काठमाडौं । कोरोना भाइरस संक्रमणको कारण नेपालमा थप ४ चार जनाको मृत्यु भएको छ । स्वास्थ्य तथा जनसंख्या मन्त्रालयका प्रवक्ता डा। जागेश्वर गौतमको अनुसार पछिल्लो २४ घण्टामा थप चार जनाको कोरोनाका कारण मृत्यु भएको हो ।
प्रवक्क्ता गौतमका अनुसार मृत्यु हुनेमा विरगञ्जका ५६, ३५, ६५ वर्षिया पुरुष र ललितपुरकी ६५ वर्षिया महिला रहेका छन् ।
योसंगै नेपालमा कोरोना भाइरसका कारण मृतयु हुनेको संख्या ५६ पुगेको छ ।
काठमाडौं । नेपालमा पछिल्लो २४ घण्टामा थप २ सय २४ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा १० हजार ७ सय ६८ जनाको पिसिआर विधिबाट गरिएको नमुना परिक्षणमा २ सय २४ जनामा कोरोना संक्रमण पुष्टि भएको हो ।
योसँगै नेपालमा कोरोना संक्रमितको संख्या १९ हजार ७ सय ७१ पुगेको मन्त्रालयले बताएको छ ।
पछिल्लो २४ घण्टामा थप १ सय ५१ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १४ हजार ३ सय ९९ पुगेको छ।
कुल संक्रमितमध्ये ५६ जनाको मृत्यु भएको छ।
काठमाडौं । कोरोना संक्रमितको संख्या बढन थालेपछि विराटनगरमा दुई साताको लागि लकडाउन गरिएको छ।
कोरोना भाइरस समुदाय स्तरमै बढ्दै गएकोले नगरस्तरीय क्राइसिस म्यानेजमेन्ट सेन्टरको शुक्रबार बसेको बैठकले राति १२ बजेदेखि लागू हुनेगरि दुई सताको लागि लकडाउन गर्ने निर्णय गरेको हो ।
महानगरपालिकामा कोरोना संक्रमितको संख्या सय नाघेको छ। शुक्रबार थप १० जनामा संक्रमण पुष्टि भएसँगै विराटनगरमा संक्रमितको संख्या १ सय ७ पुगेको हो। संक्रमित बढेपछि गरिएको लकडाउन पहिलाको जस्तो फितलो हुन नदिने जनाइएको छ ।
काठमाडौं । विभिन्न मुलुकमा समस्यामा रहेका नेपालीको उद्धारको काम आजबाट पुनः प्रारम्भ हुँदैछ । यसअघि नेपालमा मनसुनले बाटोघाटो बन्द भएपछि उद्धार उडानको काम रोकिएको थियो । त्रिभुवन विमानस्थल कार्यालयका अनुसार आजबाट चौथो चरणको उद्धार उडान शुरु गर्न लागिएको छ । चौथो चरण उद्धार उडान आजदेखि साउन २४ गतेसम्म चल्नेछ ।
यसअघि तीन चरणमा भएका उडानबाट ३५ हजार ८०४ जना नेपाली जहाज चढेर घर फर्किसकेका छन् । स्थलमार्गबाट आएको नेपालीको भने तथ्यांक छैन । शुक्रबार विभिन्न देशबाट ९ उडानले नेपालीलाई घर ल्याउँदैछन् । मलेसियाबाट मलिण्डो एयर काठमाडौं आउनेछ । कुवेतबाट चार उडान हुनेछन् । जसमा हिमालय एयर र जजिरा एयरवेजले दुई दुई उडान गर्दैछन् । यूएईको दुबईबाट फ्लाई दुबईको एक जहाज आउनेछ ।
श्री एयरलान्सको जहाज बैंकक पुगेर फर्कने कार्यक्रम रहेको छ । हिमालय एयरलान्सको एक जहाज कुनमिङ् जाने कार्यक्रम रहेको छ । ग्वांझाउबाट चाइना साउर्दन नेपाल आउने गरी आजको तालीका तय भएको छ । आज हिमालय एयरलाइन्स र नेपाल एयरलाइन्सका जहाज कुवेत, यूएई र कतार जानेछन् । यी जहाज शनिबार फर्कनेछन् ।
काठमाडौं । सरकारले कोरोना भाइरसको उपचार गर्ने निजी अस्पतालका लागि शूल्क निर्धारण गरिदिएको छ । सरकारले गरेको निर्णय अनुसार कोरोना भाइरसको उपचार गर्ने निजी अस्पतालले बिरामीसँग दैनिक १५ हजार रुपैयाँभन्दा माथि शुल्क उठाउन पाउने छैनन् । स्वास्थ्य तथा जनसंख्या मन्त्रालयले जटिल अवस्थामा रहेका बिरामीको उपचार गर्दा निजी अस्पतालले अधिकतम १५ हजार रुपैयाँ दैनिक मात्र शूल्क लिन पाउने निर्णय गरेको हो ।
कोरोना संक्रमितको उपचार गर्न सरकारले लेबल १, २ र ३ गरी तीन प्रकारका अस्पताल तोकेको छ । अन्य निजी अस्पतालमा बिरामीले कोरोना संक्रमणको उपचार गराउन चाहेमा समेत अस्पतालको समेत सहमति लिई उपचार गर्न गरिने मन्त्रालयका प्रवक्ता डा. जागेश्वर गौतमले जानकारी दिए । उनका अनुसार संक्रमित सामान्य अवस्थाको भए प्रतिदिन ३ हजार ५ सय रुपैयाँ, मध्यम जटिल खालको भए ७ हजार र जटिल तथा क्रिटिकल अवस्थाको भए १५ हजार रुपैयाँसम्म मात्र अधिकतम शूल्क लिन पाइने छ ।
उता, कोरोना भाइरसको परीक्षण गर्दा समेत अस्पतालले अब थप १० प्रतिशत सेवा शूल्क लिन पाउने भएका छन् । सरकारले कोरोना परीक्षण गर्दा निजी अस्पतालले बिरामीबाट १० प्रतिशतसम्म सेवा शुल्क पनि लिन पाउने निर्णय गरेको हो । निजी अस्पतालले पीसीअर विधिबाट कोरोना परीक्षण गर्दा सरकारले तोकेको ५५ सय रुपैयाँमा थप १० प्रतिशतसम्म सेवा शुल्क लिन पाउने निर्णय भएको उनले बताए । तर, अनुमति प्राप्त अस्पतालले मात्र परीक्षण गराउँन पाउँछन् ।
