बाजुरा । बाजुरामा एक आमा र उनका चार जना बच्चालाई खोलाले बगाएको छ । उनीहरु वेपत्ता भएका छन् । प्रहरीका अनुसार बाजुराको हिमाली गाउँपालिका–५ कवाडी गाउँमा ३० वर्षकी सत्ता नेपाली र उनका ४ छोराछोरी स्थानीय कवाडी खोलामा बगेर बेपत्ता भएका छन् । यसको जानकारी आएसँगै प्रहरी घटनास्थलतर्फ लागेको बताइएको छ ।
आमासँगै ५, ४ र १ वर्षकी छोरी र २ वर्षका छोरा बेपत्ता भएको परिवारले प्रहरी समक्ष जानकारी गराएका थिए । नुहाउने क्रममा दिउँसो ३ बजे उनीहरुलाई खोलाले बगाएको खबर प्रहरी चौकी बिछियामा आएको थियो । प्रहरी चौकी बिछियाबाट असई कर्ण बुढा र इलाका प्रहरी कार्यालय बुढीगंगाबाट सई नरेश शाहीको टोली घटनास्थलमा गएको जिल्ला प्रहरी कार्यालय बाजुराले जानकारी दिएको छ ।