काठमाडौं । सत्तारुढ नेपाल कम्युनिष्ट पार्टी (नेकपा)को स्थायी कमिटि बैठक बुधबारका लागि बोलाइएको छ । नेकपामा चरमोत्कर्षमा पुगेको विवाद केही मथ्थर भएसँगै बुधबार भने स्थायी कमिटि बैठक बस्ने अपेक्षा गरिएको छ । विवाद समाधान गर्न दुई अध्यक्ष केपी शर्मा ओली र पुष्पकमल दाहालबीचको वार्ता मंगलबार समेत निरन्तर रह्यो । करीव ३ घण्टा वार्ता गरेका दुई अध्यक्षबीच सहमति भने मंगलबार समेत जुटेन ।
वार्तामा कुनै निचोड ननिस्किए पनि संवादलाई निरन्तरता दिने निर्णय भएको हो । छलफललाई निरन्तरता दिएर स्थायी कमिटी बैठक पनि राख्ने सहमति जुटाएका दुई अध्यक्षको प्रयासले तत्कालका लागि पार्टी विभाजन हुने खतरा टरेको अनुमान गरिएको छ ।
संवादबाटै अहिलेका विवाद निरुपण गर्ने गरी दुई अध्यक्ष अघि बढेको नेताहरु बताउँछन् । समस्या समाधानका उपाय खोज्नुका साथै स्थायी कमिटी बैठकलाई समेत निरन्तरता दिने सहमति दुई अध्यक्षबीच भएको छ । विवाद चर्किएपछि दुई पटकसम्म स्थायी कमिटी बैठक रोकेर दुई अध्यक्ष संवाद भएको छ । तर, सहमति भने जुटेको छैन ।