काठमाडौं । कुवेतमा नेपासहित ७ मुलुकका नागरिकलाई प्रवेशमा रोक लगाइएको छ । कुवेत सरकारले १ अगष्टदेखि नेपालसहित सात मुलुकका नागरिक छिर्न नपाउने निर्णय गरेको हो । यस्तो प्रवेश रोक अनिश्चितकालिन भएको बताइएको छ । नेपाल, भारत, पाकिस्तान, बंगलादेश, श्रीलंका, इरान र फिलिपिन्सका नागरिक अब कुवेत छिर्न पाउने छैनन् ।
कुवेतले कोरोना रोगको संक्रमणका कारण यस्तो निर्णय गर्नुपरेको बताएको छ । उद्दपी कुवेतमा गैरकानूनी रुपमा धेरै नेपाली बसेका कारण समस्या उत्पन्न भएको थियो । सोहीकारण लकडाउनकै बीच कुवेतले ३५ सय भन्दा बढी गैरकानूनी कामदारलाई आफ्रनै खर्चमा नेपाल पठाएको थियो । कुवेतमा करिब साढे तीन महिनासम्म बन्द रहेका अन्तर्राष्ट्रिय हवाई सेवा १ अगष्टबाट संचलनमा आउँदैछन् ।
वीरगन्ज । नेपालमा वीरगन्जमा कोरोनाले ठूलो मानवीय क्षति गरिरहेको छ । यसैक्रममा बिहीबार थप दुई जनाको कोरोना भाइरसको संक्रमणबाट मृत्यु भएको छ । वीरगन्जमा ३५ र ६५ बर्षीय पुरुषको बिहीबार ज्यान गएको हो । अब नेपालमा कोरोना संक्रमणबाट ज्यान गुमाउने बिरामीको संख्या ५४ पुगेको छ । यी मध्ये ८ जनाको ज्यान पर्सामा मात्र भएको छ ।
उनीहरु सबैको साउनमा ज्यान गएको छ । यसअघि वीरगन्जमा बाराका २ जना र रौतहटका एक जनाको मृत्यु भएको थियो । वीरगन्जमा समुदाय स्तरमा कोरोना फैलिएको छ । सोहीकारण दीर्घरोग लागेका धेरैलाई कोरोना भाइरसले क्षति पुर्याएको छ । अहिले वीरगन्ज महानगरपालिकामा निषेधाज्ञा जारी गरिएको छ ।
विहीबार वीरगञ्ज–१६ नगवाका ३५ बर्षीय पुरुषको गण्डक कोरोना अस्पतालमा उपचारका क्रममा निधन भएको हो । ज्वरो आउने, श्वासप्रस्वासमा समस्या लिएर उनी मंगलबार अस्पताल आएका थिए । उनको उपचारका क्रममा बिहीबार बेलुकी मुत्यु भएको अस्पतालले जनाएको छ । उता, वीरगञ्जमा बिहान घरमै मृत्यु भएका थप एक जनामा समेत कोरोना देखियो ।
वीरगञ्ज–२ छपकैयाका ६५ बर्षिय पुरुषमा कोरोना संक्रमण पुष्टि भएको हो । उनको घरमा ज्यान गएको जानकारी आएपछि नारायणी अस्पतालको टोलीले गएर स्वाब संकलन गरेको थियो । बेलुका उनको पीसीआर परीक्षण रिपोर्ट पोजेटिभ आएको छ ।
काठमाडौं । लकडाउनयता मात्र करीव २५ हजार हाराहारीले वृद्धि भएको सुनको मूल्य प्रतितोला ९९ हजार पुगेको छ । शुक्रबार तोलामा ५ सय बढेको सुनको मुल्य ९९ हजार प्रतितोलामा कारोबार भएको हो । नेपाल सुनचाँदी व्यवसायी महासंघका अनुसार सुनको भाउ अन्तर्राष्ट्रिय मूल्य अनुसार नै उकालो लागेको हो । बिहीबार सुन ९८ हजार ५ सय रुपैयाँ प्रतितोला रहेको थियो ।
कोभिड १९ को महामारीका कारण लगानीका विभिन्न क्षेत्र बन्द हुँदा अन्तर्राष्ट्रिय बजारमा लगानीकर्ताले सुनमा लगानी खन्याएका छन् । शेयर बजार घटिरहेको र डलरको मूल्य समेत कमजोर भइरहेको अवस्थामा सुनको मूल्यले आकास छोएको हो । नेपालमा यो मूल्य इतिहासकै सर्वाधिक हो ।
अहिले हरेक दिन सुनको मूल्यले कीर्तिमान राखिरहेको छ । मूल्य वृद्धिपछि कारोबार भने ठप्प छ । सुनको मूख्य सिजनमध्ये एक तीज पनि हो । तर, यस बेला मूल्य अत्यधिक भएपछि कारोबार हुन सकेको छैन । चाँदीको मूल्यमा भने बिहीबार कुनै परिवर्तन आएन् । बिहीबार चाँदीको भाउ तोलाको १२ सय २५ रुपैयाँ रहेको छ ।
काठमाडौं । काठमाडौं उपत्यकामा कोरोना भाइरसको संक्रमण बढेसँगै अब रातको समयमा आउन नपाइने भएको छ । गृह मन्त्रालयले यस्तो निर्णय गरेको हो । अब काठमाडौं आउने सबै मानिसको नाकामै पिसिआर परीक्षण हुने गरेको छ । सोहीकारण रातको समयमा काठमाडौं आउन नपाइने गरी निर्णय भएको हो ।
गृह मन्त्रालयका अनुसार अब साँझ ७ बजेपछि बिहान ७ बजेसम्म १२ घण्टा काठमाडौं छिर्ने नाका बन्द हुने भएको हो । यो व्यवस्था आजबाटै लागु भएको छ । पछिल्लो समय काठमाडौं उपत्यकामा कोरोना भाइरसको संक्रमण बढेको छ । त्यसक्रममा अत्यधिक मानिस बीना परीक्षण आउँदा जोखिम बढेको भन्दै सरकारको आलोचना समेत भइरहेको छ ।
काठमाडौं । नेपालमा कोरोना भाइरस संक्रमणको कारण थप तीन जनाको ज्यान गएको छ ।
स्वास्थ्य तथा जनसंख्या मन्त्रालयका प्रवक्ता डा.गेश्वर गौतमको अनुसार मृत्यु हुनेका मोरङको सुनवसी नगरपालिकाका ४५ वर्षिया पुरुष, विरगञ्जका महानगरपालिकाका ७० वर्षिया पुरुष र अर्का सोहि नगरपालिकाका ६८ वर्षिया पुरुष रहेका छन् ।
बुधबार विहान ६८ वर्षीय पुरुषको कोरोना विशेष गण्डक अस्पतालमा र दिउँसो ७१ वर्षीय पुरुषको नेशनल मेडिकल कलेजमा मृत्यु भएको अस्पतालले जनाएका छन् । निधन भएका पुरुषहरुमा दीर्घरोग रहेको बताइएको छ ।
