काठमाडौं । नेपालमा तत्काल कामका लागि भारतबाट कुनै पनि व्यक्ति नेपाल आउन नपाउने भएका छन् । सरकारले भारतबाट श्रम गर्न आउने मानिसलाई नेपालमा प्रवेश रोक लगाएको छ । सोमबार बसेको मन्त्रिपरिषद् बैठकले भारतीय श्रमिकलाई नेपालमा आउन रोक लगाउने निर्णय गरेको सरकारका प्रवक्ता एवम् सञ्चार तथा सूचना प्रविधिमन्त्री डा. युवराज खतिवडाले बताए ।
भारतमा बढ्दो संक्रमणका बीच नेपालमा जोखिम बढेको छ । सोहीकारण सीमा क्षेत्रमा मानवीय आवतजावतमा कडाई गरिएको छ । अब भारतबाट श्रम गर्न कुनै पनि व्यक्ति नेपाल छिर्न नपाउने भएका छन् । भारतसँग सीमा जोडिएका जिल्ला अहिले सबैभन्दा बढी संक्रमणको शिकार बनेका छन् । ती जिल्लाबाट काठमाडौं आउनेहरुबाट उपत्यकामा समेत जोखिम बढेको छ ।