काठमाडौं । नेपालमा पछिल्लो २४ घण्टामा थप ४ सय ६४ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा पिसिआर विधिबाट गरिएको ७ हजार ९ सय २६ नमुना परिक्षणमा ४ सय ६४ जनामा कोरोना संक्रमण पुष्टि भएको हो ।
योसँगै नेपालमा कोरोना संक्रमितको संख्या २२ हजार २१४ पुगेको छ । छ ।
पछिल्लो २४ घण्टामा ४ सय २५ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १५ हजार ८१४ पुगेको छ।
कुल संक्रमितमध्ये ७० जनाको मृत्यु भएको छ।
काठमाडौं । काठमाडौं उपत्यकामा कोरोना भाइरसको जोखिम कम गर्नका लागि १५ दिन अत्यावश्यकबाहेकका कार्यालय बन्द हुने भएको छ ।
उपत्यकाका तीनै जिल्लाका प्रमुख जिल्ला अधिकारी (सीडीओ)को बैठकले कोरोना संक्रमण बढेको भन्दै आइतबारदेखि लागु हुनेगरी बन्द गर्ने निर्णय गरेका हुन् ।
शुक्रबार उपत्यकाका तीन जिल्लाका प्रमुख जिल्ला अधिकारीहरु र उद्योग वाणिज्य संघ, सुरक्षा निकायका प्रमुख तथा स्वास्थ्य कार्यालयका प्रमुखसहितको बैठकलेबाट उक्त निर्णय भएको स्रोतले जनाएको छ ।
उक्त अवधिभरमा जिल्ला प्रशासन कार्यलयबाट हुने केही विशेष कामबाहेकका सेवा बन्द हुने छ । जिल्ला प्रशासन कार्यलयबाट सार्वजनिक मुद्दा, पास वितरण र शान्ति सुरक्षाको काममात्रै हुने छ ।
बैंठकले स्वास्थ्य सुरक्षाको मापदण्डलाई कडाइको साथ पालना गराउने र स्थानीय तहहरुलाई कोरोना महामारीबाट बच्नको लागि तयारी अवस्थामा रहन आग्रह गर्ने निर्णय पनि भएको जनाइएको छ ।
काठमाडौं उपत्यकामा सरकारी कार्यालय, सुरक्षा निकाय तथा बैंकको कर्मचारीहरुमा संक्रमण बढ्दै गएको छ । संक्रमणको दर बढेको र त्यसमा पनि सरकारी कार्यालयहरुमा बढी देखिन थालेपछि यस्तो सरकारले उच्च सुरक्षा सतर्कता अपनाउन भनेको छ ।
काठमाडौं । नेपाली बजारमा सुन र चाँदीको भाउमा ऐतिहासिक रेकर्ड कायम भएको छ ।
नेपाल सुनचाँदी व्यवसायी महासंघको अनुसार अघिल्लो दिनको तुलनामा प्रतितोला सुनको भाउ प्रतितोला एक हजार रुपैयाँले बढेर नयाँ रेकर्ड कायम भएको छ भने चाँदीमा ६० रुपैयाँ तोलामा बढेको छ ।
शुक्रबारको लागि छापावाल सुनको मूल्य एक लाख ३ हजार ५ सय रुपैयाँ निर्धारण भएको महासंघले जनाएको छ । तेजावी सुन एक लाख ३ हजार रुपैयाँ तथा चाँदी १ हजार ४ सय ५ रुपैयाँ तोकेको छ ।
यस्तै चाँदीको भाउले पनि आज रेकर्ड बनाएको छ । चाँदी आज तोलामा ६० रुपैयाँ बढेर तोलाको १४ सय ५ रुपैयाँ पुगेको छ ।
शुक्रबारका लागि तोकिएको सुनको खरिद बिक्री मूल्य हालसम्मकै उच्च भएको महासंघले जनाएको छ ।
काठमाडौं । चैतयता ठप्प रहेको खेलकुद गतिविधि अब बिस्तारै शुरु गर्ने तयारीमा नेपाल छ । यसैक्रममा अब राष्ट्रिय फुटबल टोली विश्वकप छनोट प्रतियोगिताको छनोटका लागि तयारीमा जुटेको छ । अहिले खेलाडीहरु क्वारेन्टिनमा छन् । अखिल नेपाल फुटबल सङ्घ (एन्फा)का अनुसार १ भदौबाट खेलाडीलाई प्रशिक्षणका लागि मैदानमा उतार्ने तयारी रहेको छ । तर, त्यस अगाडी नै सबै खेलाडीको कोरोना परीक्षण गरिने भएको छ । सबै खेलाडीको पिसिआर परीक्षण गर्ने र त्यहाँ नेगेटिभ आएका खेलाडीलाई मात्र प्रशिक्षणको अनुमति मिल्नेछ ।
एन्फाका अनुसार अहिले प्रशिक्षणको प्रयोजनका लागि ३४ जना खेलाडीलाई १४ दिने क्वरेण्टीनमा राखिएको छ । उनीहरु आइतबारदेखि क्वरेण्टीनमा बसेका हुन् । प्रशिक्षण एन्फा कम्पलेक्स सातदोबाटोमा संचालन हुनेछ । एन्फाले प्रशिक्षणका दौरान मापदण्ड समेत बनाएको छ । खेलाडी, प्रशिक्षक र पदाधिकारीले त्यसको पालना गर्नु पर्नेछ । खेलाडीले पोशाक फेर्ने कोठामा कम समय बिताउनुपर्ने छ । अभ्यासका दौरान बाहिरी मानिसलाई मैदानमा प्रवेश गर्न दिइदैन । खाना सामूहिक रुपमा खान नपाइने र व्यक्तिगत दूरी कायम गरी खाना खानुपर्ने गरी नियम बनाइएको छ ।
प्रशिक्षणका क्रमा एउटा खेलाडीले एउटै बोतलले मात्र पानी पिउने छन् । अभ्यास स्थललाई नियमित निर्मलीकरण गरिने भएको छ । सबै खेलाडीले एकै पटकमा अभ्यासमा उत्रन समेत पाउने छैनन् । ३४ खेलाडीलाई ३ समुहमा विभाजन गरेर अभ्यास गराइने भएको छ । नेपाल फिफा विश्वकप, २०२२ र एएफसी एसियन कप, २०२३ को छनोट प्रतियोगिताको तयारीमा जुटेको हो ।
कोरोना भाइरसका कारण स्थगित भएको छनोट खेल आउँदो अक्टोबर र नोभेम्बरमा गराउने प्रस्ताव एशियाली फुटबल महासङ्घले राखेको छ । स्थगित भएका खेल अक्टोबर ८ र १३ तारिख तथा नोभेम्बर १२ र १७ तारिखमा गराइने छ । नेपालले प्रतियोगिताका तीन खेल खेल्न बाँकी छ । सबै खेल नेपालको घरेलु मैदानमा हुनेछन् । नेपालले चाइनिज ताइपेई, अस्ट्रेलिया र जोर्डनसँग खेल्ने कार्यक्रम छ ।
