काठमाडौं । मलेसियामा विभिन्न कारणले मृत्यु भएका र नेपालमा ल्याउन नसकिएका नेपाली नागरिकको शव लिन आज नेपाल वायुसेवा निगमको वाइडबडी जहाज क्वालालाम्पुर उड्दैछ । शुक्रबार राती ११ बजे उड्ने जहाजले शनिबार बिहान एकै पटक १७ वटा शव नेपाल ल्याउने छ ।
सामाजिक उत्तरदायित्व कार्यक्रम अन्तर्गत निगमले शव नेपाल ल्याउन लागेको बताइएको छ । क्वालालाम्पुरमा न्यारोबडी जहाजबाट नियमित उडान भइरहेको छ । तर, कार्गोमा एकै पटक धेरै शव ल्याउनु पर्ने भएकाले वाइडबडी जहाज पठाउन लागिएको हो ।
मलेसियाबाट नेपाल आउने क्रममा जहाजमा २५० हाराहारी यात्रु समेत हुने भएका छन् । जहाज शनिबार बिहान ८ः४० मा त्रिभुवन विमानस्थलमा अवतरण गर्नेछ । मलेसियामा कोरोना भाइरसको संक्रमणयता नै शवहरु रोकिएका छन् ।