ ।
एक लाख बीमाङक कायम भएको बीमालेखका लागि प्रति व्यक्ति एक हजार रुपैयाँ र ५० हजार रुपैयाँ बीमाङकका लागि प्रतिव्यक्ति पाँच सय रुपैयाँ बीमा शुल्क कायम गरिएको समितिले जनाएको छ।
समितिले संगोलमा बसेका परिवारका सम्पूर्ण सदस्यहरुको सामुहिक बीमा गरिएको खण्डमा एक लाख रुपैयाँ बीमाङका लागि प्रति व्यक्ति ६ सय रुपैयाँ र ५० हजार बीमाङकका लागि ३ सय रुपैयाँ कायम गरेको छ।
मापदण्ड बमोजिम सामूहिक कोरोना बीमा गर्दा लाग्ने बीमशुल्कमा नेपाल सरकारले अनुदान उपलब्ध गराउनेछ । तर सरकारी कर्मचारीको सामूहिक कोरोना बिमा गर्दा चाहिँ सरकारले सतप्रतिशत बिमाशुल्क अनुदानको रुपमा उपलब्ध गराउने गर्छ ।
यही बुँदालाई थप प्रष्ट्याउँदै बिमकहरुलाई पत्र पठाइएको बीमा समितिले जनाएको छ ।
बीमालेख खरिद गर्नका लागि आवश्यक न्यूनतम सर्तहरु
– नेपाली लागरिक हुनुपर्ने ।
– कुनै नेपाली नागरिक भारत वा तेस्रो मुलुकबाट नेपाल फर्केको रहेछ भने १५ दिन अनिवार्य रुपमा क्वारेन्टिनमा र बाँकी १५ दिन आफ्नो परिवारसँग गरी कुल ३० दिन बसेको सम्बन्धित स्थानीय तहले प्रमाणित गरेको कागजात ।
– सामूहिक कोरोना बीमाका लागि आफ्नो एकाघर परिवारका सदस्यहरु उल्लेख गरिएको
– स्वघोषणासहित सम्बन्धित स्थानीय तहले प्रमाणित गरेको कागजात
– एकल वा सामूहिक कोरोना बीमा खरिद गर्न चाहने व्यक्ति वा परिवार विगत ३० दिनसम्म नेपालमा बसोबास गरेको स्थानीय तहले प्रमाणित गरेको कागजात ।
बीमा लेख खरिद गर्नका लागि बीमित नेपाली नागरिक हुनुपर्ने, कुनै नेपाली नागरिक भारत वा तेस्रो मुलुकबाट नेपाल फर्केको रहेछ भने १५ दिन अनिवार्य रूपमा क्वारेन्टाइनमा र बाँकी १५ दिन आफ्नो परिवारसँग गरी कुल ३० दिन बसेको सम्बन्धित स्थानीय तहले प्रमाणित गरेको कागजात हुनुपर्ने न्यूनतम सर्त तोकिएको छ ।
त्यस्तै, कोरोना बीमा दावि भुक्तानीका लागि कोरोना बीमालेख खरिद गरेको १५ दिन पश्चात् र नेपाल सरकार स्वास्थ्य मन्त्रालय अन्तर्गतका निकायबाट पिसिआर परीक्षण गर्दा कोरोना भाइरस संक्रमण भएको पाइएमा बीमालेख बमोजिमको रकम भुक्तानी प्राप्त गर्न सकिने व्यवस्था मिलाइएको छ ।
सो कार्यका लागि बीमा कम्पनीले दाबीको निवेदन प्राप्त गरेको ७ दिन भित्र बीमितलाई दाबी भुक्तानी गर्नुपर्नेछ । यदि दाबी भुक्तानी नहुदै बीमितको मृत्यु भएमा बीमितले इच्छाएको व्यक्ति वा कानूनी हकवालालाई भुक्तानी गर्नु पर्नेछ ।
सामूहिक कोरोना बीमाका लागि आफ्नो एकाघर परिवारका सदस्य उल्लेख गरिएको स्वघोषणासहित सम्बन्धित स्थानीय तहले प्रमाणित गरेको कागजात तथा एकल वा सामूहिक कोरोना बीमा खरिद गर्न चाहने व्यक्ति वा परिवार विगत ३० दिनसम्म नेपालमा बसोबास गरेको स्थानीय तहले प्रमाणित गरेको कागजात हुनुपर्ने समितिले जनाएको छ ।