७१ वर्षका पुरुष पखाला लागेर उपचार गर्न नेशनल मेडिकल कलेजमा पुगेका थिए । उनी मिर्गौलाको समस्याबाट पिडित रहेको बताइएको छ ।
उनको आइतबार पिसिआर परीक्षण गरिएको थियो । ६८ बर्षीय पुरुष समेत मुटु र निमोनियाका बिरामी रहेको अस्पतालले जनाएको छ ।
उता, धरानमा थप एकजना कोरोना संक्रमितको मृत्यु भएको छ । बुधबार दिउँसो विराटनगरबाट रेफर गरिएका कोरोना संक्रमितको उपचारका क्रममा साँझ ज्यान गएको हो ।
वीपी कोइराला स्वास्थ्य विज्ञान प्रतिष्ठान धरानका अनुसार एक ४५ वर्षीय पुरुषको कोरोनाका कारण ज्यान गएको छ । यससँगै नेपालमा कोरोना संक्रमणबाट मृत्यु हुनेको संख्या ५२ पुगेको छ ।
काठमाडौं । नेपालमा पछिल्लो २४ घण्टामा थप २ सय ७४ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा ६ हजार ३ सय ४ जनाको पिसिआर विधिबाट गरिएको नमुना परिक्षणमा २ सय ७४ जनामा कोरोना संक्रमण पुष्टि भएको हो ।
योसँगै नेपालमा कोरोना संक्रमितको संख्या १९ हजार ५ सय ४७पुगेको मन्त्रालयले बताएको छ ।
पछिल्लो २४ घण्टामा थप २ सय २७ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १४ हजार २ सय ४८पुगेको छ।
कुल संक्रमितमध्ये ५२ जनाको मृत्यु भएको छ।
काठमाडौं । कञ्चनपुर जिल्ला अदालतले निर्मला पन्तको बलात्कार र हत्या मुद्दामा जोडिएका आठ जना प्रहरीलाई सफाइ दिएको छ । आज न्यायाधीश गोपालप्रसाद वाँस्तोलाको इजलासले यातना दिएको र सार्वजनिक न्यायविरुद्धको कसूरवाट प्रहरीलाई सफाइ दिएको हो ।
यातना दिएको अभियोग लागेका तत्कालिन कञ्चनपुर प्रहरी प्रमुख एसपी डिल्लीराज विष्ट, सीआईबीका डीएसपी अंगुर जिसी तथा एकिन्द्र खड्का र ज्ञानबहादुर सेठीले सफाइ पाएका हुन् । त्यस्तै प्रहरीहरू चाँदनी साउद, जगदीशप्रसाद भट्ट, रामसिंह धामी र हरिसिंह धामीले पनि सार्वजनिक न्यायविरुद्धको कसूर गरेको अभियोगबाट सफाइ पाएका हुन् ।
निर्मला पन्तको बलात्कार र हत्या आरोपीको रुपमा प्रहरीले सार्वजनिक गरेका खड्कसिंह विष्टले चार जना प्रहरीविरुद्ध यातना दिएको भन्दै जाहेरी दिएपछि उनीहरूविरुद्ध मुद्दा परेको थियो । त्यस्तै मृतक निर्मला पन्तकी आमा दुर्गादेवी पन्तले आठ जना प्रहरी अधिकारीविरुद्ध सार्वजनिक न्यायविरुद्धको कसूरमा जाहेरी दिएकी थिइन् ।
दुवै मुद्दा कञ्चनपुर जिल्ला अदालतमा २२ फागुन २०७५ मा दर्ता भएका थिए । यो फैसलासँगै निलम्बित प्रहरीलाई काममा फर्कने बाटो खुलेको छ । दुई वर्षअघि १३ वर्षीय निर्मला पन्तको बलत्कारपछि हत्या भएको थियो । तर बलात्कारपछि हत्यामा संलग्न व्यक्ति भने अझै पक्राउ परेका छैनन् ।
फोटो:गुगल
काठमाडौं । नेपालमा आजबाट पर्यटन व्यवसाय खुला भएको छ । सरकारले ११ चैतयता बन्द रहेका सबै प्रकारका पर्यटन व्यवसायलाई खुला गर्ने निर्णय गरेको थियो । पर्यटकीय गतिविधि संचालनमा नआएपनि आजबाट अफिसहरु खुल्ने र बुकिंग लिन थाल्नेछन् । यता, होटेलसमेत आजैबाट खुला गर्ने गरी सरकारले निर्णय गरेको छ ।
मन्त्रिपरिषद्को ६ साउनको बैठकले १५ साउनबाट ट्राभल, ट्रेकिङ, पर्वतारोहणलगायत व्यवसाय गर्ने निर्णय लिएको थियो । अब व्यवसायीले शरद ऋतुका अग्रिम बुकिङ लिन सक्नेछन् । कोरोनाको सङ्क्रमण कम हुँदै गएपछि पर्यटकका लागि खुला गर्ने सरकारको भनाई छ । अन्तराष्ट्रिय उडान सूचारु भएपछि पर्यटक आउन थाल्ने अपेक्षा गरिएको छ । बिहीबारदेखि खुल्ने होटल तथा रेस्टुरेन्टमा सामूहिक भोज र समारोह गर्न रोक लगाइएको छ । होटल सञ्चालन गर्न सुरक्षा निर्देशिका भने पालना गर्नुपर्छ ।
काठमाडौं । लकडाउनका कारण रोकिएको पारिश्रमिक सबै श्रमिकले पाउने भएका छन् । रोजगारदाता संस्था र संयुक्त ट्रेड युनियन समन्वय केन्द्रबीच भएको सहमति अनुसार लकडाउनमा रोकिएको श्रमिकको पारिश्रमिक भुक्तान गर्ने सम्बन्धमा सहमति जुटेको छ । नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स, नेपाल घरेलु तथा साना उद्योग महासंघ लगायतका रोजगारदाता संस्था र संयुक्त ट्रेड युनियन समन्वय केन्द्र आवद्ध ट्रेड युनियन महासंघबीच लकडाउन अवधिको तलब भुक्तानीका विषयमा सहमति भएको हो।
लकडाउनको समयमा चैत महिनाको पुरै तलब दिने तथा बैशाख महिनाको लागि ५० प्रतिशत भुक्तानी दिने सहमति भएको छ । जेठ महिनामा लकडाउनका कारण काममा उपस्थित हुन नसकेकालाई श्रमिकलाई पनि ५० प्रतिशत भुक्तानी गर्ने सहमति बनेको छ । श्रमिकलाई लकडाउनकै बाहनामा पारी कामबाट निकाल्न पाइने छैन । पालैपालो काम दिएर समानुपातिक ढंगले पारिश्रमिक दिने समझदारी भएको समेत जनाइएको छ ।