काठमाडौं । नेपाली कांग्रेसले क्रियाशील सदस्य दोब्बर पार्ने भएको छ । बिहीबार सभापति शेरबहादुर देउवा निवासमा भएको छलफलमा क्रियाशील सदस्यता साविकको संख्यामा १०० प्रतिशतसम्म बढाउन सकिने व्यवस्था गर्ने सहमति भएको हो । यसअघि ५० प्रतिशत मात्र सदस्य थप्न सकिने प्रावधान रहेको थियो । सदस्यता थप्ने भनिए पनि छानबिन समिति गठनमा भने विवाद छ ।
क्रियाशील सदस्यता शतप्रतिशत बढाउन सहमत बनेका संस्थापन र रामचन्द्र पौडेल समूह छानबिन समितिमा विभाजित बनेका हुन् । १३ औं महाधिवेशन हुँदा कांग्रेसमा ४ लाख ९८ हजार ४७६ क्रियाशील सदस्य थिए । नयाँ सहमतिअनुसार यो संख्या १० लाख पुग्नेछ । यसलाई अधिकतम सीमा मानेर क्रियासिल सदस्यता बढाइने भएको छ ।
एकता प्रक्रियामा आएकालाई केन्द्रले दिने कि वडा तहबाट सिफारिस गर्ने भन्ने बारे विवाद कायम छ । देउवा पक्षले केन्द्रबाटै सदस्यता दिन चाहन्छ, तर रामचन्द्र पौडेल पक्षले वडा तहबाट सिफारिस भएर आएपछि मात्र केन्द्रले दिनुपर्ने शर्तमा अडान छन् । अर्कोतर्फ वितरण गरिएको क्रियाशील सदस्यताबारे छानबिन गर्ने समितिमा समेत दुई पक्षबीच विवाद रहेको छ ।
कांग्रेसले नेता नरहरि आचार्यको संयोजकत्वमा ७ सदस्यीय क्रियाशील सदस्यता छानबिन समिति गठन गर्ने सहमति जुटाएको थियो । यसमा संस्थापनबाट ३, पौडेल समूहबाट दुई र सिटौला समूहबाट एक जना राख्ने सहमति जुटेको थियो । तर स्वास्थ्यका कारण आचार्यले समितिमा नबस्ने जानकारी गराएका छन् ।
सभापति देउवाले उनको स्थानमा रमेश लेखकलाई संयोजक बनाउन चाहेको बताइएको छ । यसको पौडेल र सिटौला पक्षको विरोध छ । उनीहरुले संयोजक ७ सदस्यबाटै हुने भन्दै सभापतिले संयोजक तोक्न नपाउने तर्कमा छन् ।
न्युयोर्क
न्युयोर्क राज्यका गभर्नर एण्ड्रु कुमोले कोरोना संक्रमणको त्रासले न्युयोर्क सहर छाडेका धनाढ्यहरुलाई सहरको अर्थतन्त्रमा टेवा पुर्याउनको लागि पुन: फर्किएर आउन आह्वान गरेका छन् । न्युयोर्क सहरमा महामारी चरम उत्कर्षमा पुग्दा महँगो मुल्य तिरेर म्यानह्याटनका अपार्टमेण्टमा बसोबास गर्दै आएका धनाढ्यहरु ह्याम्टन, अपस्टेट, कनेक्टिकटमा रहेको भेकेसन होममा सरेका थिए भने अन्य मानिस भने सहर भन्दा केही परतिर नयाँ ठाउँमा घर भाडामा लिएर सरेका थिए । हाल न्युयोर्कमा हजारौं हजार अपार्टमेण्ट खाली भएका छन् ।
कोरोना महामारी सुरु भएको झन्डै ६ महिना बिति सकेको छ तर यो महामारी कम हुने कुनै लक्षण देखिएको छैन । भ्याक्सिन आउन अझै केही महिना कुर्नै पर्ने देखिएको छ । यसै हप्ताको सुरुमा आयोजित एक पत्रकार सम्मेलनमा गभर्नर कुमोले धनाढ्यहरुलाई न्युयोर्क फर्काउने बिषयमा भनें “जो न्युयोर्कबासी हाल ह्याम्टनको घरमा गएर बसेका छन्, हड्सन भ्यालीमा बसेका छन्, कनेक्टिकटको भेकेसन होममा बसेका छन् ।म प्राय: दिनभर उनिहरुसँग कुरा गरिरहेको हुन्छु र भन्छु ‘तिमिहरु फर्किनु पर्छ । कहिले फर्किने हो ?’ भनेर सोध्छु । मैले भनेको छु; “तिमीहरु फर्किएपछि हामी डिनर खान जाऔंला । म तिमीहरुले खाएको पेय ( ड्रिन्क्स) को पैसा तिर्छु । म तिमीहरुलाई खाना बनाएर खुवाउँछु”।
कोरोना संक्रमणको भयावय दृष्यपछि ठुलो संख्यामा न्युयोर्क सहरबासीले न्युयोर्क छाडे पनि हाल न्युयोर्कमा कोरोना संक्रमणमा नाटकीय सुधार आएको छ ।
काठमाडौं । प्रशासनले अब अत्यावश्यक कामका लागि भन्दै लिइने सवारी पास वितरणमा अझै कडाई गरेको छ । अब एकै दिनमा सवारी पास पाइने छैन । सरकारले काठमाडौं उपत्यका र २ सय भन्दा बढी सक्रिय कोरोना संक्रमित पुष्टी भएका जिल्लामा जोर विजोर प्रणाली शुरु गरेको छ । एक जिल्लाबाट अकोए जिल्ला जान निषेध छ । तर, सरकारले वितरण गरेको सवारी पास लिएर भने जान पाइन्छ । जिल्ला प्रशासन कार्यालय काठमाडौंले यसरी वितवरण हुने सवारी पासका सम्बन्धमा नयाँ नियम ल्याएको हो ।
कार्यालय परिसरमा मानिसको अत्यधिक भिड भएको र सार्वजनिक निकायका व्यक्तिमा समेत कोभिड–१९ देखिन थालेकाले भिडभाड रोक्न र सामाजिक दुरी कायम गर्न नयाँ व्यवस्था गरिएको बताइएको छ । अब अत्यावश्यक काम परेर गाडीको पास चाहिए काठमाडौं जिल्ला प्रशासन कार्यालयमा अघिल्लो दिन निवेदन दिएर फर्कनु पर्छ । त्यसको भोलिपल्ट मात्रै पास लिन जानु पर्ने गरी नियम बनाइएको छ ।
निवेदन दिएर त्यही दिन पास लिन कुर्दा कार्यालय परिसरमा मानिसको भिडभाड बढ्ने गर्छ । अघिल्लो दिन सङ्कलन भएको निवेदनको आधारमा भोलिपल्ट बिहान ८ बजेदेखि पास वितरण थालिने भएको छ । त्यसका लागि गेटमै निवेदन दिने र त्यही स्थानबाट पास लिने व्यवस्था मिलाइएको छ । अहिले शहरी इलाकामा कोरोना भाइरसको जोखिम बढेको छ । जसले गर्दा सरकारले कडाई थालेको छ ।
