काठमाडौं । सीमानामा रहेको विवादका क्रममा अर्मेनिया र अजरबैजानबीच सैन्य युद्ध भएको छ । विवादित क्षेत्रलाई लिएर अर्मेनिया र अजरबैजानबीच सैन्य युद्ध हुँदा कम्तिमा २३ जनाको मृत्यु भएको बीबीसीले जनाएको छ । स्थल र हवाई दुबै माध्यमबाट झडप भएको थियो । घटनामा केही घाइते रहेको बताइएको छ ।
नागोरना काराबख क्षेत्रलाई लिएर विवाद बढ्दै गएको समयमा दुवै देशले एकअर्काको क्षेत्रमा हवाई आक्रमण गरेका थिए । अजरबैजानले पहिला विवादित क्षेत्रमा रहेको बस्तीमा हवाई आक्रमण गरेको आरोप अर्मेनियाको छ । प्रतिरक्षा कार्यमा अर्मेनियाले पनि अजरबैजानको हेलिकप्टर र सैन्य ट्याङ्क ध्वस्त बनाएको दावि गरेको छ ।
विवादित क्षेत्र अन्तर्राष्ट्रिय स्तरमा अजरबैजानको भूमिका रुपमा परिचित छ । यहाँ आदिवासी अर्मेनियनहरु बस्छन् । यस क्षेत्रमा झण्डै तीन दशकदेखि दुवै देशबीच विवाद जारी रहेको छ । आक्रमणपछि अर्मेनिया सरकारले सैन्य कानुन लागू गर्दै सैनिक परिचालन गर्ने निर्णय समेत गरिसकेको छ । अजरबैजानले अर्मेनियाको आक्रमणबाट आफ्ना सर्वसाधारण मारिएको दावि गरेको छ । एजेन्सी