उद्योग प्रतिष्ठान खुलिसकेको अवस्थामा काम गर्न आउने श्रमिक कर्मचारीलाई कार्यस्थलसम्म आउने वातावरण सरकार वा रोजगारदाताले गर्नुपर्ने सहमति भएको छ । लकडाउन अवधिमा बन्द रहेका उद्योग संचालन गर्ने क्रममा सम्पूर्ण उद्योग प्रतिष्ठानले कर्मचारीको स्वास्थ्य सुरक्षाको लागि आवश्यक व्यवस्था मिलाउने भएका छन् ।
उद्योग व्यवसायको प्रकृति र अवस्था अनुसार उद्योग प्रतिष्ठानको सहज सञ्चालन, लक डाउन अवधिको पारिश्रमिक भुक्तानी र श्रमिकलाई आलोपालो गरी काममा लगाउने लगायतका विषयमा सम्बन्धित वस्तुगत संघ र सो क्षेत्रसँग सम्बन्धित उद्योग प्रतिष्ठानका रोजगारदाता र प्रतिष्ठान स्तरका ट्रेड युनियनहरूले पनि आपसी छलफल गरी सहमति गर्ने समझदारी भएको छ । नेपालमा ११ चैतबाट शुरु भएको लकडाउनका कारण धेरै उद्योग प्रतिस्ठान बन्द भएका थिए । १ असारबाट भने धेरैजसो उद्योग खोल्ने अनुमति सरकारले दिएको थियो ।
कैलाली । कैलालीमा बस्तीमा बाढी छिरेको छ । जसले गर्दा चार जना मानिस वेपत्ता भएका छन् । यस भेगमा मङ्गलबारबाट अविरल वर्षा भइरहेको छ । वर्षाका कारण जिल्लाका पूर्वी क्षेत्रमा डुबान भइरहेको छ । जिल्लाका विभिन्न स्थानमा बाढी बस्तीमा पसेको प्रहरीले जनाएको छ । यसले कैयौं घर डुबाएको छ । जिल्ला प्रहरी कार्यालय कैलालीका अनुसार भजनी नगरपालिका–८ सोनाफाँटा क्षेत्रका चार जना बेपत्ता भएका छन् ।
भजनी–८ सोनाफाँटाका ठग्गु चौधरीका ११ वर्षीय नाति स्केल चौधरीसहित चार जना बेपत्ता भएको प्रहरीले जनाएको छ । बेपत्ता भएका व्यक्तिको खोजी भइरहेको प्रहरीले जनाएको छ । भजनीमै थप दुई जनाको भने सकुशल उद्धार गरिएको छ । प्रभावित व्यक्तिहरुलाई विद्यालय तथा सामुदायिक भवनमा स्थानान्तरण गरिएको छ । बाढी प्रभावित क्षेत्रमा नेपाली सेना, सशस्त्र प्रहरी, नेपाल प्रहरीलगायत सुरक्षा टोली परिचालन गरिएको छ ।
न्युयोर्क
अमेरिकामा कोरोनाबाट मृत्यु हुनेको संख्या १ लाख ५० हजार नाघेको छ । मृतकको संख्या १ लाख ५० हजार कटेको मात्र होईन संक्रमितको संख्या बेलुन फुले झैं लगातार फैलिरहेको छ । अस्पतालहरु भरिएका छन् । बिगत केही हप्तादेखि दैनिक १ हजार भन्दा धेरैको दरमा मृत्यु भै रहेको छ । मृतकको यो बढ्दो संख्या जुन महिनाको पहिलो हप्ता पछिको सबैभन्दा भयावय अवस्था हो । अहिले अमेरिकाको दक्षिणी र पश्चिमी क्षेत्रका २४ वटा राज्यहरु र पोर्टो रिकोमा दैनिक मृतकको संख्या उकालो लागि रहेको छ ।
सर्वशक्तिमान राष्ट्र अमेरिकामा पहिलो भाईरस देखिएको फेब्रुअरीबाट ५ महिना भित्र कोरोना कै कारण १ लाख ५० हजारले ज्यान गुमाएका छन् । मृतकको संख्या अप्रिल २७ को दिन ५० हजार कटेको थियो भने मेई २७ को दिन मृतकको संख्या १ लाख पुगेपछि विश्व चर्चित न्युयोर्क टाईम्सले समबेदनाको सांकेतिक जनाउका लागि १ हजार मृतकको नाम आफ्नो पहिलो पृष्ठमा छापेको थियो ।
अमेरिकामा महामारी सुरु हुने बित्तिकै अप्रिलको अन्त्यतिर मृतकको संख्या ह्वात्तै बढेको थियो । न्युयोर्क राज्यमा सबैभन्दा धेरै एकै दिन मेई ५ मा ९ सय ५२ जनाको मृत्यु भएको थियो । न्युयोर्कमा हालसम्म ३२ हजार ६ सय ५३ को मृत्यु भएको छ भने ४ लाख १२ हजार ८ सय ७८ संक्रमित भएका छन् । तर हाल न्युयोर्कलाई क्यालिफोर्निया र फ्लोरिडाले संक्रमित संख्यामा जिति सकेका छन् । न्युयोर्कमा अहिले दैनिक औसत १६ जनाको मृत्यु भै रहेको छ भने दक्षिणी र पश्चिमी राज्यहरुमा दैनिक १ हजार भन्दा धेरैको मृत्यु भै रहेको छ ।
हामी “विश्व सन्देश साप्ताहिक पत्रिका र विश्व न्युज” परिवार ती सम्पूर्ण मृतकहरुमा भावपूर्ण श्रद्धाञ्जली ब्यक्त गर्दछौं ।
काठमाडौं । संसारका धेरै मुलुकको तुलनामा नेपालमा लकडाउन कार्यान्वयन प्रभावकारी थियो । खासगरी घरमै मानिसहरु बस्ने बानी बसाल्नु र सडकमा निस्कने मानिसलाई नियन्त्रण गर्नु चानचुने काम थिएन् । यसमा सफलतापूर्वक खटिएका सुरक्षाकर्मीमा क्रमशः कोरोना भाइरसको संक्रमण बढ्न थालेको छ । खासगरी सामुहिक रुपमा बस्ने र खाने गर्नुपर्ने पेशा भएकाले समेत एक स्थानमा एक जनामा कोरोना भाइरसको संक्रमण देखिएको समयमा समेत त्यसबाट धेरैमा संक्रमण फैलने सम्भावना हुन्छ ।