काठमाडौं । अब नेपालले पूर्ण लकडाउन थेग्न नसक्ने निष्कर्षमा सरकार पुगेको छ । सरकारका प्रवक्ता समेत रहेका सूचना तथा सञ्चारमन्त्री डा. युवराज खतिवडाले अहिले तत्कालै नेपाल ११ चैतको जस्तै पूर्ण तथा देशव्यापी लकडाउनको सोचमा नरहेको स्पष्ट पारेका छन् । मन्त्रिपरिषद्का गत सोमबार भएका निर्णय सार्वजनिक गर्न बिहीबार आयोजित पत्रकार सम्मेलनमा उनले पूर्ण लकडाउनबारे कुनै पनि प्रकारको योजना नरहेको स्पष्ट पारे ।
उनका अनुसार कोरोना भाइरसको जोखिम मूल्यांकन गर्दै जिल्ला प्रशासन कार्यालय र स्थानीय सरकारबाट भने लकडाउनबारे निर्णय हुनेछ । अर्थातः बढी जोखिमपूर्ण क्षेत्रलाई सिल गर्न भने सकिनेछ । अहिले पनि कतिपय महानगरपालिका तथा स्थानीय तहहरुमा कोरोना देखिनासाथ सिल गर्ने गरिन्छ । यसमा जिल्ला प्रशासन कार्यालयले निषेधाज्ञा जारी गर्ने गरेको छ ।
संक्रमणको जोखिम नभएको ठाउँमा खुकुलो र संक्रमण भएमा कडा गर्ने सरकारको नीति रहेको उनले स्पष्ट पारे । उनका अनुसार लकडाउनबाट अर्थतन्त्रमा परेको प्रभाव बारे विश्लेषणको काम जारी रहेको छ । सरकारले १ भदौबाट लामो दूरीको सार्वजनिक यातायात र हवाई यातायात खोल्ने निर्णय लिएको छ । तर, संक्रमण बढेपछि यसमा पुनर्विचार गर्नुपर्ने राय पनि उत्तिकै रहेको छ ।
काठमाडौं । सरकारले तत्काल विदेशी नागरिक र गैरआवासीय नेपालीलाई समेत अनअराइभल भिसा नदिने भएको छ । बिहीबार परराष्ट्र, गृह, स्वास्थ्य र पर्यटनमन्त्री तथा सचिवहरुबीच भएको संयुक्त छलफलमा यस्तो सहमति भएको हो । बढ्दो कोरोना संक्रमणका बीच सरकारले १ भदौबाट व्यवसायिक हवाई उडान सुरु गर्ने निर्णय गरेको छ ।
त्यसपछि नेपाल आउन चाहने नेपालीले स्वास्थ्य प्रोटोकल पुरा गरेपछि नेपाल आउन सक्छन् । तर, विदेशी नागरिक र गैरआवासीय नेपालीले भने नेपाली दूतावासमै पुगेर भिसा लिनुपर्छ । यद्दपी भिसा कसरी दिने, के के मापदण्ड पुरा गर्ने भन्ने सम्बन्धमा भने नेपाल सरकार अझै निष्कर्षमा पुग्न सकेको छैन ।
बिहीबार परराष्ट्र, गृह, स्वास्थ्य र पर्यटनमन्त्री तथा सचिवहरुबीच भएको संयुक्त छलफलमा अनअराइभल भिसा भने नदिने सहमति जुटेको बताइएको छ । अब स्वास्थ्य मन्त्रालयले विदेशी तथा स्वदेशी नागरिकलाई कसरी आउने दिने र कति दिन क्वारेन्टिनमा राख्ने भन्ने सम्बन्धमा सुझाव दिनेछ । सोही सुझावका आधारमा पर्यटन र परराष्ट्र मन्त्रालयले थप निर्णय लिनेछन् ।
सरकारले १ भदौबाट राष्ट्रिय अन्तर्राष्ट्रिय हवाई उडान संचालनको निर्णय गरेको थियो । तर, पछिल्ला दिनमा कोरोना भाइरसको संक्रमणका कारण उडान अन्यौलमा परेको हो ।
न्युयोर्क
फ्लोरिडामा एक यात्रुले गाडी चलाईरहेका लिफ्ट ड्राइभरलाई पछाडिबाट घाँटी थिचेर न्याकेको भिडियो सार्वजनिक भएको छ । ३६ वर्षीय ट्राभिस स्मिथ नाम गरेका यात्रुले कोरोना संक्रमणबाट सुरक्षित राख्न बनाएको पार्टेसनलाई च्यातेर कार चालकको गर्धन थिचेको भिडियो सार्वजनिक भएको हो । घटना गत आईतबार बिहानको हो ।
सुरुमा पेसेन्जर र ड्राइभरको बीचमा टांगिएको प्लास्टिकको पर्दाको बारेमा ड्राइभरसँग कुरा गरिरहेका स्मिथले अकस्मात प्लास्टिक पर्दा च्यातेर गाडी चलाईरहेका ड्राइभर माथि आक्रमण गरेको भिडियोमा देखिएको छ । गाडी चालक माथि आक्रमण हुँदा गाडी भित्र तीन जना चढेको भिडियोमा देखिएको छ । स्मिथले चालकलाई आक्रमण गर्न थालेपछि संगै रहेका अर्का ब्यक्ति ढोका खोलेर भागेको देखिएको छ भने नाबालक बच्चा डराएर चिच्याएको आवाज पनि भिडियो सुनिएको छ ।
काठमाडौं । नेपालमा कोरोना संक्रमणबाट थप पाँच जनाको मृत्यु भएको छ ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार सर्लाहीका १ मोरङ २, धनुषाका १, सप्तरीका १ जना गरी ५ जनाको मृत्यु भएको हो ।
उनका अनुसा मोरङका ४५ वर्षीय पुरुषको साउन २१ गते कोशी अस्पतालमा मृत्यु भएको र उनमा कोरोना परीक्षणबाट पोजेटिभ देखिएको हो । मोरङका एक ४५ वर्षीय अर्का पुरुषको पनि कोरोना संक्रमणबाट मृत्यु भएको छ ।
त्यसैगरी सर्लाही ६५ वर्षीया महिला साउन २१ गते काठमाडौंको बलम्बुमा मृत्यु भएको छ ।
धनुषाका ७२ वर्षीया महिलाको साउन १७ गते मृत्यु भएको र उनका पनि कोरोना देखिएको हो । उनको साउन १७ बिहान ३: ४८ बजे उनको निधन भएको हो ।
सप्तरीमा ४२ वर्षीय पुरुषको साउन २१ गते राति निधन भएको छ ।
हालसम्म कुल कोरोना संक्रमणबाट मृत्यु हुनेको संख्या ६५ पुगेको छ ।
काठमाडौ । नेपालमा पछिल्लो २४ घण्टामा थप ३ सय ६० जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा पिसिआर विधिबाट गरिएको ६ हजार ६ सय २२ नमुना परिक्षणमा ३ सय ६० जनामा कोरोना संक्रमण पुष्टि भएको हो ।
योसँगै नेपालमा कोरोना संक्रमितको संख्या २१ हजार ७ सय ५० पुगेको छ ।
पछिल्लो २४ घण्टामा २ सय ३३ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १५ हजार ३ सय ८९ पुगेको छ।
