काठमाडौं । कोरोना भाइरसको संक्रमणबाट सबैभन्दा बढी प्रभावित काठमाडौं उपत्यकामा पछिल्लो २४ घण्टामा थप १३ सय ५७ जना मानिसमा कोरोना भाइरसको संक्रमण पुष्टी भएको छ । स्वास्थ्य तथा जनसंख्या मन्त्रालयका अनुसार काठमाडौंमा १ हजार १ सय १३, भक्तपुरमा ४९ र ललितपुरमा १ सय ९५ जना कोरोना संक्रमित थपिए ।
यसमध्ये महिला ५ सय ६९ र पुरुष ७ सय ८८ रहेको मन्त्रालयको तथ्यांक छ । अहिले काठमाडौं जिल्लामा १६ हजार ८ सय ९० सक्रिय संक्रमित रहेका छन् । काठमाडौं जिल्लामा मात्र कुल २ सय १९ संक्रमितको ज्यान गइसकेको छ । यहाँ ४४ हजार ७ सय ४६ जनाले भने कोरोना जित्न सफल भएका छन् ।