आमनागरिकसँगै अहिले सुरक्षाकर्मीमा देखिएको संक्रमणले नेपालमा जोखिम डरलाग्दो रहेको संकेत गरेको छ । नेपाल प्रहरीको मुख्यालय प्रहरी प्रधान कार्यालयमा साउन ११ मा चार जनामा कोरोनाको संक्रमण पुष्टी भएको थियो । त्यसपछि कन्ट्रयाक्ट ट्रेसिङ गर्दा मङ्गलबार आएके नतिजामा थप ३१ जनामा कोभिड १९ को संक्रमण पुष्टि भएको छ । यसले सुरक्षाकर्मीमा बढी जोखिम रहेको देखिएको छ । जो लकडाउन कार्यान्वयन र विभिन्न प्रयोजनका लागि फिल्डमा खटिएका थिए ।
मङ्गलबार सशस्त्र प्रहरीमा पनि एकजनामा कोरोना देखिएको छ । प्रहरीमा बुधबारसम्म २०६ जनामा सङ्क्रमण भइसकेको बताइएको छ । यी प्रहरीसहित नेपाली सेना, सशस्त्र प्रहरी र राष्ट्रिय अनुसन्धान विभागका समेत गरी कूल ३८२ जना सुरक्षाकर्मीमा कोरोना भाइरसको सङ्क्रमण पुष्टी भइसकेको छ । त्यसमध्ये १४१ जना उपचाररत छन् । सुरक्षाकर्मीमध्ये जटिल बिरामी भने छैनन् । नेपालमा कुल १९ हजार मानिसमा कोरोना देखिएको छ । त्यसमध्ये १४ हजार निको भएका छन् । लकडाउनका बेला करीव ४४ हजार सुरक्षाकर्मी खटिएका थिए ।
कैलाली । पश्चिम नेपालमा अविरल वर्षातका कारण प्राकृतिक विपत्तिका घटना बढेका छन् । पछिल्लो २४ घण्टामा बाढी, पहिरो र डुबानका कारण विभिन्न स्थानमा १३ जनाको ज्यान गएको छ । केही मानिस घाइते छन् । गृह मन्त्रालयका अनुसार एक जना भने बेपत्ता छन् । विभिन्न स्थानमा १२ जना घाइते भएको मन्त्रालयले जनाएको छ ।
कालिकोटमा पहिरोमा परी १० जनाको ज्यान गएको छ । यहाँ एक जना वेपत्ता भएका छन् भने ७ जना घाइते छन्। कैलालीको कैलाली गाउँपालिका ७ वसन्ता भन्ने स्थान आज डुबानमा परेको छ । यस स्थानमा ३ जना र बाजुरा बुढीगंगा गाउँपालिका १ मा पहिरोमा परी २ जना घाइते भएको तथ्यांक छ ।
कालिकोट बाहेक दाङमा २ जना र दोलखामा एक जनाको ज्यान गएको हो । आज सिन्धुपाल्चोकको भोटेकोशी गाउँपालिकामा गत असार ३१ गतेको पहिरोमा परि हराइरहेका मध्ये २ जनाको शब फेला परेको छ । बाढी र पहिरोका कारण देशभर अझै एक दर्जन राजमार्गमा यातायात सूचारु हुन सकेको छैन । सोमबारबाट जारी मनसुनका कारण पश्चिम नेपालमा बढी प्रभाव परेको हो ।
काठमाडौं । कोरोना भाइरसका कारण विदेशमा अलपत्र परेका नेपालीको उद्दारको काम अहिले विभिन्न उपायबाट भइरहेको छ । यसै क्रममा बुधबार भारतको बैंलौरबाट नेपाली विद्यार्थीको उद्धार भएको छ । भारतबाट जहाजमा पहिलो पटक नेपालीको उद्दार भएको हो । यसअघि भारतबाट स्थलमार्ग हुँदै आएका नेपालीलाई मात्र घर पठाइएको थियो ।
बुधबार नेपाल एयरलाइन्सले बैलौंर आसपासमा रहेका ८० जना नेपाली विद्यार्थीलाई काठमाडौं ल्याएको हो । नेपाल एयरलाइन्सको यो जहाज काठमाडौंबाट एक जना यात्रु बोकेर बैंलोर उडेको थियो । यसबाहेक बुधबार मलेसिया एयलाइन्सको जहाज क्वालालाम्पुरबाट ५१ जना यात्रु बोकेर काठमाडौं आएको छ । यो जहाजले ४४ जनालाई मलेसिया लगेको छ ।
हिमालय एयरलाइन्सको जहाजले सिंगापुर र क्वालालाम्पुरबाट १५४ जनालाई नेपाल ल्याएको छ । शान्ति सेना लगेर सुडान गएको नेपाल एयरलाइन्सको जहाजले २ सय ५० जना सैनिक जवान र अधिकृतलाई लिएर आजै काठमाडौं विमानस्थलमा अवतरण गरेको छ ।
उता, बिहीबार कोरियाबाट कोरियन एयर काठमाडौं आउँदैछ । हङकङबाट क्याथे ड्रागन र इनचानबाट एसियाना एयरको जहाज काठमाडौं आउने कार्यक्रम रहेको छ । बिहीबार हिमालय एयरलाइन्सको एक जहाज कुनमिङ र दुई जहाज कुवेत जाने कार्यक्रम रहेको विमानस्थल कार्यालयले जनाएको छ ।
न्युयोर्क
मंगलबार न्युयोर्कस्थित एक संघीय अदालतले उबर तथा लिफ्ट ड्राइभरहरुको लागि वकालत गर्दै आएको एक गठबन्धनको पक्षमा मुद्दाको फैसला गरेको छ ।न्युयोर्कमा उबर र लिफ्टको याप मार्फत काम गर्दै आएका ड्राईबरहरुको बिषयमा वकालत गर्दै आएको ‘न्युयोर्क ट्याक्सी वर्कर्स अलाईन्स’ले जारी कोरोना महामारीमा ती ड्राइभरहरुलाई बेरोजगारी बीमाको पैसा दिन ढिलाई गर्नुको साथै पाउनु पर्ने भन्दा थोरै पैसा दिएको दाबी गर्दै राज्यका गभर्नर, लेबर डिपार्ट्मेन्ट, लेबर कमिस्नर बिरुद्ध मुद्दा दायर गरेको थियो ।अमेरिकामा उबर र लिफ्ट लगायत थुप्रै टेक कम्पनीका लागि काम गर्दै आएका कामदारहरुलाई ती कम्पनीहरुले स्वतन्त्र कामदार (ईन्डिपेन्डेन्ट कन्ट्र्याक्टर) को रुपमा पारिभाषित गर्दै आएका छन् ।मंगलबार बिहान संघीय अदालतका न्यायाधिश लसन डिअर्सी हलले ड्राइभरहरुको पक्षमा प्रारम्भिक निषेधाज्ञा जारी गर्दै उनीहरु योग्य भए अनुसार पुरा भुक्तानि गर्न आदेश गरेकी छिन् ।