कुल संक्रमितमध्ये ६५ जनाको मृत्यु भएको छ।
काठमाडौं । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ को निजी सुरक्षामा खटिएका ६ जना सुरक्षाकर्मीलाई कोरोना भाइरस संक्रमण पोजेटिभ देखिएको छ ।
नेपाल प्रहरी अस्पताल, महाराजगञ्जमा गरिएको परीक्षणमा प्रचण्ड निवास खुमलटारको गेटमा खटिने सेन्ट्री टोलीलगायतमा खटिने सुरक्षाकर्मीमा संक्रमण देखिएको हो ।
बुधबार निवासमा कार्यरत सबै सुरक्षाकर्मी तथा अध्यक्ष प्रचण्डको परिवारका सबै सदस्यको स्वाब संकलन गरेर परीक्षण गरिएको थियो ।
प्रचण्ड सचिवालय स्रोतका अनुसार परिवारका कुनै सदस्य र पहिलो घेरामा रहेका सुरक्षाकर्मीहरुमा संक्रमण देखिएको छैन ।
काठमाडौं । नेपालमा लकडाउन शुरु भएयता होटेल तथा रेष्टुरेन्टले बढी कर्मचारी कटौती गरेको पाइएको छ । देशभर २२ दशमलव ५ प्रतिशत कर्मचारी तथा कामदारको जागिर गएको पाइएको छ । यसमा बढी होटेल र रेष्टुरेन्टका कर्मचारी रहेका छन् । नेपाल राष्ट्र बैंकले कोरोना र त्यसपछि भएको लकडाउनका कारण अर्थतन्त्रमा परेको प्रभावसम्बन्धी सर्वेक्षण प्रतिवेदन सार्वजनिक गरेको छ । प्रतिवेदन अनुसार उद्योग व्यवसाय नचलेपछि त्यसको असर कर्मचारीको रोजगारीमा देखिएको हो ।
सर्वेक्षणमा सहभागी उद्योग व्यवसायले झण्डै एक चौथाइ कर्मचारी, कामदार कटौती गरेको बताएका छन् । यसबीचमा कर्मचारीको तलवमा समेत उत्तिकै कटौती भएको छ । औसतमा १८.२ प्रतिशतले तलब र सेवा सुविधा काटिएको छ । कोरोना भाइरसका कारण परेको असरको सर्वेक्षण गर्न राष्ट्रिय आर्थिक गणनामा समेटिएका १८ उद्योग व्यवसायमध्ये वित्तीय तथा बीमासम्बन्धी क्रियाकलाप बाहेकलाई १३ क्षेत्रमा सर्वेक्षण गरिएको थियो । यो सर्वेक्षण जेठ २६ देखि असार १० गतेसम्म गरिएको अध्ययनमा आधारित हो ।
सर्वेक्षणमा ५२ जिल्लाका ६ सय ७४ उद्योगी, व्यवसायीलाई सहभागिता गराइएको छ । राष्ट्र बैंकको अनुसन्धान विभागले गरेको सर्वेक्षणमा प्रदेश १ बाट २७.९, वाग्मती प्रदेशबाट २३.३, प्रदेश ५ बाट २०, गण्डकी प्रदेशबाट १२.८, सुदूरपश्चिम प्रदेशबाट ७.७, प्रदेश २ बाट ७.१ र कर्णाली प्रदेशबाट १.२ प्रतिशत नमूना सङ्कलन गरिएको प्रतिवेदनमा उल्लेख गरिएको छ । लकडाउनका बेला विभिन्न क्षेत्रका उद्योग÷व्यवसायको उत्पादन\कारोबारमा आएको कमी, रोजगारी कटौती, लकडाउनपछिको योजना लगायत विषयसँग सम्बन्धित तथ्याङ्क समावेश गरिएको राष्ट्र बैंकले जनाएको छ ।
यस अवधिमा ३९ प्रतिशत उद्योग, व्यवसाय पूर्ण वा आंशिक रुपमा सञ्चालनमा छन् । ६१ प्रतिशत उद्योग व्यवसाय पूर्ण रुपमा बन्द रहेका थिए । लकडाउनमा ९६.७ प्रतिशत उद्योग व्यवसायको उत्पादन ७३.८० प्रतिशतले घटेको समेत प्रतिवेदनले देखाएको छ । लकडाउनमा कर्मचारीको तलव काट्ने पनि होटल तथा रेस्टुरेन्ट, यातायात, शिक्षा क्षेत्र हुन् ।
सर्वेक्षणबाट अर्थतन्त्र सामान्य अवस्थामा फर्कन अझै ९ महिना लाग्ने देखिएको छ । सरकारले चैत ११ बाट लकडाउन थालेको थियो । लकडाउन साउन ६ मा सकियो । तर, कोरोना भाइरसको प्रभाव अझै रहेका कारण यसले अर्थतन्त्रमा भने गहिरो प्रभाव पार्ने देखिएको छ ।
काठमाडौं । सरकारले आजबाट काठमाडौं उपत्यका सहित कोरोना भाइरसको संक्रमण बढेका जिल्लामा सवारी साधन चलाउन जोर विजोर प्रणाली शुरु गरेको छ । गृह मन्त्रालयका अनुसार काठमाडौंका उपत्यकाका तीन जिल्ला र उपत्यकाबाहिर २०० जनाभन्दा बढी सक्रिय संक्रमित भएका जिल्लामा जोर विजोर लागू भएको हो ।
अब जोर गतेका दिन जोर नम्बर प्लेटका सवारीसाधन र विजोर गतेका दिन विजोर नम्बरका सवारीसाधान चलाउनुपर्नेछ । यो निर्णय कडाईका साथ लागु हुने सरकारको भनाई छ । उता, आजबाटै राति ९ बजेदेखि विहान ५ बजेसम्म हिँडडुलमा पनि रोक लगाइएको छ । सरकारले राति ९ बजेदेखि बिहान ५ बजेसम्म हिँडडुलमा रोक लगाएको हो र अब अत्यावश्यक नपरेसम्म रातमा बाहिर जान पाइने छैन । पछिल्लो समय कोरोना भाइरसको संक्रमणको ग्राफले पुनः जनजीवन प्रभावित पारेको छ ।
बेरुत । लेबनानको राजधानी बेरुतमा मंगलबार भएको विष्फोटमा ज्यान गुमाउने मानिसको संख्या १ सय ३५ पुगेको छ । यो घटनामा चार हजारभन्दा बढी घाइते छन् । ७० जनाको घटनास्थलमै मृत्यु भएको थियो । इतिहासकै ठूलो गैरआणविक विष्फोट मानिएको यो घटनामा कैयौं मानिस घाइते भएका कारण हताहती अझै बढ्न सक्ने बताइएको छ ।
राजधानीमा असुरक्षित रूपमा राखिएको २ हजार ७ सय ५० टन अमोनियम नाइट्रेटका कारण विस्फोटन हुँदा लेवनानले ठूलो मानवीय तथा भौतिक क्षति बेहोरेको छ । घटनाको अनुसन्धान शुरु भएको सरकारले जनाएको छ । यो बन्दरगाहका केही अधिकारीलाई निवासमै नजरबन्दमा राखिएको छ । विष्फोटले बेरुतमा भूकम्प ल्याएको थियो । सोधकर्ताले यो विष्फोट जापानमा ७० वर्ष अगाडी खसालिएको आणविक बमको १० भागको एक भाग क्षमताको भएको बताएका छन् ।
