सिमकोट । नेपालमा अधिक चिसोका कारण हिमाली भेगको जनजीवन प्रभावित हुने छ । यसै सिलसिलामा हुम्लाको उत्तरी नाम्खा गाउँपालिकास्थित हिल्सामा चिसोले पानीको धारामा बरफ जम्न थालेको छ।
राष्ट्रिय समाचार समिति (रासस)का अनुसार कात्तिक महिनाको दोस्रो सातादेखि हुम्लामा चिसो बढ्न थालेपछि हिल्सामा जम्मा गरेर राखेको पानी बरफ हुन थालेको हो।
रातको समयमा अत्यधिक चिसो हुने भएकाले धारामा बिहानको समयमा बरफ जम्न थालेको छ। यहाँको तापक्रम समेत माइनसमा झरिसकेको छ ।
दिउँसो घाम लागेपछि मात्रै जमेको पानी बिलाउँछ । कोरोना भाइरसका कारण हिल्सामा होटल बन्द छन् । यहाँ प्रहरी मात्र रहेका छन् ।
चिसो बढ्दै गएपछि हिल्सा प्रहरी चौकीले समेत मङ्सिर पहिलो साता आफ्नो बसाई सिमकोट सार्ने गर्छ । नेपाल प्रहरीको टोली जिल्ला फिर्ता भइसकेको छ । अहिले यहाँ सशस्त्र प्रहरी मात्र रहेको छ ।