पाँचतारे होटेल सोल्टीको नाम अब ‘दि सोल्टी काठमाडौं’

काठमाडौं । नेपालको पुरानो मध्ये एक सोल्टी क्राउन प्लाजा अब ‘दि सोल्टी काठमाडौं’का नामबाट चिनिने भएको छ । आतिथ्य व्यवसायमा करीब ५४ वर्ष पुरानो सोल्टी होटलले ‘दि सोल्टी काठमाडौं’ का नामबाट रिब्राण्डिंग हुने निर्णय गरेको हो । कम्पनीका कार्यकारी अध्यक्ष दिनेशबहादुर बिष्टका अनुसार सोल्टी होटेलसँग इन्टरकन्टिनेन्टल होटेल्स ग्रुप (आईएचजी) को व्यवस्थापन सम्झौता समाप्त भएको छ । यो लण्डनको कम्पनी थियो । सोल्टीले अब व्यवस्थापन तथा संचालन दुबैमा विदेशी साझेदार राख्ने छैन । सोहीकारण नेपाली नामबाटै परिचित हुने निर्णय भएको हो ।
दि सोल्टी काठमाडौंका रुपमा कम्पनीले होटलसँगै एलएसजी स्काई सेफ काठमाडौंसमेत सञ्चालन गरिरहेको छ । त्रिभुवन अन्तरराष्ट्रिय विमानस्थलमा स्तरीय लाउन्जसमेत सोल्टीकै व्यवस्थापनमा सञ्चालनमा रहेको छ । कम्पनीले दुई वर्ष अगाडि मात्र नेपालगञ्जमा अर्को पाँचतारे होटेल ‘सोल्टी वेष्टेण्ड प्रिमियर’ सञ्चालनमा ल्याइसकेको छ । सोल्टी अतिविष्टि पाहुनाहरु आउँदा नेपालमा रहँने सबैभन्दा चर्चित होटेल पनि हो । यहाँ सार्क सम्मेलनका दौरान राष्ट्रप्रमुख बस्न बनाइएका सात वटा विशेष कोठा छन् । सोल्टीमा पूर्वराजा ज्ञानेन्द्र शाहको समेत लगानी छ । केही सेयर नेपाल वायुसेवा निगमको समेत रहेको छ ।