काठमाडौं । नेपालमा कोरोना भाइरसको संक्रमणबाट थप एक जनाको मृत्यु भएको छ । सप्तरीमा मृत्यु भएका तीन जनामा कोरोना आंशका गरिएको थियो । त्यसमध्ये एक जनामा कोरोना पुष्टि भएको छ । दुई जनाको भने रिपोर्ट नेगेटिभ आएको छ । सप्तरीको रुपनी गाउँपालिका ५ गढियाका ४५ बर्षीय पुरुषमा कोरोना संक्रमण पुष्टि भएको हो । उनी करिब डेढ महिनाअघि मलेसियाबाट फर्किएका थिए ।
होम क्वारेन्टिनमै बसेका उनलाई मंगलबार साँझ अधिक ज्वरो आएपछि गजेन्द्रनारायण सिंह अस्पताल राजविराजमा भर्ना गरिएको थियो । त्यसपछि थप उपचार गर्न वीपी कोइराला स्वास्थ्य विज्ञान प्रतिष्ठान, धरान पठाइएको थियो । सो क्रममा उनको बाटोमै मृत्यु भएको हो । मृत्युपछि स्वाब संकलन गरी जाँच गर्दा रिपोर्ट पोजेटिभ आएको हो ।
उता, सप्तरीकै डाक्नेश्वरी नगरपालिका ९ का ७४ बर्षीय र राजगढ गाउँपालिकाका ७१ बर्षीय बृद्धमा भने कोरोना नेगेटिभ आएको हो । अब कोरोना संक्रमणबाट सप्तरीमा मृत्यु हुनेको संख्या २ पुगेको छ । देशभर मृत्यु हुनेको संख्या ६४ पुगेको छ । यसअघि बुधबार मात्र ५ जनाको कोरोना भाइरसको संक्रमणकै कारण ज्यान गएको थियो ।
न्युयोर्क
अमेरिकामा कुनै दिन महामारीको केन्द्र बिन्दु बनेको न्युयोर्क सहरमा लगातार तीन दिनदेखि कोरोनाको कारण कसैको मृत्यु भएको छैन । यद्यपी सिंगो न्युयोर्क राज्यमा भने तीन दिनअघि सोमबार ३ जनाको मृत्यु भएको कुरा न्युयोर्क राज्यका गभर्नर एण्ड्रु कुमोले बुधबार बताएका छन् । गभर्नर कुमोले न्युयोर्क राज्यमा कोरोना संक्रमणमा नाटकीय सुधार हुँदै गएपनि न्युयोर्कबासीलाई कोरोना भाईरसलाई गम्भिर रुपमा लिन कडा चेतावनी दिएका छन् । कुमोले बुधबार भनें; “न्युयोर्कमा हामीले सोचे भन्दा पनि निकै राम्रो सुधार भएको छ । न्युयोर्कबासीलाई कडा मेहनतको लागि धन्यवाद ! हाम्रो यो अहिलेको सुधारलाई सुरक्षित राख्नु पर्छ । त्यसैले हामीले न्युयोर्क भ्रमणमा आउनेलाई राख्ने क्वारेन्टिनको सुचीमा अर्को एउटा राज्यलाई थपेका छौं । हामीले केही महिना अगाडि अनुभव गरेको त्यो नरक जस्तो अवस्थामा फेरी फर्कनु छैन । अहिले देशभर संक्रमण एकदम बढिरहेको परिप्रेक्षमा न्युयोर्कमा फेरी संक्रमण आउने डर छ । हामी चनाखो रहनु पर्दछ” ।
न्युयोर्क राज्य सरकारले संक्रमितको संख्यामा उल्लेख्य बृद्धि भएका देश भित्र कै ३५ राज्यबाट न्युयोर्क भ्रमणमा आउने सबैलाई १४ दिन क्वारेन्टिनमा बस्नैपर्ने वाध्यकारी नियम जारी गर्दै आएकोमा मंगलवार वासिङ्टन डिसी र डेलावरलाई सुचीबाट हटाएको छ भने रोड आईल्यान्डलाई थपेको छ ।
बुधबार न्युयोर्क सहरका मेयर बिल दि ब्लाजियोले क्वारेन्टिन लिस्टमा परेका राज्यहरुबाट गाडीमा न्युयोर्क आउनेको कडाईका साथ निगरानी गर्ने उदेश्यले ठाँऊ ठाँऊमा चेक पोईन्ट राख्ने बताएका छन् । मेयर ब्लाजियोका अनुसार न्युयोर्क सहरको पाँच वटा बोरोको प्रबेश गर्ने सबै पुल तथा टनेलहरुमा चेक प्वाईन्ट राखिने र क्वारेन्टिन लिस्टमा परेका राज्यको नम्बर प्लेट भएका गाडी चालकले रजिस्ट्रेसन फर्म भर्नु पर्ने र १४ दिनको लागि क्वारेन्टिनमा बस्नै पर्नेछ । न्युयोर्क सिटी सेरिफ कार्यालयले चेक प्वाईन्टको जिम्मेवारी लिने छन् भने बिहिबारदेखि म्यानहाटनस्थित पेन स्टेसन र पोर्ट अथोरिटिमा पनि रेल तथा बसबाट संक्रमण फैलिएका राज्यबाट न्युयोर्क आउने यात्रुहरुको निगरानी बढाईने मेयर ब्लाजियोले बताएका छन् ।
काठमाडौं । नेपालमा सुनको मूल्यले अन्ततः चार अंकको आंकडा पार गरेको छ । अर्थातः अब प्रतितोला सुनको भाउ १ लाखभन्दा माथि पुगेको हो । बुधबार सुनको मुल्य तोलामा १६ सयले बढ्यो । अब प्रति तोला १ लाख १ हजार ४ सय रुपैयाँ मूल्य कायम भएको नेपाल सुनचाँदी महासंघले जानकारी दिएको छ । मंगलबार सुन प्रतितोला ९९ हजार ८ सयमा कारोबार भएको थियो।
बुधबार तेजावी सुनको मुल्य प्रति तोला एक लाख ९०० मा कारोबार भयो । बुधबार चाँदीको मुल्य पनि बढेको छ। महासंघका अनुसार बुधबार चाँदी प्रतितोला ६५ रुपैयाँले बढेर १२ सय ९५ मा कारोबार भएको छ ।
अन्तर्राष्ट्रिय बजारमा लगानीकर्ताको चाप सुनमा भएपछि सुनको मूल्यले आकास छोएको हो । कोरोना महामारीका बीच शेयर बजारमा पहिरो गएको छ । शेयरमा हुने लगानी सुनमा ओइरिएपछि यसको भाउ बढेको विश्लेषकहरु बताउाछन् । सुनको भाउ बढेपनि बजारमा कारोबार भने नगन्य मात्र रहेको छ ।
