काठमाडौं । बिहीबारबाट काठमाडौंमा निषेधाज्ञा प्रारम्भ भएको छ । काठमाडौं उपत्यकाभर अतिआवश्यक काम नपरेसम्म घर बाहिर निस्कन नपाउने गरी निषेधाज्ञा भएको हो । बिहीबार काठमाडौंमा करीव २ हजार मानिस निषेधाज्ञा तोडेको अभियोगमा कारवाहीमा परेका छन् । उनीहरुलाई २ देखि ४ घण्टासम्म खुला आकासमुनी उभ्याएर छाडिएको छ ।
प्रहरीले अति आवश्यक काम बीना नै निस्किएकाहरुलाई यसरी होल्डमा राखेको हो । बिहीबार बिहान बैंकका कर्मचारीसमेत होल्डमा परेका थिए । प्रहरीले समन्वय गरी उनीहरुलाई भने छाडेको छ । आज प्रहरीले पसलहरु बन्द गराउन बिहानैबाट खटिएको थियो ।
शुक्रबारबाट बैंकका कर्मचारीलाई भने परिचय पत्र देखाएर निर्वाध हिँडडुल गर्न दिइने भएको छ । सरकारले संक्रमण बढेको भन्दै काठमाडौं उपत्यकामा निषेधाज्ञा घोषणा गरेको हो । बिहीबार मात्र देशभर ७ सय ७ जनामा कोरोना देखिँदा २ सय जना काठमाडांैं उपत्यका भित्र मात्र देखिएका छन् ।