बागलुङ । बुधबार राति आएको बाढी र पहिरोमा परी हराइरहेका बागलुङ, ढोरपाटन नगरपालिका–९ बोबाङका स्थानीयको खोजी आज पनि शुरु भएको छ । यस घटनामा १४ जनाको शव फेला परिसकेको छ । अझै २४ जना वेपत्ता छन् । त्यसमध्ये चार जनाको शव सनाखत भइसकेको प्रहरीले जनाएको छ ।
प्रहरीका अनुसार ढोरपाटन–९ की २६ वर्षकी केशमाया विक, ४५ वर्षीय विरे विक, २२ वर्षीय जीवन विक र ११ वर्षीय डल्ले विकको सनाखत भएको छ । शव भेटिए पनि १० जनाको सनाखत हुन सकेको छैन । बाढीले बगाएको शव क्षतविक्षत अवस्थामा भेटिएका कारण पहिचानमा समस्या आएको हो ।
उनीहरुको शव बुर्तिबाङस्थित प्राथमिक स्वास्थ्य केन्द्रमा राखिएको छ । पहिचान भएकाहरुको पोष्टमार्टमको काम समेत शुक्रबार हुने भएको छ । वेपत्ता भएकाको खोजीमा सेना, प्रहरी र स्थानीय बिहानैबाट जुटेका छन् ।
बगाएकाहरुको शव अधिकारीचौर, बुर्तिवाङ र बडिगाड गाउँपालिकासम्म पुगेको अवस्थामा फेला परेको छ । पहिरोले फलेघर र सुपुर्दुङमा एक दजर्न बढी घर बगाएको । वडा नं ८ सम्म कुल ४० घर पूर्ण रुपमा क्षतिग्रस्त बनेका छन् ।
काठमाडौं । रातो मच्छिन्द्रनाथको रथ तान्ने विषयलाई लिएर विहीबार दिनभर ललितपुर तनावग्रस्त रह्यो । मौलिक संस्कृति मनाउने सन्दर्भमा लामो समयदेखि रोक लागेपछि स्थानीय युवा आक्रोसित बनेका थिए । अब भने जात्रा छोटो विधिबाट सम्पन्न गर्ने विषयमा सहमति जुटेको छ ।
ललितपुर जिल्लाका प्रमुख जिल्ला अधिकारी नारायणप्रसाद भट्टको अध्यक्षमा बिहीबार साँझ बसेको बैठकमा सहमति जुटेको हो । सहमतिअनुसार आज क्षमा पूजा गरिनेछ । आइतबार २१ गते सुरक्षा सावधानीसहित रथ तान्न शुरु गरिनेछ । यो बेला ठूलो भीड जम्मा हुन दिइने छैन ।
२२ गते साइत हेर्ने र २६ गते मूर्ति बुङ्गमतीमा पुर्याएर मन्दिरमा बिराजमान गराउने गरी सहमति जुटेको हो । बैठकमा रातो मच्छिन्द्रनाथको जात्रामा प्रत्यक्ष सहभागी हुने १९ वटा सङ्घसंस्थाका प्रतिनिधि, ललितपुरका सांसद, सुरक्षा निकाय र स्थानीय जनप्रतिनिधि सहभागिता थिए ।
यता, शुक्रबार भने अप्रिय घटना रोक्न प्रशासनले ललितपुरमा कडाई गरेको छ । ललितपुरको चक्रपथभित्र कर्फ्यु जारी भएको छ । यो आदेश राती १० बजेसम्म कायम रहनेछ ।
ललितपुर । बिहीबार मत्स्येन्द्रनाथको रथ तान्ने विषलाई लिएर भएको विवादले उग्र रुप लिँदा पुल्चोक र पाटन क्षेत्र तनावग्रस्त रह्यो । एक प्रहरीमाथि निर्घात कुटपिट भयो । अन्य स्थानीय र प्रहरीसमेत घाइते भए । यसै सन्दर्भलाई लिएर थप क्षति नहोस भनी आज भने ललितपुरमा कर्फ्यू आदेश जारी भएको छ ।
जिल्ला प्रशासन कार्यालय, ललितपुरले चक्रपथ क्षेत्रभित्र कर्फ्यू आदेश जारी गरेको हो । रातो मत्स्येन्द्रनाथको रथयात्रालाई लिएर पुल्चोक क्षेत्रमा दिनभर तनाव भएपछि प्रशासनले बिहान ४ बजेदेखि राति १० बजेसम्म कर्फ्यू आदेश जारी गरेको सहायक प्रमुख जिल्ला अधिकारी ललितबहादुर बस्नेतले जानकारी दिएका छन् ।
