काठमाडौं । नेपालको जनकपुर र भारतको अयोध्या हवाईमार्गबाट जोडिने भएका छन् । नेपालको निजी क्षेत्रबाट संचालित बुद्ध एयरले यी दुई शहरको बीचमा हवाई सेवा शुरु गर्ने तयारी थालेको हो । बुद्ध एयरले संस्कृति, पर्यटन तथा नागरिक उड्डयन मन्त्रालय र नेपाल नागरिक उड्डयन प्राधिकरणसँग अनुमति मागेको छ ।
अयोध्यामा अहिले भारतले राम मन्दिर बनाइरहेको छ । जनकपुर भने सीताको माइती शहर भएकाले नेपाल र भारत दुबै मुलुकका लागि यी दुई गन्तब्य महत्वपूर्ण रहेका छन् ।
बुद्ध एयरका अनुसार जनकपुरबाट अयोध्या उडान ५० मिनेटको हुनेछ । अयोध्यामा आन्तरिक विमानस्थलको स्तरोन्नति गरी अन्तर्राष्ट्रिय स्तरको बनाउने काम भइरहेको बताइएको छ । त्यसको काम सकिनासाथ बुद्धले अयोध्यामा जहाज उडाउने भएको छ । भारतले नै बनाएको रामायण सर्किटको एक महत्वपूर्ण अंश जनकपुर हो ।