नयाँ दिल्ली । कोरोना महामारीका बीच अमेरिका र कुवेतले करीव ४ हजार भारतीय नागरिकलाई फिर्ता गरिदिएका छन् । भारतीय संचारमाध्यमहरुका अनुसार अवैध रुपमा बसिरहेका र भिसा अवधी सकिएका विभिन्न उडानबाट ती मुलुकले भारतीय नागरिकलाई फिर्ता गरेको समाचारमा उल्लेख छ । भारतीय विदेश मन्त्रालयले महामारीका बीच भएको हवाई उडानबारे जानकारी गराएको एक विवरणमा यस्तो उल्लेख छ ।
कतिपय भारतीयलाई स्पेशल उडान नै गरि फर्काइएको थियो । यस्तो उडानबाट फर्काइनेमा सजाय पुरा भुक्तान गरिसकेका नागरिक थिए । हिन्दुस्तान टाइम्सले छापेको यो रिर्पोटमा दुई मुलुकबाट मात्र ४ हजार भारतीय फिर्ता गरेको उल्लेख छ । अधिकतम उडान कुवेत सरकारले त्यहाँ रहेका गैरकानूनी रुपमा बसिरहेका भारतीयलाई पठाउन गरेको थियो । यसरी बस्नेमा भिसा सकिएपछि पनि अवैध रुपमा बस्ने भारतीय बढी थिए ।
यसका लागि कुवेत सरकारले निशुल्क उडान गरेको थियो । समाचारमा जनाइए अनुसार यसरी फर्काइएका अधिकांश मजदूर थिए । उनीहरु अब नयाँ प्रक्रियाबाट भने पुनः कुवेत जान सक्नेछन् । तर, सम्बन्धित मुलुकमा विभिन्न अपराधमा सजाय पाएर देश निकालामा परेकाहरु भने पुनः सो मुलुक जान सक्ने छैनन् ।