बेरोजगारी बीमा बापत ड्राइभरहरुले पाउनु पर्ने रकम समेत पुरा नदिएपछि न्युयोर्क ट्याक्सी वर्कर्स एलाईन्सले गत मेइ महिनामा मुद्दा दायर गरेको थियो ।मुद्दा जितेपछि एलाईन्सले खुसी मनाउँदै भनेको छ; “ज-जस्ले अहिलेसम्म प्रति हप्ता १ सय ८२ डलर मात्र पाउदै आएका छन, उनिहरुले अब ५ सय ४ प्रति हप्ता पाउने छन् । यसअघि थोरै रकम पाएकाहरुले एक मुष्ट ६ हजार डलर पाउने छन्”।
काठमाडौं । सरकारले अब विद्यालयसहितका शैक्षिक संस्थालाई क्वारेन्टिन वा आइसोलेसन भवन नबनाउने निर्णय गरेको छ । पठनपाठन शुरु गर्ने योजना अनुसार अब सरकारले विद्यालयलाई क्रमशः खाली गरेर त्यसलाई पूर्ण किटाणुरहित बनाउने योजना बनाएको हो । मन्त्रिपरिषद्को गत सोमबारको बैठकले गरेको निर्णय अनुसार शिक्षा मन्त्रालय यसको कार्यान्वयनमा जुटेको छ ।
क्वारेन्टिन तथा आइसोलेसन सेन्टरका रुपमा प्रयोग हुन छाडेका विद्यालय भवनलाई अब तोकिएको मापदण्ड बमोजिम स्थानीय तहले निर्मलीकरण गरी अध्ययन गर्न योग्य बनाउने भएका छन् । सोही अनुसार स्थानीय तहमा सर्कुलर जारी गरिएको छ । अहिले पनि कुनै विद्यालयमा क्वारेन्टिन तथा आइसोलेसन सेन्टर सञ्चालन भइरहेको भए त्यसलाई खाली गराएर सुरक्षित बनाइने छ ।
सरकारले १ भदौबाट भर्ना खोल्ने निर्णय गरिसकेको छ । अब सुरक्षा प्रवन्ध अपनाएर शैक्षिक गतिविधि नियमित गर्ने तयारी सरकारको छ । नेपालमा ५ महिनायता विद्यालय बन्द छन् । शैक्षिक गतिविधि समेत ठप्प छन् । अब मन्त्रालयले विद्यालय संचालन गर्न आवश्यक मापदण्ड बनाएर जारी गर्ने भएको छ ।
वीरगन्ज । नेपालमा कोरोना भाइरसका कारण ज्यान गुमाउने मानिसको संख्या बढ्न थालेको छ । सरकारले मृत्युदर कम भएको भन्दै गौरव गरिरहेका बेला हरेक मृत्यु हुने मानिसको संख्या बढ्न थालेको हो । बुधबार मात्र कोरोना भाइरसको संक्रमणबाट नेपालमा थप तीन जनाको मृत्यु भएको छ । यससँगै नेपालमा कोरोना संक्रमणबाट मृत्यु हुनेको संख्या ५२ पुगेको छ ।
बुधबार पर्सामा थप दुई जनाको ज्यान गएको हो । अब यो जिल्लामा मात्र कोरोना संक्रमणका कारण ज्यान गुमाउने मानिसको संख्या ७ पुगेको छ । बुधबार विहान ६८ वर्षीय पुरुषको कोरोना विशेष गण्डक अस्पतालमा र दिउँसो ७१ वर्षीय पुरुषको नेशनल मेडिकल कलेजमा मृत्यु भएको अस्पतालले जनाएका छन् । निधन भएका पुरुषहरुमा दीर्घरोग रहेको बताइएको छ ।
७१ वर्षका पुरुष पखाला लागेर उपचार गर्न नेशनल मेडिकल कलेजमा पुगेका थिए । उनी मिर्गौलाको समस्याबाट पिडित रहेको बताइएको छ । उनको आइतबार पिसिआर परीक्षण गरिएको थियो । ६८ बर्षीय पुरुष समेत मुटु र निमोनियाका बिरामी रहेको अस्पतालले जनाएको छ ।
उता, धरानमा थप एकजना कोरोना संक्रमितको मृत्यु भएको छ । बुधबार दिउँसो विराटनगरबाट रेफर गरिएका कोरोना संक्रमितको उपचारका क्रममा साँझ ज्यान गएको हो । वीपी कोइराला स्वास्थ्य विज्ञान प्रतिष्ठान धरानका अनुसार एक ४५ वर्षीय पुरुषको कोरोनाका कारण ज्यान गएको छ ।
काठमाडौं । नेपालमा पछिल्लो २४ घण्टामा थप २ सय १० जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमको अनुसार २४ घण्टामा ६ हजार ३७ जनाको पिसिआर विधिबाट गरिएको नमुना परिक्षणमा २ सय १० जनामा कोरोना संक्रमण पुष्टि भएको हो ।
योसँगै नेपालमा कोरोना संक्रमितको संख्या १९ हजार २ सय ७३ पुगेको मन्त्रालयले बताएको छ ।
पछिल्लो २४ घण्टामा थप १ सय ४६ जना उपचारपछि निको भएर डिस्चार्ज भएका छन्। यो सहित डिस्चार्ज हुनेको संख्या १४ हजार २१ पुगेको छ।
कुल संक्रमितमध्ये ४९ जनाको मृत्यु भएको छ।
काठमाडौं । कुवेत सरकारले २० मुलुकका लागि अन्त्राष्ट्रिय उडान खुला गरेको छ । यो अगस्ट १ बाट लागु हुनेछ । कोरोना भाइरसको महामारीपछि हवाइ उडान बन्द गरेको कुवेतले अगष्ट १ बाट नेपालसहितका २० देशको अन्तर्राष्ट्रिय उडान सुचारू गर्ने निर्णय लिएको हो । अब कुवेत अन्तर्राष्ट्रिय विमानस्थलबाट सञ्चालित एयरलाइन्सले नेपालसहित युएई, बहराइन, ओमान, लेबनान, कतार, जोर्डन, इजिप्ट र बोस्नियाा उडान गर्न सक्नेछन् । यसैगरी हर्जेगोविना, श्रीलंका, पाकिस्तान, इथियोपिया, संयुक्त अधिराज्य, टर्की, इरान, स्विजरल्याण्ड, जर्मनी, अजरबैजान, फिलिपिन्स र भारतमा सेत उडान गर्न सक्ने गरी निर्णय भएको छ ।
एयरलाइन्सहरुको समय तालिका र उडान समय पनि यथाशक्य छिटो घोषणा गरिने त्यहाको नागरिक उड्डयन प्रधिकरणले उल्लेख गरेको छ । हरेक उडानमा यात्रुले स्वास्थ्य सतर्कता र निर्देशन भने पालना गर्नु पर्नेछ । कुवेतमा हजारौं नेपाली कार्यरत छन् । उडान खुलेपछि उनीहरुको घरफिर्ति समेत सहज हुनेछ । नेपालमा भने १६ अगस्ष्टपछि मात्र अन्तराष्ट्रिय व्यवसायिक उडानले अनुमति पाउनेछन् । यद्दपी नेपालले कुन कुन मुलुकलाई अनुमति दिने भन्नेबारेमा भने निर्णय गरिसकेको छैन ।
