काठमाडौं । स्पेनिस क्लब बार्सिलोनाका अर्जेन्टाइन स्टार लिओनल मेसीले ब्राजिलियन महान खेलाडीले राखेको ऐतिहासिक कीर्तिमान तोडेका छन् । कुनै पनि एउटा क्लवका लागि सर्वाधिक गोल गर्ने कीर्तिमान अब मेसीका नाममा बसेको छ ।
यो रेकर्ड यसअघि पेलका नाममा थियो । मेसीले ला लिगाअन्तर्गत मंगलबार राती सम्पन्न रियल भालडोलिडविरुद्धको खेलमा गोल गर्दै बार्सिलोनाका लागि करियरमा ६४४ गोलको रेकर्ड राखे । यसअघि गत शनिबार उनले पेलेको कीर्तिमानसँग बराबरी ६४३ औं गोल गरेका थिए ।
खेलमा बार्सिलोना ३-० ले विजयी भएको छ । मेसीले ६५ मिनेटमा टोलीका लागि तेस्रो र आफ्ना लागि एक कोशेढुंगा गोल गरेका छन् । सम्भवनतः यो कीर्तिमान तोड्न अन्य खेलाडीका लागि असम्भव जस्तै हुनेछ । किनकी मेसी सन् २००४ देखि बार्सिलोनका लागि मात्र खेलिरहेका छन् । पेलेले ब्राजिलियन क्लब सान्तोषमा १८ वर्ष खेलेका थिए ।
त्यहाँ उनले ६५६ खेलमा ६४३ गोल गरेका थिए। यो रेकर्ड तोड्न असम्भव भनिएको थियो । सन् २००४ मा बार्सिलोनाको ए टीममा डेब्यू गरेका मेसीले अहिलेसम्म उक्त टीमलाई ठूलो योगदान गरेका छन् । बार्सिलोनाका लागि उनले १० लिग उपाधि, ४ च्याम्पियन्स लिग उपाधिसहित ३४ मुख्य उपाधि दिलाइसकेका छन् ।