काठमाडौं । सार्वजनिक सवारी साधनमा भाडादर नटासेमा अब कारवाही हुने भएको छ । महानगरीय ट्राफिक प्रहरी महाशाखाले यात्रुवाहक सवारी साधनमा भाडादरको विवरण सार्वजनिक रुपमा देखिने गरी नटाँसे कारवाही गर्ने स्ष्ट पारेको छ । शुक्रवार देखि अभियानका रुपमा भाडादर टास्न लागिएको महाशाखाले जनाएको छ ।
शुक्रबार मात्र ४२९ वटा सवारी साधनमा भाडादर टाँसिएको महाशाखाको भनाई छ । शनिवार समेत यो अभियान जारी रहेको छ ।
सार्वजनिक सवारी साधनले चर्को भाडा असुलेको गुनासो बढेपछि विवरण टास्नै पर्ने नियम ल्याइएको हो । यसले यात्रुको गुनासो व्यवस्थापन हुने र यात्रुले समेत गन्तव्यसम्मको भाडादर थाहा पाएर सोही अनुसार भाडा दिन सक्नेछन् ।
अब सवारी साधनमा विवरण नटासेमा कारवाही गरिने महाशाखाले जनाएको छ । प्रहरीले सडक र सवारी प्रयोगकर्ताहरुलाई कुनै पनि समस्या परेमा वा यात्राको क्रममा कुनै जानकारी लिनु परेमा ट्राफिक प्रहरीको हटलाईन १०३ मा फोन गर्न आह्वान समेत गरेको छ ।