दाङ । नेपालमा दोस्रो पटक मनसुन सक्रिय भएसँगै बाढी, पहिरो र डुबानको समस्या दोहोरिन थालेको छ । सोमबारबाट सक्रिय भएको मनसुनले बुधबार र बिहीबार अधिक वर्षासँगै क्षति पुर्याउने आंकलन गरिएको छ । यसैक्रममा दाङको बंगलाचुली गाउँपालिकामा पहिरोले पुरिएर आमा–छोरीको मृत्यु भएको छ।
वडा नम्बर ५ साकिनेमा घरमाथिबाट मंगलबार राति पहिरो आउँदा २४ वर्षीय बाटुली नेपाली र उनकी दुई वर्षीया छोरी आयुस्माको ज्यान गएको प्रहरीले जनाएको छ । भत्किएको घरमा पाँचजना बसेको र आमाछोरी सुतेको स्थान भत्कदा उनीहरुको ज्यान गएको बताइएको छ ।
उता दाङमै घरको तेस्रो तलाबाट खसेर एक बालकको मृत्यु भएको छ । तुलसीपुर उपमहानगरपालिकामा घरबाट खसेर एक बालाको मृत्यु भएको हो । रथिक मियाँका तीन वर्षीय छोरा रियाजको राप्ती प्रादेशकि अस्पताल तुलसीपुरमा उपचारको क्रममा मृत्यु भएको हो।
यता, वर्षातले आज बिहानैबाट कैलालीका विभिन्न स्थानमा डुबान थालेको छ । अविरल वर्षासँगै आएको बाढीले तराईमा डुबान थालेको हो ।
काठमाडौं । कोरोना महामारीका कारण बेरोजगारी दर बढिरहेको बेला एकै पटक १७६ पदका लागि सरकारी सेवामा जागिरको अबसर खुलेको छ । गृह मन्त्रालय अन्तर्गत राष्ट्रिय परिचयपत्र तथा पञ्जीकरण विभागले राष्ट्रिय परिचयपत्र उपलब्ध गराउने कार्यक्रम अन्तर्गत घुम्ती सेवा सञ्चालन गर्न करारमा कर्मचारी मागेको हो । विभागले दर्ता अपरेटर पदमा कर्मचारी माग गरेको छ ।
यी कर्मचारीलाई सप्तरी, सर्लाही र कास्कीमा खटाइने छ । १२ कक्षा पास गरेको र १८ वर्ष पूरा भएर ३५ वर्ष ननाघेकाको हुनुपर्ने प्रावधान रहेको छ । यी कर्मचारीले दैनिक १२ सय पारिश्रमिक पाउनेछन् । उनीहरुले सार्वजनिक बिदामा पनि काम गर्नुपर्ने प्रावधान छ । आवेदन निशुल्क हाल्न सकिने भएको छ । कार्यक्रम सम्पन्न भएसम्म कर्मचारीले रोजगारी पाउने छन् । सरकारी सेवामा अयोग्य ठहर नभएका मानिसले दरखास्त दिन सक्ने भएका छन् ।
काठमाडौं । सत्तारुढ नेकपाको विवाद पुनः उत्कर्षमा पुगेको छ । मंगलबार डाकिएको स्थायी कमिटि बैठक प्रधानमन्त्री केपी शर्मा ओलील एकतर्फी स्थगित गरेपछि अर्को अध्यक्ष प्रचण्डले बैठक पुनः सूचारु गरे । आफ्नै निवासमा आयोजना गरिएको भएपनि पटक पटक बैठकलाई टार्दै आएका प्रधानमन्त्री केपी शर्मा ओलीले मंगलबारसमेत धोका दिएपछि कार्यकारी अध्यक्षको हैसियतमा स्थायी कमिटि बैठक संचालन गरे ।
बैठकमा प्रचण्डले दुई अध्यक्षको भावना विपरित ओलीले एकतर्फी रुपमा बैठक स्थगित गरेकोमा गुनासो व्यक्त गरे । अध्यक्ष पुष्पकमल दाहाल प्रचण्ड, वरिष्ठ नेताद्वय माधवकुमार नेपाल र झलनाथ खनाल एक स्थानमा रहेको अवस्थामा अकस्मात मंगलबार उपाध्यक्ष वामदेव गौतम प्रधानमन्त्रीको राजिनामाको शर्तबाट पछाडी हटेका छन् । यसले प्रधानमन्त्रीलाई डाढस दिएको छ ।
सामान्यतया वालुवाटारबाट बाहिर ननिस्कने प्रधानमन्त्री आज भने वामदेव निवास भैसेपाटी मै पुगेका छन् । केपी ओली निकटले यस भेटलाई निनान्त पारिवारिक भन्दै राजनीतिक भेट नभएको प्रचार गरेका छन् । तर, यो भेटलाई अर्थपूर्ण रुपमा लिइएको छ । बामदेव गौतमले प्रधानमन्त्रीको राजिनामा विपक्षमा रहेको विज्ञप्ती मंगलबार नै सार्वजनिक गरेका थिए ।
पार्टी एकता कायम राखिराख्न आफुले यस्तो प्रस्ताव गरेको उनको भनाई छ । उनी मंगलबार प्रचण्डको अध्यक्षतामा बसेको स्थायी कमिटि बैठकमा भने सहभागी भएका थिए । उनले आफ्नो विज्ञप्तीको आषय स्पष्ट पार्ने प्रयास गरेका थिए । नेताहरुले भने पार्टी गम्भीर मोडमा पुगेको भन्दै दुर्घटनाको संकेत गरेका छन् । पर्यटन मन्त्री योगेश भट्टराईले पार्टी संकटमा रहेको सार्वजनिक रुपमै लेखेका छन् ।
काठमाडौं । मंगलबार नेपालमा पछिल्लो दुई साता यताकै सर्वाधिक कोरोना संक्रमित बिरामी भेटिए । यस दिन २४ घण्टाको अवधिमा कुल ३ सय ११ जनामा कोरोनाका बिरामी थपिए । यसमध्ये काठमाडौंमा ४८ सहित उपत्यकामा मात्र ५३ जनाका कोरोना भाइरसको संक्रमण भेटिएको छ । यसले मुलुकका अन्य भेगमा भन्दा अब कोरोनाको ज्वरो काठमाडौं उपत्यका भित्र चर्कने संकेत गरेको छ ।