उनका अनुसार कुनै पनि हुलहुज्जत गर्ने र आदेश विपरितको काम गरेमा प्रहरीलाई गोली हान्ने सम्मको अधिकार दिइएको छ । सोहीकारण सर्वसाधारणलाई घरमै बस्न आह्वान गरिएको छ ।
कोरोना भाइरसको महामारीसँगै काठमाडौं उपत्यकामा निषेधाज्ञा जारि गरिएको छ । निषेधाज्ञा तोड्दै विहीबार पुल्चोक र पाटन क्षेत्रमा ठूलो संख्यामा सर्वसाधारण बाहिर निस्किएका थिए ।
प्रभात भट्टराई/न्यूयोर्क
अमेरिकी राष्ट्रपति निर्वाचन आउन ठिक दुई महिना बाँकी रहँदा डेमोक्रेटिक प्रत्याशी जो बाइडेनको लोकप्रियता उकालो लागेको छ । अगष्ट अन्तिम साता सम्पन्न रिपब्लिकन राष्ट्रिय सम्मेलनमा ‘कानूनी शासन’को चर्को वकालत गरेपनि राष्ट्रपति डोनाल्ड ट्रम्पले मतदाताको भरोसा जित्न सकेका छैनन् ।
दुबै दलको सम्मेलन पश्चात सार्वजनिक भएका अधिकांश मत सर्भेक्षणमा बाइडेनले ट्रम्पसँग प्रष्ट अग्रता लिएका छन् । त्यसमा पनि बुधबार सम्पन्न राष्ट्रिय एवं राज्य स्तरका कैयन् उच्च कोटीका सर्भेक्षणमा बाइडेनले उत्साहजनक अग्रता हासिल गरेका छन् । डेमोक्रेटिक राष्ट्रिय सम्मेलनको पूर्व सन्ध्यामा सिएनएनको मत सर्भेक्षणमा बाइडेन ट्रम्पभन्दा चार प्रतिशत बिन्दुले मात्र अघि थिए । बुधबार सार्वजनिक सिएनएनको सर्भेक्षणमा बाइडेनले आठ प्रतिशत बिन्दुको अग्रता लिएका छन् । यो सर्भेक्षणमा बाइडेनलाई ५१ प्रतिशतले मतदिने बताएका हुन् ।
पछिल्लो समय सार्वजनिक भएका अधिकांश सर्भेक्षणमा बाइडेनलाई ५० प्रतिशत या त्यसको आसपास समर्थन मिलेको छ । जुन, राष्ट्रपतिय निर्वाचन जित्न काफि हुन्छ । बुधबारै सार्वजनिक कुन्निपियाक विश्वविद्यालयको सर्भेक्षणमा बाइडेनले ५२ प्रतिशत मतदाताको समर्थन पाउदैँ ट्रम्पसँग १० प्रतिशत बिन्दुको अग्रता हासिल गरेका छन् । यस्तै इकोनोमिष्ट, लस एन्जलस टाइम्स लगायतको सर्भेक्षणमा पनि बाइडेनलाई समर्थन गर्ने मतदाताको संख्या ५० प्रतिशत माथि छ र ट्रम्पसँग दोहोरो अंकको अग्रता लिएका छन् ।
त्यति मात्र होइन बुधबार सार्वजनिक भएका महत्वपुर्ण ‘स्विङ’ राज्यको सर्भेक्षण पनि बाइडेनले सानदार अग्रता लिएका छन् । सन् २०१६ मा ट्रम्पले जितेका विसकनसन, एरिजोना र नर्थ क्यारोलिनामा बाइडेनले प्रष्ट अग्रता लिएको सर्भेक्षण फक्स न्यूजले सार्वजनिसक गरेको छ । यी राज्य गुमाएमा ट्रम्पको दोस्रो कार्यकाल सपना पुरा हुन कठिन पर्छ । त्यसमा पनि लामो समय ‘रेड स्टेट’को रुपमा रहेको एरिजोनामा बाइडेनले ४९ प्रतिशत मतदाताको समर्थन सहित ट्रम्पसँग नौ प्रतिशत बिन्दुको अग्रता लिएका छन् । विसकनसन र एरिजोनाका ५० प्रतिशत मतदाताले बाइडेनलाई मत दिने उल्लेख गरेका छन् । लामो समय डेमोक्रेटिक राज्यको रुपमा रहेको विसकनसनमा चार बर्ष अघ ट्रम्पले नाटकीय जित निकाल्दै ह्वाइट हाउस यात्रा सहज पारेका थिए । फक्स न्यूजको सर्भेक्षणमा बाइडेन ट्रम्पभन्दा आठ प्रतिशत बिन्दुले अगाडि छन् । फाइभथर्टीएट डट कमले पछिल्लो समयका सबै सर्भेक्षणहरुको औषत आँकडा निकाले अनुसार बाइडेन ५०.