पटना । नेपालसँग सीमाना जोडिएको बिहारमा भारतीय प्रधानमन्त्री नरेन्द्र मोदीको जादु चलेको छ । सन् २०१५ मा ५३ सीटमा खुम्चिएको भारतीय जनता पार्टीलाई उनले यस पटक ७० सीटमा विजयी बनाउन सफल भएका छन् ।
बिहार विधानसभा निर्वाचनमा नितिशकुमार र भारतीय जनता पार्टीको एनडिए गठबन्धनले १ सय २५ सिट जित्दै पूर्ण बहुमत समेत प्राप्त गरेको छ। यससँगै अब एनडीएले नितिश कुमारको नेतृत्वमा पुनः एक पटक सरकार बनाउने बाटो खुलेको छ ।
यो गठबन्धनलाई लालुप्रसाद यादवका छोरा तेजस्वी यादव नेतृत्वको गठबन्धनले कडा टक्कर भने दियो । तेजस्वी नेतृत्वको गठबन्धन १ सय १० सिटमा विजयी भयो । उनलाई कांग्रेसले साथ दिएको थियो । जितपछि प्रधानमन्त्री नरेन्द्र मोदीले अबको दशक बिहारको आत्मविश्वासको दशक हुने बताएका छन् । उनले बिहारका जनतालाई धन्यवाद समेत दिएका छन् ।
बिहार विधान सभा निर्वाचनमा भारतीय जनता पार्टीले ७०, राष्ट्रिय जनता दलले ७५ सीटमा जित निकाल्न सफल भए । जेदयूले ४३ सिट जितेको छ । कांग्रेसले १९, लोक जनशक्ती पार्टीले १ तथा हिन्दूस्तान अवाम मोर्चाले ४ सिटमा जित हासिल गरेका छन् ।