खासगरी लकडाउन खुकुलो भएपछि काठमाडौं उपत्यकामा छिर्ने मानिसको अधिक भीड छ । तर, उनीहरुलाई काठमाडौं आइसकेपछि उचित सुरक्षा प्रवन्धसहित व्यवस्थापनको तयारी भने छैन । महानगरपालिका र सरकारले भवितब्यबारे कुनै योजना बनाएको पाइदैन । पछिल्लो केही दिनयता बाढी पहिरोका कारण सडक अवरुद्ध भएपछि काठमाडौं आउने कम भएका छन् । तर, उपत्यकामा संक्रमणको ग्राफ भने उकालो लागिसक्यो ।
यसले केही दिन भित्रै भयाभहको अवस्था सिर्जना गर्ने चेतावनी विज्ञहरुले दिएका छन् । त्यस अवस्थामा काठमाडौं उपत्यकाको संकट टार्न निकै मुस्किल हुने निश्चित छ । सरकारले काठमाडौं महानगरभित्र भारत तथा तेस्रो मुलुकबाट आएका मानिसलाई समेत १४ दिन क्वारेन्टाइनमा राख्न सकेको छैन । त्यसका लागि क्वारेन्टाइन नै छैनन् ।
त्यसमाथि उपत्यका छिर्ने अन्य जिल्लाका मानिसलाई क्वारेन्टाइनमा राख्न सक्ने त कल्पना बाहिरको विषय भयो । यसले काठमाडौंलाई अब कोरोनाको इपिसेन्टर बनाउने जोखिम बढेको छ । अहिले काठमाडौं आउने मानिुलाई स्थानीय निकाय वा जिल्ला प्रशासनले सहजै सिफारिस दिन्छन् । यसले काठमाडौं आउने मानिसको चाप ह्वात्तै बढेको छ ।
सुर्खेत । विषालु च्याउको तरकारी खाँदा जाजरकोटमा दुखदः घटना घटेको छ । जाजरकोटमा विषालु च्याउ सेवनबाट एकै घरका चारजनाको मृत्यु भएको प्रहरीले जनाएको छ । जाजरकोटको कुशे गाउँपालिका १ स्याँक्रीका एकै घरका चार जनाको निधन भएको हो । एक जना बालिकाको सोमबार घरमै निधन भएको र अन्य तीनजना बालबालिकाको सुर्खेतस्थित कर्णाली प्रदेश अस्पतालमा उपचारको क्रममा मंगलबार ज्यान गएको बताइएको छ ।
९ साउनमा उनीहरुले जंगलबाट च्याउ ल्याएर तरकारी खाएका थिए । तर, च्याउ जंगली विषालु परेको हो । टेकबहादुर चलाउनेको परिवारका ८ जना गम्भीर बिरामी परेका थिए । प्रहरीका अनुसार बिरामीमध्ये टेकबहादुरकी १६ वर्षीया छोरी औसरा, १३ वर्षीया छोरी धनसरा र तीन वर्षिय छोरी अन्जता तथा ११ वर्षीया नातिनी निरुताको उपचारको क्रममा ज्यान गएको प्रहरीले जानकारी दिएको छ ।
विषालु च्याउ खाएर गम्भीर बिरामी भएका सात जनालाई गाउँपालिकाले नेपाली सेनाको हेलिकोप्टर चार्टर गरी उपचारका लागि सोमबार सुर्खेत पठाएको थियो । बिरामीमध्ये अझै एकजनाको अवस्था गम्भीर रहेको अस्पतालले जनाएको छ । तीनजनाको अवस्था सामान्य छ । अस्पताल ल्याउन ढिला भएको र त्यसक्रममा शरीरमा विषले प्रभाव पारिसकेका कारण किशोरीहरुलाई चाउन नसकिएको अस्पतालको भनाई छ । टेकबहादुर स्वयमः उनका ३० वर्षीय छोरा ललित, ३० वर्षीया बुहारी कल्पना र अर्को एक छोरीको उपचार भइरहेको छ ।
काठमाडौं । राष्ट्रिय प्रजातन्त्र पार्टीका संस्थापक अध्यक्ष पूर्वप्रधानमन्त्री स्व. सूर्यबहादुर थापाका पुत्र सुनीलबहादुर थापा नेपाली कांग्रेसमा प्रवेश गरेका छन् । गत शनिबार राष्ट्रिय प्रजातन्त्र पार्टी परित्याग गरेका पूर्वमन्त्री सुनीलबहादुर थापालाई मंगलबार नेपाली कांग्रेसमा प्रवेश गराइएको हो ।
कांग्रेस पार्टी कार्यालय सानेपामा आयोजित कार्यक्रममा सभापति शेरबहादुर देउवाले थापालाई पार्टी सदस्यता प्रदान गरेका छन् । धनकुटा कांग्रेसका संस्थापक सभापति स्व. सूर्यबहादुर थापाकै पहलमा पछि राप्रपा गठन भएको थियो । तर, राप्रपाले सूर्यबहादुर थापाको बिचारलाई आत्मसाथ गर्न नसकेको भन्दै पुत्र सुनील कग्रेसमा प्रवेश गरेका हुन् ।
मंगलबार आयोजित कार्यक्रममा प्रमुख विपक्षी नेपाली कांग्रेसका शीर्ष नेताहरुले कम्युनिस्टबाट प्रजातन्त्र खतरामा रहेको भन्दै त्यसका सचेत हुनुपर्ने ताए । अहिलेको सरकारले सबैतिर कन्ट्रोल गर्न खोजेको सभापति देउवाको भनाई छ । मिडिया, फोन ट्यापिङ गरी प्रजातन्त्र कमजोर बनाउने प्रयास भइरहेको उनको भनाई छ ।
सभापति देउवाले राप्रपाबाट आएका थापालगायत कसैलाई पनि भेदभाव नगरिने बताए । सुनीलबहादुर थापा मिहेनती नेता भएको उनको भनाई छ । कांग्रेसका वरिष्ठ नेता रामचन्द्र पौडेलले कम्युनिस्टहरुले संविधानले आत्मसाथ गरेको व्यवस्थालाई अझैसम्म स्वीकार गर्न नसकेको उल्लेख गरे ।
उपभापति विमलेन्द्र निधिले सुनीलबहादुर थापाको कांग्रेस प्रवेशले प्रजातान्त्रिक शक्तिलाई बलियो बनाएको उल्लेख गरे । प्रधानमन्त्री केपी ओलीका गतिविधिले प्रजातन्त्र खतरामा परेको उनको भनाई छ ।
कांग्रेसको सदस्यता लिएका नेता सुनीलबहादुर थापाले आफ्नो परिवारमा कांग्रेससँग ६५ वर्षअघिको सम्बन्ध रहेको स्मरण गरे । उनका बुबा स्व. सूर्यबहादुर थापा २०१० सालमा कांग्रेस धनकुटाको सभापति थिए ।