३ प्रतिशत समर्थन सहित ट्रम्पभन्दा ७.३ प्रतिशत बिन्दुले अघि छन् । २०१६ का अधिकांश सर्भेक्षणमा डेमोक्रेटिक प्रत्याशी हिलारी क्लिन्टन ट्रम्पभन्दा अघि रहे पनि उनले प्रायः कहिल्यै ५० प्रतिशत समर्थन पुर्याउन सकेकी थिइनन् । अनिर्णित रहेका १५ प्रतिशत हाराहारी मतदाताले अन्तिम समयमा ट्रम्पलाई रोज्दा उनी निर्वाचित हुन पुगेका थिए । यसपाली बाइडेनले लगातार ५० प्रतिशत माथिको समर्थन कायम राखेका छन् ।
दुबै दलको राष्ट्रिय सम्मेलन पछि बाइडेन प्रति सकारात्मक धारणा (फेबरेविलिटी) राख्ने अमेरिकीको अमेरिकीको संख्या बढेको छ भने ट्रम्पको अवस्था उस्तै छ । रियल क्लियर पोलिटिक्सको औषत तथ्यांक अनुसार बाइडेनको फेबरेविलिटी धनात्मक छ भने ट्रम्प ठूलो अन्तरमा ऋणात्मक फेबरेविलिटीको अवस्थामा छन् । बाइडेनलाई मन पराउनेको औषत संख्या ४८ .३ प्रतिशत छ भने मन नपराउने ४६.६ प्रतिशत छन् । ट्रम्प प्रति सकारात्मक धारण राख्नेको औषत संख्या भने ४१.९ प्रतिशत मात्र छ । उनलाई मन नपराउने भने ५५. ६ प्रतिशत छन् । सिएनएनको सर्भेक्षण अनुसार दुबै दलको सम्मेलन पछि बाइडेनको फेवरेविलिटी चार प्रतिशत बिन्दुले बढेर ५२ प्रतिशत पुगेको छ भने ट्रम्पको एक प्रतिशतले बिन्दुले घट्दै ४२ प्रतिशतमा झरेको छ ।
फाइभथर्टीएट प्रक्षेपण अनुसार बाइडेनले राष्ट्रपति चुनाव जित्ने सम्भावना ६९ प्रतिशत छ भने ट्रम्पको ३० प्रतिशत मात्र । यस्तै इकोनोमिष्टले बाइडनेको सम्भावना ९० प्रतिशत हाराहारी देखाएको छ । कोरोना भाइरस संक्रमणलाई चित्तबुझ्दो गरि सम्बोधन गर्न नसकेको भन्दै बहुमत अमेरिकी ट्रम्पसँग असन्तुष्ट छन् । त्यससँगै रंगभेद बिरुद्ध अमेरिकाभर उठेका आन्दोलनलाई न्यायीक दृष्टिले हेर्नुको साटो एकोहोरो हिंसाको रटान लगाएका कारण ट्रम्पप्रतिको अमेरिकी भरोसा थप खस्किन पुगेको छ । सन् २०१६ मा ट्रम्पको पक्षमा उभिएका ६५ बर्ष माथिका मतदाताले यसपाली उनको साथ छोडेको सर्भेक्षणहरुले देखाएका छन् । साथै कामकाजी बर्ग र महिलाहरु पनि बाइडेनको पक्षमा उभिएका छन् ।
मतदाताको समर्थन बढेसँगै बाइडेन अगष्टमा रेकर्ड कायम गर्ने गरि चन्दा उठाउन पनि सफल भएका छन् । उनको क्याम्पेनले ३६४.५ मिलियन डलर चन्दा एक महिनाको अवधिमा उठाएको हो । एक महिना भित्र यति रकम कुनै पनि उम्मेद्वारको क्याम्पेनले अहिलेसम्म उठाउन सकेको थिएन । बाराक ओबामाले सन् २००८ को सेप्टेम्बरमा २०० मिलियन डलर संकलन गरि रेकर्ड बनाएका थिए । काला जातिबाट पहिलो महिला उपराष्ट्रपति उम्मेद्वारको रुपमा सिनेटर कमला ह्यारिसलाई चयन गरेसँगै बाइडेनलाई चन्दाको ओइरो लागेको हो ।
