काठमाडौं । मंगलबारबाट बैंकका सबै शाखा खुल्ने भएका छन् । बिहीबारसम्म बैंक तथा वित्तीय संस्थाका राजश्व संकलन हुने सबै शाखा तथा काउन्टर खुल्ने भएका हुन् । नेपाल राष्ट्र बैंक, बैंक तथा वित्तीय संस्था नियमन विभागबाट बैंकहरुलाई राजश्व संकलनको प्रयोजनका लागि ३ दिन सबै शाखा तथा काउन्टर खुला राख्न निर्देशन आएको छ ।
२५ भदौसम्म साउनमा तिर्नुपर्ने कर तिरिसक्नु पर्छ । सिमित शाखा खोल्दा बैंकमा भीड बढ्ने भएकाले सबै शाखा खोल्ने निर्देशन दिइएको हो । अहिले उपत्यकामा निषेधाज्ञा घोषणा गरिएको छ । तर, साउनमा तिर्नुपर्ने विभिन्न प्रकारका कर भने करदाताले अहिले तिर्नुपर्छ ।
किनकी सरकारले यो बीचमा कुनै पनि नयाँ घोषणा गरेको छैन । सोहीकारण नियमित कर तिर्नुपर्ने करदाताले साउनको कर भदौमा तिरिसक्नु पर्छ । अहिले बैंकले थोरै शाखाबाट मात्र सेवा दिइरहेका छन् ।