लण्डन । संयुक्त अधिराज्य (बेलायत)मा आजबाट राष्ट्रिय जनगणना शूरु हुँदैछ । यस अवसरमा त्यहाँ रहेका नेपालीलाई समेत सक्रिय सहभागिता जनाउन विभिन्न संघसंस्थाले आह्वान गरेका छन् । यसले पहिचान स्थापित गर्न सहयोग गर्ने बताइएको छ । संयुक्त अधिराज्यका चार राज्यमध्ये इङ्ल्यान्ड, वेल्स र उत्तरी आयरल्यान्डमा राष्ट्रिय जनगणनामा हुन लागेको हो ।
गैरआवासीय नेपाली सङ्घ (एनआरएनए) यूके, इङ्ल्यान्ड राज्य समन्वय परिषद्ले समेत यस जनगणनामा भाग लिन नेपाली समुदायलाई आह्वान गरेका छन् । जनगणनामा कोही पनि नछुटुन् भनेर हेल्पलाइन समेत एनआरएनएले सञ्चालनमा ल्याएको छ ।
घरमै बसेर अनलाइनमार्फत फाराम भर्न सकिने भएको छ । यसले नेपालीको सहभागिता बढ्नेछ । पछिल्लो जनगणनामा इङ्ल्यान्ड र वेल्समा ६० हजार २०२ र स्कटल्यान्डमा एक हजार २६८ जना नेपालीले नाम लेखाएका थिए ।