काठमाडौं । आज २८ औं दिनमा अनसनरत डा. गोविन्द केसीले अनसन अन्त्य गर्ने भएका छन् । मध्यरातमा सरकार र डा. गोविन्द केसीबीच ८बुँदे सहमति भएसँगै उनी अनसन तोड्न सहमत भएका हुन् । शनिबार राती डा. केसी र सरकारी वार्ता टोलीका संयोजक गोपी मैनालीले सहमति पत्रमा हस्ताक्षर गरेका छन् ।
सहमति अनुसार कर्णाली स्वास्थ्य विज्ञान प्रतिष्ठानमा आगामी वर्षबाट एमबीबीएस कार्यक्रम सञ्चालन हुने भएको छ । अन्य स्थानमा २०८० फागुन १० भित्र पढाई सुरु गर्ने सहमति समेत दुबै पक्षबीच भएको छ ।
विश्वविद्यालय र प्रतिष्ठानहरुमा पदाधिकारी नियुक्ति निश्पक्ष र पारदर्शी बनाउन उच्च शिक्षासम्बन्धी विधेयक र एकीकृत स्वास्थ्य शिक्षा प्रतिष्ठानसन्बन्धी विधेयकमा समेट्न तीन साताभित्र मस्यौदा बनाउने र कानूनी व्यवस्था नहुँदासम् वरिष्ठता र कार्यक्षमताका आधारमा गर्ने सहमति भएको पत्रमा उल्लेखछ ।
चिकित्सा शिक्षा ऐन संशोधनका लागि चिकित्सा शिक्षा आयोगले गठन गरेको कार्यदलको क्षेत्राधिकारमा डा. केसीबीच २०७५ साउन १० मा भएका सहमति र सम्झौताका विषय समेत सम्ट्ने सहमति भएको छ । बयलपाटा अस्पतालमा निशुल्क स्वास्थ्य सेवा उपलब्ध गराउने सहमति पनि दुबै पक्षबीच भएको छ ।