मेलबर्न, २४ चैत (रासस–एपी) । फिजी नजिकै चट्टानमा अड्किएको एक क्रुज जहाजबाट सबै यात्रुलाई सुरक्षित रूपमा बाहिर निकालिएपछि सम्भावित ठूलो मानवीय दुर्घटना टरेको छ । जहाज सञ्चालक कम्पनीले सोमबार दिएको जानकारीअनुसार उक्त घटनामा कुनै पनि यात्रु घाइते भएका छैनन् । ब्लू लगुन क्रुजद्वारा सञ्चालित एमभी फिजी प्रिन्सेस शनिबार मोनुरिकी टापु नजिकै चट्टानमा अड्किएको थियो ।
सो क्षेत्र हलिउड अभिनेता टम ह्याङ्क्स अभिनीत सन् २००० को चलचित्र ‘कास्ट अवे’ का कारण पनि परिचित मानिन्छ । प्रारम्भिक अनुसन्धानका आधारमा, जहाज लङ्गर हालेको अवस्थामा समुद्री अवस्था सामान्य रहे पनि अचानक आएको शक्तिशाली आँधीका कारण लङ्गर तानिँदै जहाज चट्टानतर्फ धकेलिएको र अन्ततः जमिनमा अड्किएको बताइएको छ ।
आइतबार बिहान उज्यालो हुनासाथ उद्धार कार्य सुरु गरिएको थियो । करिब ५५.५२ मिटर लामो जहाज नजिकै डुङ्गा पु¥याएर ३० यात्रुलाई उनीहरूका सामानसहित सुरक्षित रूपमा बाहिर निकालिएको कम्पनीले जनाएको छ । उद्धारपछि सबै यात्रुलाई डेनारो टापुमा सारिएको छ, जहाँ उनीहरूको आवश्यक व्यवस्थापन गरिएको छ । घटनापछि सम्भावित वातावरणीय क्षति रोक्न पनि तत्काल कदम चालिएको छ । जहाजमा रहेको पम्प गर्न सकिने इन्धन र अन्य तेल पदार्थ सोमबारसम्म हटाइएको कम्पनीले जनाएको छ, जसले समुद्री प्रदूषणको जोखिम घटाएको छ ।
उद्धार तथा प्राविधिक मूल्याङ्कनका लागि अस्ट्रेलियाका एक विशेषज्ञ आइतबारदेखि घटनास्थलमा खटिएका छन् र समग्र अवस्थाको निरीक्षण गरिरहेका छन् । यद्यपि, फिजीको समुद्री सुरक्षा प्राधिकरणले यस विषयमा औपचारिक प्रतिक्रिया सार्वजनिक गरेको छैन । समग्रमा, आकस्मिक प्राकृतिक प्रभावका कारण भएको यो दुर्घटनामा मानवीय क्षति नभएकाले राहत महसुस गरिएको छ भने आगामी दिनमा यस्ता घटनाबाट बच्न थप सावधानी अपनाउने आवश्यकता औँल्याइएको छ ।