काठमाडौं । नेपालमा आजबाट लगातार तीन दिन वर्षा हुने भएको छ । मनसुनी वायुको प्रभावले आगामी तीन दिन देशका विभिन्न भागमा हल्कादेखि मध्यम वर्षाको सम्भावना रहेको छ । मौसम पूर्वानुमान महाशाखाले आज सूचना जारी गरि यसबारे जानकारी गराएको हो । नेपालको दक्षिण भूभाग नजिक मनसुनी न्यून चापीय रेखा रहेको प्रभावले पानी पारेको हो ।
यसको प्रभावले आज देशका अधिकांश भूभागमा सामान्य बदली रही प्रदेश १, बागमती, गण्डकी र लुम्बिनी प्रदेशका थोरै स्थानमा हल्कादेखि मध्यम वर्षा जारी छ । पूर्वानुमान महाशाखाका अनुसार आगामी २४ घन्टामा प्रदेश नं १ र बागमती प्रदेशका एक-दुई स्थानमा मेघगर्जन, चट्टयाङ्गसहित भारी वर्षाको सम्भावना छ ।
ती प्रदेशको पहाडी भू भागमा पहिरो तथा गेग्रान बहावको जोखिम रहेको छ । नदीनाला तथा खहरे खोलामा पानीको सतह बढ्न सक्ने तथा यातायात क्षेत्र प्रभावित हुन सक्ने भएकोले चेतावनी महाशाखाले दिएको छ ।