काठमाडौं । चिनियाँ कम्पनी सिनोफार्मसँग सरकारले किनेको कोरोना भाइरस विरुद्धको खोप २५ असारबाट काठमाडौं आउन थाल्ने भएको छ । नेपाल एयरलाइन्सले मेडिकल सामग्री ल्याउने प्रयोजनका लागि चीनको राजधानी बेइजिंग जाने छ । २४ असारमा जाने वाइडबडी जहाज २५ असारमा काठमाडौं आउने छ । यो जहाजमा ८ लाखभन्दा माथि डोज एक खेपमा ल्याउने तयारी छ ।
भेरोसेल खोप आगामी तीन साताभित्रै सरकारले खरीद गरेको परिणाम भित्रै आइपुग्ने छ । सरकारले ४० लाख डोज खोप किनेको बताएको छ । दोस्रो उडान असार ३१ मा हुने छ । यो जहाज १ साउनमा काठमाडौं आउने छ । तेस्रो उडान साउन ७ मा जाने छ । यो जहाज ८ साउनमा नेपाल आउने छ । पटक पटकको प्रयासपछि अन्ततः चीन खोप बिक्रि गर्न तयार भएको हो । अन्य मुलुकबाट भने तत्काल खोप आउने सम्भावना छैन ।
