काठमाडौं । नेपालमा सरकारले निजी क्षेत्रका अस्पताललाई कोभिड अस्पतालको सूचिबाट हटाएको छ । यससँगै अब कोरोना संक्रमितको उपचार अब सरकारी अस्पतालमा मात्र हुने भएको छ ।
कोरोना भारइसको संक्रमण उच्च दरमा घटेको र सरकारी अस्पतालकै बेड खाली भएको भन्दै सरकारले निजी अस्पताललाई कोरोना अस्पतालको सूचीबाट हटाउने निर्णय लिएको हो । अब निजी क्षेत्रका अस्पतालले अन्य रोगको सहजै उपचार गर्न सक्ने भएका छन् ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले पछिल्लो समय संक्रमण कम भएको छ । सोहीकारण निजी अस्पताललाई तत्काल कोभिड अस्पतालको सूचीमा राख्ने काम स्थगन गरिएको छ । मन्त्रालयले संक्रमितको उपचारका लागि देशभर ३० वटा भन्दा बढी निजी अस्पताललाई कोभिड अस्पतालका रुपमा घोषणा गरेको थियो । ती सबै अस्पताल अब उक्त सूचिबाट हटेका छन् ।
संक्रमण नबढेमा यो व्यवस्था निरन्तर रहने र बढेमा भने पुनः सेवा थाल्नेगरी तत्कालका लागि हटाइएको प्रवक्ता गौतमले बताए । उनका अनुसार मेडिकल कलेजहरूलाई भने कोभिड अस्पतालको सूचीबाट हटाइएको छैन ।
उनका अनुसार यो सूचिबाट हटेसँगै अब निजी अस्पतालमा कोभिड संक्रमितको उपचार भएमा त्यसको खर्च सरकारले व्यहोर्ने छैन। अस्पतालहरूमा मात्र उपचार गराइएका संक्रमितहरूको भने उपचार खर्च सरकारले व्यहोर्ने भएको छ ।