काठमाडौं । बिहीबारबाट काठमाडौंसहित बढी संक्रमित भएका जिल्लामा जोर विजोर प्रणाली शुरु हुने भएको छ । सरकारले भोलिदेखि निजी तथा सार्वजनिक सवारी साधनमा जोर विजोर प्रणाली लागू गरेको हो । कोरोना भाइरसको जोखिम बढेपछि जोर विजोर प्रणाली लागू गरिएको हो । अब काठमाडौं उपत्यकाभित्रका तीनवटै जिल्ला र र उपत्यकाबाहिर २०० जना भन्दा बढी सक्रिय कोरोना संक्रमित रहेको जिल्लाका सवारी साधन जोर विजोर प्रणाली लागू हुने भएको गृह मन्त्रालयले उल्लेख गरेको छ ।
सरकारले २६ असारबाट निजी सवारी साधनको जोर विजोर हटाएको थियो । उपत्यकामा तीन जिल्ला र बाहिर जिल्लाभित्र सार्वजनिक यातायात समेत सञ्चालनमा छन् । १ भदौबाट लामो दुरीका यातायात समेत चलाउने तयारी छ । तर, लकडाउन खोलेपछि कोरोना भाइरसको संक्रमण बढेपछि सरकारले पुनः जोर विजोर प्रणाली लागु गर्ने निर्णय लिएको हो । यसअघि प्रधानमन्त्री केपी शर्मा ओलीले बढ्दो संक्रमणबाट बच्न सकिने उपायबारे विज्ञसँग छलफल गरेका थिए ।
काठमाडौं । आज नेपालमा कोरोना भाइरसको संक्रमणबाट एकै दिन सर्वाधिक संख्यामा मानवीय क्षति भएको छ । आज मात्र ५ जनाको कोरोना भाइरसका कारण ज्यान गएको पुष्टी भएको हो । अब नेपालमा कोरोनाले ज्यान गुमाउनेको संख्या ६३ पुगेको छ । बुधबार पर्सा र मोरङमा दुई–दुई जना तथा काठमाडौंमा एक जनाको कोरोना भाइरसका कारण ज्यान गएको हो । कोरोना संक्रमणबाट पर्सामा वीरगञ्ज–१५ भिश्वाका ४६ बर्षीय पुरुष र पोखरिया नगरपालिका–८ कि १८ बर्षीया युवतीको ज्यान गएको पुष्टी भएको छ ।
वीरगञ्ज हेल्थकेयर कोभिड अस्पतालमा उपचारका क्रममा ४६ बर्षीय पुरुषको मृत्यु भएको हो । उनी मधुमेहका बिरामी थिए । उनले साउन १८ मा स्वयमले पैसा तिरेर कोरोना संक्रमण परीक्षण गराएका थिए । उता, साउन १९ मा मृत्यु भएकी पोखरिया नगरपालिका–९ कि १८ वर्षीया युवतीमा कोरोना संक्रमाण पुष्टि भएको हो । उनमा झाडावान्ताको समस्या भएपछि सोमबार नेशनल मेडिकल कलेज लगिएको थियो । तर अस्पतालमा लैजानैसाथ मृत घोषणा गरिएको थियो ।
यता, मोरङमा कोशी अस्पताल, विराटनगरको आइसोलेसन कक्षमा मृत्यु भएका विराटनगरका पुरुष र अस्पताल ल्याउने क्रममा बाटोमै ज्यान गुमाएका रंगेली नगरपालिकाका पुरुषमा कोरोना संक्रमण पुष्टि भएको छ । उनीहरु दुबै जनाको बुधबार दिउँसो रिपोर्ट पोजेटिभ आएको छ । यता काठमाडौंमा उपचाररत एक महिलाको समेत कोरोना भाइरसका कारण ज्यान गएको छ ।
बलम्बुस्थित सशस्त्र प्रहरीको अस्पतालमा उपचाररत कोभिड–१९ को संक्रमितको ज्यान गएको हो । सर्लाही–६ मलंगवाकी ६५ वर्षीया महिलाको उपचारका क्रममा मृत्यु भएको हो । उनमा निमोनियाको समस्या रहेको पाइएको छ । पछिल्लो समय नेपालमा समुदायमा स्तरमा कोरोना फैलिएपछि मृत्युदरसमेत उकालो लागेको छ ।
काठमाडौं । नेपालमा पछिल्लो २४ घण्टामा थप ३ सय ८१ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा। जागेश्वर गौतमको अनुसार २४ घण्टामा पिसिआर विधिबाट गरिएको ६ हजार ३५९नमुना परिक्षणमा ३ सय ८१ जनामा कोरोना संक्रमण पुष्टि भएको हो ।
योसँगै नेपालमा कोरोना संक्रमितको संख्या २१ हजार ३ सय ९० पुगेको छ ।
पछिल्लो २४ घण्टामा १ सय ३० जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १५ हजार १ सय ५६ पुगेको छ।
कुल संक्रमितमध्ये ६० जनाको मृत्यु भएको छ।
काठमाडौं । सरकारले संक्रमण नियन्त्रणका लागि १४ जिल्लामा पूर्ण तथा आंशिक निषेधाज्ञा जारी गरेको छ ।
लकडाउन अन्त्य गरेसँगै देशभर कोरोना संक्रमण समुदायस्तरमा देखिन थालेपछि गृह मन्त्रालयले बुधबार एक सूचना जारी गरी निषेधाज्ञा लागु गरिएका जिल्ला, क्षेत्र र लागु रहने मितिबारे जानकारी दिएको हो।
गृह मन्त्रालयका अनुसार सप्तरी, बाँके, पर्सा, बारा, सर्लाही र स्याङजामा जिल्लाभर निषेधाज्ञा जारी गरिएको छ भने धनुषा, नुवाकोट, मोरङ, महोत्तरी, झापा, सुनसरी, बझाङ र दार्चुलाका बिभिन्न ठाउँमा निषेधाज्ञा लगाइएको छ।
पछिल्लो समय काठमाडौंलगायत तराईका विभिन्न जिल्लामा कोरोना संक्रमितको संख्या ह्वातै बढेको छ । यस्तै कोरोनाका कारण ज्यान गुमाउनेको संख्या पनि बढिरहेको छ ।
कोरोना संक्रमण समुदायस्तरमा फैलिन थालेपछि निषेधाज्ञा गरिएको हो । मंगलबारसम्म मुलुकभरमा २१ हजार ९ जनामा कोरोना संक्रमण देखिएको छ भने ५८ जना कोरोनाको संक्रमणबाट निधन भएको छ ।
निषेधाज्ञा लागु हुने जिल्ला, क्षेत्र र मितिः
बेरुत । मंगलबार राती लेवनानको राजधानी बेरुतमा शक्तिशाली विस्फोट भयो । एक गोदमघरममा भएको विस्फोटमा ७० भन्दा बढी मानिसको ज्यान गएको छ । ४ हजार भन्दा बढी घाइते छन् । त्यसकारण पनि मृतकको संख्या बढ्ने बताइएको छ । लेवनानका अस्पतालहरु भरिभराउ छन् । मानिसहरुमा त्रास व्याप्त छ । बेरुतका हरेक नागरिकले भयानक विस्फोटको अनुभूति गरेका थिए । द न्यूयोर्क टाइम्सले लेवनान घटनालाई तस्वीरमा यसरी देखाउने कोसिस गरेको छ । यी तस्वीर एसोसिएट प्रेसले उपलब्ध गराएको हो ।