बागलुङ । बागलुङको ढोरपाटन नगरपालिकास्थित भूजी खोलामा आएको बाढीबाट वेपत्ता हुनेको संख्या ४१ पुगेको छ । प्रहरीका अनुसार उनीहरुमध्ये १२ जनाको शव फेला परेको छ । जिल्ला प्रहरी कार्यालयका अनुसार खोजी कार्य जारी छ ।
सोहीकारण अझै धेरै मानिस हराएको आशंका गरिएको छ । घटनास्थलमा धेरै ठूलो मानवीय क्षति भएको प्रहरीले जनाएको छ । सोहीकारण उद्धार र राहतमा समेत कठिनाई भएको छ ।
प्रहरीका अनुसार शव फेला परेका मानिसको समेत पहिचान हुन सकेको छैन । शवहरु चिन्न नसक्ने अवस्थामा छन् । प्रहरीका अनुसार बाढीले ३१ घरमा पूर्ण रुपमा क्षति गरेको छ । स्थानीय विद्यालय, लघु जलविद्युत् तथा झोलुङ्गे पुलसमेत बाढीले बगाएको छ।
बिहीबार ढोरपाटनमा बाढीले बगाएर हराइरहेकामध्ये तीन जनाको शव भने गुल्मीको बढीघाट खोलामा फेला परेका छन् । मुसिकोट नगरपालिका –५ इन्द्रेगौंँडा ७ को सुदी र चन्द्रकोट गाउँपालिका –८ तीनसिमलस्थित बढिघाट खोला किनारमा शव फेला परेको हो । बाढीग्रस्त क्षेत्रमा आज गृहमन्त्रीसहितको टोली हेलिकोप्टरबाट जान उडेपनि प्रतिकुल मौसमका कारण जान भने सकेन । काठमाडौंबाट उडेको टोली पोखरामा पुगेर रोकिएको छ ।
काठमाडौं । अर्थमन्त्री डा. युवराज खतिवडा सरकारबाट बाहिरिने पक्का भएको छ । नेकपा सचिवालयले राष्ट्रिय सभामा बामदेव गौतमलाई पठाउने निर्णय गरेसँगै खतिवडाको पदसमेत अब समाप्त हुने निश्चित भएको हो । राष्ट्रपतिबाट मनोनित हुने एउटा पद खाली रहेको थियो ।
प्रधानमन्त्री केपी शर्मा ओलीले आफ्नो प्रिय मन्त्री खतिवडालाई नै निरन्तरता दिने मुड बनाएर अन्तिम समयसम्म कसरत गरेका थिए । तर, उनको चाहनामा सचिवालय बाधक बनेको छ । अर्कोतर्फ बामदेव गौतमको चाहनाका कारण समेत प्रधानमन्त्रीको इच्छा पुरा हुन पाएन । यससँगै अब अर्थमन्त्री पद पुनः खाली हुने भएको हो ।
अर्थमन्त्री खतिवडाको कार्यअवधि भदौ २० मा सकिनेछ । उनी राष्ट्रपतिबाट मनोनित भएर राष्ट्रियसभामा आएका हुन् । सांसदको दुई वर्षे कार्यकाल गत फागुनमै सकिएको थियो । ६ महिना सांसद बीना समेत मन्त्री बन्न पाउने प्रावधानका कारण उनी मन्त्री दोस्रो पटक मन्त्री बनेका हुन् ।
खतिवडाले अर्थ र सञ्चार तथा सूचना प्रविधि मन्त्रालयको समेत जिम्मेवारी सम्हालेका छन् । कुल तीन वटा बजेट डा. खतिवडाले ल्याएका छन् । दुई तिहाई सरकारको अर्थमन्त्रीका रुपमा खतिवडासँग ठूलो अपेक्षा थियो । तर, उनी यो अपेक्षामा खरो उत्रन भने सकेनन् । अर्थमन्त्रीका रुपमा उनले विगतलाई निरन्तरता त दिए, तर सम्झनालायक काम भने गर्न सकेनन् ।
काठमाडौं । सत्तारुढ नेपाल कम्युनिष्ट पार्टी (नेकपा) को सचिवालयले उपाध्यक्ष वामदेव गौतमलाई राष्ट्रियसभा सदस्यमा मनोनित गर्न सिफारिस गर्ने निर्णय गरेको छ।
