विराटनगर । आज नेकपाको ओली समूहको विराटनगरमा शक्ति प्रदर्शन हुँदैछ । नेपालमा गणतन्त्र आएपछि पहिलो पटक सरकारले मान्छे बटुलेर शक्ति प्रदर्शन गरिरहेको छ । प्रतिनिधिसभा विघटन गरी मध्यावधी निर्वाचन गरेका प्रधानमन्त्री केपी शर्मा ओलीको विरोधी आन्दोलनलाई चूनौति दिँदै आफै प्रदर्शन गर्दै हिँडिरहेका छन् । ओली समूहले यसलाई चुनावी प्रचारप्रसार र सरकारको कदमका पक्षमा जनमत रहेको देखाउन खोजिरहेको छ ।
तर, नेपालमा अधिकांशले संसद विघटन असंवैधानिक भनिरहेको बेला उनको प्रदर्शनलाई तडकभडक भन्नेहरु धेरै छन् । विराटनगर महानगरपालिका–२ को विराट नर्सिङ होमको पूर्वतर्फ रहेको मैदानमा आयोजना हुने जनसभामा दुई लाख जनता उतार्ने दावि समुहको छ ।
आमसभालाई प्रधानमन्त्री ओली, गृहमन्त्री रामबहादुर थापा बादल, नेता सुभासचन्द्र नेम्वाङ, प्रदेश १ का मुख्यमन्त्री शेरधन राईलगायतले सम्बोधन गर्ने कार्यक्रम छ । सभामा सहभागी हुने प्रदेश १ का विभिन्न जिल्लाका कार्यकर्ता तथा शुभेच्छुकका लागि १ हजार ५ सय सार्वजनिक बसको व्यवस्था गरिएको छ ।