वीरगन्ज । नेपालमा कोरोना भाइरसको संक्रमणबाट थप एक जनाको ज्यान गएको छ । गत सोमबार निधन भएकी पर्साकी एक युवतीमा कोरोना भाइरसको संक्रमण भएको पुष्टी भएको हो । पर्साको पोखरिया नगरपालिका–९ मा बस्दै आएकी १८ वर्षीया युवतीमा कोरोनाको संक्रमण देखिएको हो । उनी पखालाबाट ग्रसित थिइन् ।
उपचार गर्न लागि सोमबार नेशनल मेडिकल कलेज लैजाँदै गर्दा उनको बाटोमै मृत्यु भएको थियो । मेडिकल कलेजमा स्वाब संकलन गरी नारायणी अस्पतालको प्रयोगशालामा परीक्षण गर्दा मंगलबार राति उनको रिपोर्ट पोजेटिभ आएको अस्पतालले जानकारी दिएको छ । उनको मृत्युबारे मन्त्रालयबाट घोषणा हुन भने बाँकि छ ।
अब नेपालमा कोरोना भाइरसको संक्रमणबाट निधन हुनेको संख्या ५८ पुगेको छ । पर्सामा मात्र १३ जना पुगेका छन् । पछिल्लो समय पर्सा कोरोनाबाट बढी मानवीय क्षति हुने जिल्ला बनेको छ ।
बेरुत । लेबनानको राजधानी बेरुतमा शक्तिशाली विष्फोट भएको छ । यस घटनामा ७० भन्दा बढीको ज्यान गइसकेको छ । ४ हजार भन्दा बढी मानिस घाइते छन् । विस्फोटले लेवनान तहसनहस भएको छ । विस्फोटक पदार्थ राखिएको गोदाम घरमा भयानक विष्फोट भएको हो । मंगलबार राती यस्तो दूर्घटना भएको हो । गोदामघरममा शुरुमा आगो लागेको थियो ।
त्यसपछि विस्फोटक पदार्थ पड्किएको थियो । लेबनानका स्वास्थ्यमन्त्रीले विष्फोटबाट कम्तिमा ७० जनाको मृत्यु भएको र करिब चार हजार जना घाइते भएको जानकारी गराएका हुन् । यो घटनापछि लेबनानका प्रधानमन्त्री हसन दिआबले बुधबार राष्ट्रिय शोक घोषणा गरेका छन् । घटनालाई उनले अत्यन्तै भयावहको संज्ञा दिएका छन् । घटनामा दोषी जो भए पनि उन्मुक्ति नपाउने उनको प्रतिवद्धता रहेको छ । अहिले विस्फोटकका फुटेजहरु सामाजिक संजालमा भाइरल भइरहेका छन् ।
गोदाममा विष्फोटक पदार्थ असुरक्षित तरिकाले राखिएकाले यो घटना भएको बताइएको छ । गोदाममा सन् २०१४ देखि विष्फोटक पदार्थ भण्डारण गरेर राखिएको थियो । करीव २ हजार ७ सय ५० टन विष्फोटक पदार्थ नाइट्रेट एकै पटक विस्फोट हुँदा यो घटना भएको थियो । घटनापछि लेवनाममा भूकपको महसुश गरिएको थियो । घरहरु हल्लिएका थिए । सिसा फुटेका थिए ।
समुन्द्रमा छाल उठेको थियो । गोदाम घर वरपरका भौतिक संरचना समेत पूर्ण रुपमा ध्वस्त भएका छन् । विष्फोटको आवाज पूर्वी भूमध्यसागरमा २४० किलोमिटर टाढा साइप्रससम्म सुनिएको अन्तराष्ट्रिय संचारमाध्यमले जनाएका छन् । घटनाको अनुसन्धान थालिएको छ ।
काठमाडौं । नेपालमा कोरोना भाइरसको संक्रमणको ग्राफ उकालो लागेको छ । अझ चिन्ताको विषय त कोरोना समुदायमा फैलिएको छ । किनकी शुरुवाती दिनमा भारत र विदेशबाट फर्किएका नेपालीमा मात्र कोरोना थियो । उनीहरुलाई आइसोलेसनमा राखी उपचार गर्दा कोरोना संक्रमण फैलन सक्ने सम्भावना थिएन । तर, भारतबाट लुकिछिपी पस्ने र नेपाल आइसकेपछि पनि क्वारेन्टिनमा नबस्दा अब शहरी क्षेत्र र तराई भेगमा कोरोनाको दोस्रो लहर फैलने क्रममा रहेको छ ।
लामो समय पार्टी विवादमा अल्झिएका प्रधानमन्त्री केपी शर्मा ओलीले मंगलबार भने कोरोना भाइरसको महामारीका सम्बन्धमा चासो राखे । उनले आज वालुवाटारमा विज्ञहरुलाई छलफलका लागि बोलाएका थिए । उनले आज स्वास्थ्य र अर्थतन्त्र सँगसँगै लैजान सकिने सम्भावनाका विषयमा विज्ञहरुसँग राय लिएको बुझिएको छ ।
प्रधानमन्त्रीसहित सरकारको सोच केही समय पुनः लकडाउनमा जाने रहेको छ । तर, केही विज्ञले भने अब अर्थतन्त्रलाई वेवास्ता नगर्न समेत सुझाव दिएको वालुवाटार स्रोतको भनाई छ । आज प्रधानमन्त्री विज्ञहरुसँगै करीव ४ घण्टा गन्थन मन्थनमा सहभागी भए । आज उनले छलफलमा प्रमुख विपक्षी नेपाली कांग्रेसका सभापति शेरबहादुर देउवा र जनता समाजवादी पार्टी (जसपा) का अध्यक्ष महन्थ ठाकुरलाई पनि बोलाएका थिए ।
धेरैले आजको प्रधानमन्त्रीको प्रस्तुती केही परिपक्क देखिएको बताएका छन् । किनकी यसअघि प्रधानमन्त्रीले बोलाउने अधिकांश बैठकमा आफै बढी बोल्ने र अप्रमाणिक विषय बोलेर बढी आलोचित हुने गरेका थिए । यसअघि उनले गत जेठमा राखेको यस्तै बैठकमा बेसार खाएर कोरोना ठिक हुने देखि नेपालीले कोरोनालाई सजिलै पचाउनेसम्मका अभिव्यक्ति दिएका थिए ।
मंगलबारको बैठकमा भने उनले विज्ञका कुरा धैर्यपूर्वक सुनेको बैठकमा सहभागी एक अर्थशास्त्रीले जानकारी दिए । आजको बैठकमा अर्थमन्त्री डा. युवराज खतिवडा र स्वास्थ्यमन्त्री भानुभक्त ढकाललाई पनि राखिएको थियो । बैठकमा सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डलाई पनि निम्ता थियो । तर, उनी अर्कै छलफलमा व्यस्त भएको बताइएको छ । विज्ञसँग छलफल गरेका प्रधानमन्त्री अब कस्तो कदम चाल्दैछन्, त्यो भने आज बैठकमा सहभागी कसैले पनि अनुमान लगाउन भने सकेनन् ।
