काठमाडौं । युरोपियन च्याम्पियन्स लिग २०२०\२१ को क्वार्टरफाइनल समिकरण पुरा भएको छ । आज राती भएका अन्तिम १६ का खेलहरुबाट अन्तिम ८ मा पुग्ने टोलीहरुको टुङ्गो लागेको हो । अन्तिम १६ अन्तर्गत बुधबार राति भएको खेलमा चेल्सी र बार्यन म्युनिख विजयी भए । यसबाट क्वार्टरफाइनल खेल्ने ८ वटा टोली निश्चित भएका हुन् ।
चेल्सीसँगै इंग्ल्याण्डबाट म्यानचेष्टर सिटी र लिभरपुल छनोट भए । जर्मनीबाट बार्यन र बोरुसिया डर्टमण्ड क्वाटरफाइनल पुगे । स्पेनबाट रियल मड्रिडमात्र क्वाटरफाइनल पुग्न सक्यो । बार्सिलोना, एट्लेटिको मड्रिड र सेभिया अन्तिम १६ मै रोकिए । फ्रान्सबाट पेरिस सेन्ट जर्मन (पीएसजी) र पोर्चुगलबाट एफसी पोर्टो क्वाटरफाइनलमा पुगे । इटालियन सिरी एको कुनै पनि टोली अन्तिम ८ मा पुग्न सकेन ।
क्वाटरफाइनल पुगेकामध्ये म्यानचेष्टर सिटी र पीएसजी बाहेक अरु ६ क्लब पूर्वविजेता हुन् । पीएसजी गत सिजन फाइनल पुगेर बार्यनसँग हारेको हो । अब क्वाटरफाइनल र सेमिफाइनलका लागि शुक्रबार तालीका सार्वजनिक हुँदैछ । क्वाटरफाइनलमा पहिलो लिगका खेल अप्रिल ६ र ७ मा हुनेछन् । दोस्रो लेग अप्रिल १३ र १४ तारीखमा हुनेछन् ।