प्रधानमन्त्री निवास बालुवाटारमा सकिएको सचिवालय बैठकले राष्ट्रियसभा सदस्यमध्ये राष्ट्रपतिले मनोनित गर्ने खाली एक सिटमा गौतमलाई मनोनयन गर्न सिफारिस गर्ने निर्णय गरेको हो ।
सचिवालयको निर्णयपछि अब सरकारले गौतमलाई राष्ट्रियसभा सदस्यमा मनोनित गर्न राष्ट्रपतिलाई सिफारिस गर्नेछ।
राष्ट्रपतिले मनोनित गर्ने राष्ट्रियसभा सदस्यमा गौतम वा खतिवडा कसलाई सिफारिस गर्ने भन्ने विषयमा नेकपामा विवाद थियो ।
काठमाडौं । नेपालमा पछिल्लो २४ घण्टामा थप ११ सय २० जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा गरिएको परीक्षणमा ११ सय २० जनामा कोरोना संक्रमण पुष्टि भएको हो ।
यो सहित नेपालमा कोरोना संक्रमित हुनेको संख्या ४२ हजार ८७७ जना पुगेको छ।
पछिल्लो २४ घण्टामा थप ९ सय १७जना कोरोना संक्रमणमुक्त भएका छन्। योसहित नेपालमा हालसम्म २४ हजार २०७ उपचारपछि निको भएका छन्।
निषेधाज्ञा उल्लंघन गर्दै रातो मच्छिन्द्रनाथको रथ तान्न थालियो
काठमाडौं । उपत्यकामा निषेधाज्ञाकै बीच वर्षा र सहकालका देवता मानिने रातो मच्छिन्द्रनाथको रथ तान्न शुरु गरिएको छ ।
बिहीबार बिहान साढे ९ बजेतिर भेला भएका युवाहरुले ललितपुरको पुल्चोकमा रथ तान्न शुरु गरेपछि सरोकारवालालाई नै अलमलमा परेका छन् । रथ तान्नकालागि सर्वसाधारणहरुको पनि उल्लेख्य सहभागिता रहेको थियो
युवाहरुले असोज २ गतेदेखि मलमास सुरु हुने र रथयात्रा अनिश्चित हुने भन्दै जनस्वास्थ्यको मापदण्ड पालना गर्दै रथयात्रा गर्न माग गर्दै प्ले कार्ड सहितको प्रदर्शन समेत गरेका छन् ।
कोरोना संक्रमण नफैलियोस् भनेर भदौ २४ गतेसम्मका लागि उपत्यका ९काठमाडौं, भक्तपुर र ललितपुर० मा निषेधाज्ञा जारी गरिएको छ ।
सर्वसाधारणको भिड नहोस् र संक्रमण नफेलियोस् भनेर तीनवटै जिल्लाका प्रमुख जिल्ला अधिकारीहरुको छलफलले हिजो ९बुधबार० मात्रै भदौ २४ गतेसम्मका लागि निषेधाज्ञा जारी गरिएको हो ।
तर रथयात्राको विषयमा न त गुठी संस्थानले कुनै निर्णय गरेको छ न त सरोकारवाला निकायलाई नै यसबारे जानकारी छ ।
गत असार १० गतेदेखि निर्माण सुरु भएको रथमा मत्स्येन्द्रनाथको मूर्ति रथारोहण गरिसकिएको छ । तर कोरोना संक्रमणको जोखिमका कारण अहिलेसम्म रथयात्रा हुन सकेको छैन ।
बागलुङ । बागलुङको ढोरपाटन नगरपालिका वडा नं ७, ८ र ९ मा नदी किनारमा बाढीले घर बगाउँदा वेपत्ता भएका मध्ये ८ जनाको शव भेटिएको छ । तटीय बस्तीमा बाढी पसेपछि ठूलो मानवीय क्षति भएको छ । खोजीका क्रममा ८ जनाको शव भेटिएको प्रहरीले जनाएको छ । सकुर्दुङको भूजी खोलाले वितण्डा मच्चाएको हो ।
बाढीमा १३ जना बेपत्ता भएको प्रहरीको अनुमान छ । बाढीले १३ घर बगाएको छ । घटना स्थलमा ८ जनाको शव फेला परेपनि उनीहरुको सनाखत भने भइसकेको छैन । रातको १२ बजेतिर ठूलो पहिरोसँगै यहाँ बाढी बस्तीमा पसेको थियो ।