काठमाडौं । कोरोना महमारीपछि पहिलो पटक सरकारले १ भदौबाट राष्ट्रिय अन्तर्राष्ट्रिय हवाई सेवा संचालनको तयारी गरेको छ । उक्त प्रयोजनका लागि अहिलेसम्म १२ वटा वायुसेवा कम्पनी इच्छुक देखिएका छन् । यी कम्पनीले काठमाडौंसँग १८ वटा शहरमा उडान गर्ने गरी सरकारसँग अनुमति माग गरेका छन् । नेपाल नागरिक उड्डयन प्राधिकरणका अनुसार नेपाल एयरलाइन्स र हिमालय एयरलाइन्ससमेत १२ वटा कम्पनीले १८ शहरका लागि उडानको अनुमति मागेका हुन् ।
यी कम्पनीबाट सातामा १५८ वटा उडान गर्न अनुमति माग भएको हो । यसमध्ये सबैभन्दा धेरै नेपाल एयरलाइन्सले ५७ वटा उडानका लागि अनुमति मागेको छ । दोस्रो स्थानमा एयर अरेबिया छ । उक्त कम्पनीले सातामा ३५ उडान गर्न चाहेको छ । हिमालय एयरलाइन्सले सातामा २१ उडान गर्न चाहन्छ । प्राधिकरणका अनुसार टर्किस एयरलाइन्सले सातामा एक उडान गर्ने गरी इस्तानबुलका लागि अनुमति मागेको छ ।
सलाम एयरले मस्कटका लागि ७ उडान मागेको छ । इण्डगो एयरले दिल्लीमा सातामा ७ उडान गर्न चाहन्छ । चाइना साउदर्नले चीनको ग्वाङझाउमा सातामा एक उडान मागेको छ । एयर चाइना छेन्दुका लागि १ उडान गर्न चाहन्छ । जजिरा एयरवेजले कुवेतमा साताको २ उडान गर्ने गरी अनमति मागेको छ । फ्लाई दुबइले दुबईमा ७ उडान गर्न चाहन्छ ।
हिमालय एयरलाइन्सले चीनको चोङगिङमा १, दोहामा ५, आवुधावीमा ४, दमाममा ७, र क्वालालाम्पुरमा साताको चार उडान गर्न अनुमति मागेको छ । नेपाल एयरलाइन्सले दिल्लीमा १४, बैंलौरमा ३, मुम्बईमा ७, ग्वाङझाउमा ३, दुबईमा ७, दोहामा ७, क्वालालाम्पुरमा ७, नारितामा ३, बैंककमा ३ र हङकङमा ३ उडानको पर्खाइमा छ । मलेसिया एयरलाइन्सले क्वालालाम्पुरमा ५, मालिन्दो एयरले क्वालालाम्पुरमा ४, एयर अरेवियाले आबुधावी ७ र सारजाहामा २८ उडानको अनुमति माग गरेका छन् ।
काठमाडौं । नेपालमा पछिल्लो २४ घण्टामा थप २ सय ५९ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा पिसिआर विधिबाट गरिएको ७ हजार ६८७ नमुना परिक्षणमा २ सय ५९ जनामा कोरोना संक्रमण पुष्टि भएको हो ।
योसँगै नेपालमा कोरोना संक्रमितको संख्या २१ हजार ९ पुगेको छ ।
पछिल्लो २४ घण्टामा ६५ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १५ हजार २६ पुगेको छ।
कुल संक्रमितमध्ये ५८ जनाको मृत्यु भएको छ।
काठमाडौं । नेपालमा लकडाउनको अत्यसँगै कोरोना संक्रमितको संख्या बढ्दै गएको छ ।
काठमाडौँ उपत्यकामा संक्रमितको संख्या दिनानुदिन बढ्न थालेपछि स्वास्थ्य तथा जनसंख्या मन्त्रालयले पीसीआर परीक्षणको दायरालाई बढाउने निर्णय गर्दै स्वाब संकलनमा सहयोग गर्न अनुरोध गरेको छ ।
स्वास्थ्य तथा जनसंख्या मन्त्रालयले काठमाडौं उपत्यकामा कोभिड १९ संक्रमण बढेको भन्दै नियन्त्रणमा सहयोग गर्न मंगलबार एक सूचना जारी गर्दै उपत्यकाका १४ अस्पतालमा गएर स्वाब संकलन गर्न अनुरोध गरेको हो ।
सूचनामा कोरोनाको शंका लागेकाहरुले नजिकैको स्वाव संकलन केन्द्रमा गएर पीसीआर परीक्षणको लागि सहयोग गरिदिन आग्रह गर्दै काठमाडौं उपत्यकामा कोरोना संक्रमण जोखिम बढी रहेको हुँदा शंकास्पद संक्रमितहरुको खोजी गर्ने काम तीव्र बनाइएको सूचनामा उल्लेख छ ।
शंकास्पद बिरामीको सम्पर्कमा आएका व्यक्तिहरु जोखिमयुक्त स्थाहरुबाट आउनुभएका व्यक्तिहरुले नजिकको स्वाब संकलन केन्द्रमा बिहानको ९ बजेदेखि दिउँसोको १ बजेसम्म गई स्वाब परीक्षण गर्नमा सहयोग गर्न सर्वसाधारण/अस्पतालहरु सबैमा यो अनुरोध गरिन्छ,’ मन्त्रालयको विज्ञप्तिमा उल्लेख गरिएको छ।
सरकारले स्वाव संकलनका लागि कोभिड क्लिनिक सञ्चालन गरिरहेका अस्पताल, हब हस्पताल तथा लेभल एक दुई र तीनका अस्पतालाई तोकेको छ।
पाटन अस्पताल, भक्तपुर अस्पताल, सिभिल अस्पताल, केएमसी अस्पताल र त्रिवि शिक्षण अस्पताल रहेका छन्। यस्तै वीर अस्पताल, टेकु अस्पताल, वीरेन्द्र अस्पताल छाउनी, प्रसूति अस्पताल, सशस्त्र (युनिफाइड) अस्पताल बलम्बुलाई पनि स्वाब संकलन गर्ने बुथ तोकिएको छ ।
यसैगरी स्टार अस्पताल सानेपा, ह्याम्स अस्पताल धुम्बाराही, नेपाल प्रहरी अस्पताल महाराजगञ्ज र नेपाल कोरिया मैत्री अस्पताललाई पनि नमूना संकलन गर्ने बुथ तोकिएको छ।
मन्त्रालयका सहप्रवक्ता डा. समिरकुमार अधिकारीद्धारा जारी अनुसार सर्वसाधारणले आफूलाई पायक पर्ने अस्पतालमा गएर स्वाब संकलन गराउन सक्नेछन् ।
मन्त्रालयले सबैलाई जनस्वास्थ्यका मापदण्ड पालना गर्न, घर बाहिर अत्यावश्यक अवस्थामा बाहेक ननिस्कन, भिडभाड नगर्न, चाडपर्वहरु घरमै बसी मनाउन पनि अपिल गरेको छ ।